Read Bhaibhiri Idzva rechiShona 1 Vakorinde 3 Bible Online

1 Vakorinde 3 - Bhaibhiri Idzva rechiShona bible

1 Vakorinde 3

¹Kana iniwo, hama dzangu, handina kukwanisa kutaura kwamuri savanhu vana Mweya asi savanhu venyama uye savacheche muna Kristu.

²Ndakakurerai nomukaka kwete nesadza nokuti makanga musati mokwanisana naro. Nyangwe nazvino wose hamusati mokwanisana naro.

³Chikonzero ndechokuti muchiri vanhu venyama, nokuti kana pachine shanje nokukakavadzana pakati penyu, hamusi vanhu venyama here muchizvibata savanhuwo zvavo?

⁴Ko kana munhu achiti ndiri waPauro mumwe achiti ndiri waAporosi hamusati muchingova vanhu chete here?

⁵Ko iye Aporosi chiiwo zvake? Pauro chinyi? Varanda. Imi makawana chitendero chenyu nemavari sokupiwa kwakaitwa mumwe nomumwe wavo.

⁶Ini ndakadyara, Aporosi akadiridza asi Mwari ndiye akaita kuti zvikure.

⁷Saka anodyara naanodiridza hapana zvavari asi Mwari ndiye chete anoita kuti zvikure.

⁸Anodyara naanodiridza vakangoenzana. Mumwe nomumwe wavo achagamuchira mubayiro wake sokushanda kwaakaita nokuti tiri vashandipamwe vaMwari.

⁹Imi muri munda waMwari, imba yaMwari.

¹⁰Nenyasha dzandakapiwa naMwari ndakavaka hwaro somuzivi chaiye wokuvaka. Mumwe ndiye ari kuvaka pasoro pahwo. Munhu wose ngaatozvingwarira kuti anovaka sei pahuri.

¹¹Hakuna humwe hwaro hunogona kuvakwa nomunhu kusiya hwakavakwa ihwohwo. Hwaro hwacho ndiJesu Kristu.

¹²Zvino mumwe anogona kuvaka hwaro ihwohwo nendarama, mumwe nesirivha mumwe namatombo anokosha mumwewo namapango mumwe nouswa mumwe namashanga.

¹³Basa romumwe nomumwe richaratidzwa pachena zvariri nokuti Zuva iroro richazviburitsa pachena nokuti basa romunhu richaoneswa zvariri nomoto. Moto ndiwo uchaedza basa romunhu nomunhu kuti akariita sei.

¹⁴Kana basa rokuvaka rakaitwa nomunhu pahwaro huya rikagona kuramba riripo, munhu iyeyo achawana mubayiro.

¹⁵Asi basa romunhu rikatsva, acharasikirwa. Iye pachake achaponeswa zvake asi somunhu akapunyuka nomumoto.

¹⁶Handiti munoziva kuti muri Temberi yaMwari here uye kuti Mweya waMwari anogara mamuri?

¹⁷Nezvo ani naani anoparadza Temberi yaMwari, Mwari achamuparadza nokuti Temberi yaMwari inoera. Temberi yacho ndimi.

¹⁸Munhu ngaarege zvake kuzvinyengedza. Kana pano mumwe pakati penyu anozviti ndakachenjera panyika pano ngaatozviita sebenzi zvake kuti ave mungwaru.

¹⁹Ndinodaro nokuti, ungwaru hwapasi pano, kuna mwari hupenzi sokunyorwa kwazvakaitwa zvichinzi, “Anokachikira wakangwara muhumenemene hwavo ihwohwo.

²⁰Napamwezve panoti Tenzi anoziva kuti pfungwa dzavangwaru hadzina maturo

²¹Saizvozvo munhu ngaarege kuzvirumbidza nomunhu nokuti zvinhu zvose ndezvenyu.

²²Angave Pauro kana Aporosi kana Kefasi; ingave nyika kana upenyu kana rufu, ingave nguva ino, kana yamangwana, zvose ndezvenyu;

²³Imiwo muri vanhu vaKristu Kristu ndewaMwari.”