Read Bhaibhiri Idzva rechiShona 1 Vakorinde 15 Bible Online

1 Vakorinde 15 - Bhaibhiri Idzva rechiShona bible

1 Vakorinde 15

¹Hama dzangu ndingade kukuyeuchidzai Shoko Rakanaka randakakuparidzai[15] ramakagamuchirawo ramumire naro

²rinokuponesai kana mukaribatisisa; kusatoti makatenda mariri pasina.

³Ndakakugamuchidzai sechinhu chikuru kwazvo chokutanga chandakanga ndakagamuchirawo chokuti Kristu akafira zvitadzo zvedu sokutaura kunoita Magwaro Matsvene,

⁴uye kuti akavigwa akamutswa nezuva retatu sokutaura kwamagwaro matsvene,

⁵uye kuti akazviratidza kuna Kefasi ndokuzozviratidzawo kuna vane gumi navairi.

⁶Akazozviratidza kune vehama vanopfuura mazana mashanu panguva imwecheteyo. Vazhinji vavo vachiri vapenyu kunyange zvazvo vamwe vakafa.[16]

⁷Akazozviratidza kuna Jemusi ndokuzotevera kuvapositori vose.

⁸Pokupedzisira, sokune munhu akazvarwa nguva yake isati yasvika[17] akazviratidzawo kwandiri.

⁹Chikonzero chacho ndechokuti ini ndiri wokupedzisira kuvapositori, ndisingakodzeri kudaidzwa kunzi mupositori nokuti ndakashusha sangano raMwari.

¹⁰Asi nenyasha dzaMwari ndiri zvandiri. Nyasha dzake kwandiri hadzina kushaya basa. Zvakatoitika ndezvokuti ndakashanda zvakaomarara kupinda vose. Kunyange zvazvo ndakanga ndisirini asi nyasha dzaMwari mandiri.

¹¹Hazvina mhosva kuti ndivo here kana kuti ini, zvatinoparidza ndizvozvo uye ndizvo zvamakatenda.

¹²Ko zvino kana Kristu achiparidzwa kuti akamutswa kuvafi, ko vamwe venyu vangati hakuna zvokumuka kwavakafa sei?

¹³Zvino kana pasina zvokumuka kwavakafa saka Kristu haana kumutswa.

¹⁴Kana Kristu asina kumutswa, kuparidza kwedu hakuna maturo uye chitendero chenyu hachina basa.

¹⁵Isu tinobva taonekwa kuti tiri kurevera Mwari nhema nokuti takapupurira Mwari kuti akamutsa Kristu waasina kumutsa kana chiri chokwadi kuti vakafa havamutswi.

¹⁶Chiripo ndechokuti, kana vakafa vasingamutswi, saizvozvowo Kristu haana kumutswa.

¹⁷Kana Kristu asina kumutswa, chitendero chenyu hachina basa uye muchiri muzvitadzo zvenyu.

¹⁸Naizvozvowo avo vakafa muna Kristu vakatsakatika.

¹⁹Muna Kristu kana tariro yedu ichingova mune zvoupenyu huno chete, pavanhu vose, ndisu vanhu vanonzwisa urombo zvikuru kwazvo.

²⁰Asi chokwadi ndechokuti Kristu akamutswa kuvafi semichero yokutanga yaavo varere.

²¹Sokuuya kwakaita rufu nokumunhu mumwechete nokumunhu mumwechetewo kwakauya kumuka kwavakafa.

²²Sokufa kunoita vanhu vose muna Adhamu, saizvozvowo muna Kristu vanhu vose vanomutswa.

²³Asi mumwe nomumwe achamuka pachijanha chake, Kristu ari iye muchero wokutanga; kozoti, pakuuya kwake, vanhu vanenge vari vanhu vaKristu.

²⁴Ndipo panozouya magumo panenge Kristu oturira umambo kuna Mwari Baba apedza kuparadza mweya mikuru mikuru youshe neyoukuru neyavanamasimba.

²⁵Nokuti Kristu anofanira kutonga kusvikira Mwari aisa vavengi vake vose pasi petsoka dzake.

²⁶Muvengi wokupedzisa anofanira kuparadzwa, rufu.

²⁷Nokuti zvinonzi, “Mwari akaisa zvinhu zvose pasi petsoka dzake.” Zvino kana zvichinzi zvinhu zvose zvakaiswa pasi pake, zviri pachena kuti hazvibatanidziri naiye, Mwari akaisa zvinhu zvose pasi pake.

²⁸Kana zvinhu zvose zvaiswa pasi pake nezvo Mwanakomana pachakewo achava pasi pouyo akaisa zvinhu zvose pasi pake kuti Mwari ave Mwari wazvose muna zvose.

