Read Bhaibhiri Idzva rechiShona 2 Vakorinde 10 Bible Online

2 Vakorinde 10 - Bhaibhiri Idzva rechiShona bible

2 Vakorinde 10

¹Ini Pauro ndinokukumbirisai, nounyoro nokupfava kwaKristu. Iyeni ndakawota kana ndakatarisana nemi uso nouso asi munhu ane chivindi kwamuri kana ndisipo.

²Ndinokukumbirai kuti kana ndauyako, ndirege kuita zvakaomarara sokufunga kwandinoita kune vamwe vanhu vanofunga kuti tinoita zvinhu tichitungamirirwa namafungiro ezvenyika.

³Kunyange zvedu tichigara panyika, hatisi kurwa hondo yapanyika

⁴nokuti zvombo zvatinorwisa nazvo, hazvisi zvapasi pano asi kuti zvine simba raMwari rinoparadza nhare dzokuzvidzivirira nadzo muhondo.

⁵Isu tinoparadza nharo uye pfungwa dzokuzvikudza dzinopingidza vanhu kuziva Mwari uye tinotora vanhu pfungwa dzavo tichidziisa muutapwa, tichivaita kuti vateerere Kristu

⁶takagadzirira kuranga kusateerera kose kana kuteerera kwenyu kwakwana.

⁷Onai zvinhu sezvazviri. Kana pane anonyatsovimba kuti ndewaKristu, ngaayeukewo kuti sezvaari waKristu, nesuwo ndizvo zvatiri.

⁸Kunyange ndingazvikudze zvinenge zvakati nyanyisei noukuru hwandinahwo, hwandakapiwa naTenzi, ndakahupiwa kuti ndikuvakei kwete kuti ndikuparadzei, saka handinyari nazvo.

⁹Handingadi kuita sokunge ndinoda kukutyityidzirai namatsamba

¹⁰nokuti zvinonzi, “Matsamba ake akaomarara kwazvo uye ane simba asi kana aripo imbwende yomunhu uye pakutaura idera chairo.”

¹¹Vanhu vakadaro ngavazive kuti zvatinotaura netsamba tisipo tinogonawo kuzvitaura tiripo.

¹²Hatingazviisi zvedu mubato kana kuzvienzanisa navavo vanozviisa pamusoro, vanozvitora ivo vozviita mwero wokuzviera nawo vachizvienzanisawo nezvavari.

¹³Isu hatidi kuzvirova dundundu zvinopfuuridza asi tichamirira pamiganhu yatakaisirwa naMwari. Imi muri mukati memiganhu iyoyo.

¹⁴Pamusana pokuti imi muri mukati memiganhu yedu hatisi kupfuuridza miganhu yedu. Ndisu takatotanga kuuya neShoko Rakanaka raKristu kwamuri.

¹⁵Naizvozvo, hatipindiridzi tichizvirovera dundundu mubasa ravamwe. Chitarisiro chedu ndechokuti chitendero chenyu pachinokura, munda wedu unobva wakurakurawo pakati penyu.

¹⁶Pakadaro tinobva takwanisa kuparidza Shoko Rakanaka munyika dziri mberi kweyenyu kuti tirege kuzozvikudza nebasa rakaitwa kare muminda yavamwe.

¹⁷Anozvirumbidza ngaazvirumbidze naTenzi

¹⁸nokuti haasi munhu anozviti ndakanaka asi anonzi naTenzi akanaka.