²⁹Ko kana zvisiri izvo vanoombekerwa vakafa vanenge vachifungei kana vakafa vasingambomutswi? Vanoombekerwei panzvimbo pavo?

³⁰Ko chatinogarira munhamo nguva dzose chiiko?

³¹Hama dzangu ndinopika nemi vandinodada navo muna Kristu Jesu Tenzi wedu kuti kufa ndokwangu zuva nezuva.

³²Kana vakafa vasingamutswi muvafi, ini somunhu ndinowanei nokurwisana kwandakaita nezvikara kuEfesusi. Zviri nani kuti titi, “Ngatidyei tinwe zvedu nokuti mangwana tichafa.”

³³Musanyengedzwe zvenyu, shamwari dzakaipa dzinoparadza hunhu.

³⁴Nyatsofungai, musiyane nezvitadzo nokuti vamwe havazivi Mwari. Ndinotaura izvi kuti munyare.

³⁵Asi mumwe angabvunze kuti, “Ko ivo vakafa vanomutswa sei? Vanenge vano muviri wakaita sei?”

³⁶Benzi romunhu! Chaunodyara hachimeri kana chisina kutombofa.

³⁷Chaunodyara, ingave tsanga yekoroni kana chimwe chakadaro hachisicho chinozobuda chakadaro

³⁸asi Mwari ndiye anochipa chimiro chacho pamadiro ake.

³⁹Nyama haina kufanana yose yose. Pane nyama yavanhu nenyama yemhuka nenyamawo yeshiri neimwe yehove.

⁴⁰Kune zvinhu zvomudenga nezvinhu zvapanyika. Kupenya kwezvokudenga kwakasiyana nokupenya kwezvapasi.

⁴¹Kune kupenya kwezuva nokupenya kwomwedzi. Kuno kupenya kwenyenyedzi. Nyenyedzi dzinosiyana pakupenya kwadzo.

⁴²Ndizvo zvimwechetezvo nokumuka kwavakafa. Chinodyarwa chinoparara asi chinomutswa hachiparari.

⁴³Chinodyarwa mukuzvidzwa asi chichimutswa chava kupenya; chinodyarwa muutera asi chichimutswa chava nesimba.

⁴⁴Chinodyarwa somuviri unobatika asi chinomutswa chava muviri womweya.

⁴⁵Zvino kana pano muviri unobatika kuno muviriwo womweya. Ndizvo zvakanyorwa zvichinzi munhu wokutanga, Adhamu akava chinhu chipenyu; Adhamu wokupedzisa akava mweya unopa upenyu.

⁴⁶Asi hausi womweya unotanga asi unobatika kozoteverwa nowomweya.

⁴⁷Munhu wokutanga akabva kuvhu, munhu wevhu. Munhu wechipiri anobva kudenga.

⁴⁸Vanhu vehuruva vakafanana nomunhu uya wevhu, saizvozvowo vanhu vokudenga vakafanana nomunhu wokudenga.

⁴⁹Sokutodzana kwatakaita nomunhu wehuruva tichatodzanawo noMunhu wokudenga.

⁵⁰Ndinokutaurirai izvi, hama dzangu, zvokuti, chakaitwa nenyama neropa hachikwanisi kuwana umambo hwaMwari uye chinofa hachigoni kuwana kusafa.

⁵¹Chinzwai ndava kukutaurirai, chinhu chakavandika chisingatsananguriki chokuti, hatisi kuzofa tose asi tose tichasandurwa,

⁵²nenguva isipi, nokubwaira kweziso chaiko pakurira kwehwamanda yokupedzisira. Hwamanda icharira, vakafa vachamutswa vasisafi, isu tobva tasandurwa;

⁵³nokuti muviri unofa uyu unofanira kupfeka kusaora uye muviri uyu unofa unofanira kupfeka kusafa.

⁵⁴Kana muviri unoora wapfeka kusaora uye muviri unofa wapfeka kusafa ndipo pachazoitika zviya zvakanyorwa zvinoti;

⁵⁵Rufu rwakamedzwa nokukurirwa kwarwakaitwa Nhai rufu kukurira kwako kuripi? Iwe rufu rumborera rwako ruripi?

⁵⁶Rumborera rwerufu chitadzo. Simbawo rechitadzo mutemo.

⁵⁷Mwari ngaatendwe anoita kuti tikunde nokuna Tenzi wedu Jesu Kristu.

⁵⁸Naizvozvo, hama dzangu dzadiwa, rambai makasimba musingatsukutsiki musingasiyani kwazvo nebasa raTenzi tichiziva kuti muna Tenzi basa renyu harishai maturo.