Read Bhaibhiri Idzva rechiShona 2 Vakorinde 11 Bible Online

2 Vakorinde 11 - Bhaibhiri Idzva rechiShona bible

2 Vakorinde 11

¹Dai mukambondiregererawo ndichimboti pengerekei zvangu zvishomanana, mundiitirewo mwoyo murefu.

²Ndine shanje yaMwari nemi nokuti ndakakuroodzai kuna Kristu, ndichida kukuperekai semhandara tsvene kumurume wayo mumwechete oga.

³Zvino ndavakutotya kuti sokunyengedza kwakaita nyoka Eva nokusvinuka kwayo pfungwa dzenyu dzingadaro dzatsautswa pautsvene hwenyu nokutendeseka kwenyu kuna Kristu.

⁴Ndinodaro nokuti kana mumwe munhu akauya achiparidza mumwe Jesu akasiyana newatakaparidza muchigamuchira mumwe mweya wakasiyana newamakagamuchira kana kuti mukagachira Shoko Rakanaka rakasiyana neremakagamuchira muri kutomugamuchira namaoko maviri.

⁵Sokuona kwangu hapana chandinopfuurwa naivo vapositori vapamusoro vacho ivavo.

⁶Kunyange zvangu ndisingakwanisi kunyatsotaura asi ruzivo ndinarwo. Izvi akanyatsokujekeserai nenzira dzose muna zvose.[7]

⁷Ndakatadza here nokuzvidukupisa kwandakaita kuti imi mukudzwe zvandakaparidza Shoko Rakanaka raMwari pasina chamakaripa?

⁸Ndaiita sokubira mamwe masangano ndichitambira rutsigiro rwavo kuti ndikushandirei.

⁹Pandakanga ndiinemi ndisina chokubata, hapana wandakaremedza. Zvandaida ndakapiwa nehama dzedu dzakabva kuMasedhonia. Saizvozvo ndakaramba uye ndichangoramba ndichiramba kukuremedzai nenzira ipi zvayo.

¹⁰Sokuti nechokwadi chaicho chaKristu chiri mandiri, kuzvizuwidza kwangu uku hakumbofa kwakanyaradzwa mudunhu reAkaya.

¹¹Nemhosva yeiko? Pamusana pokuti handikudei here? Mwari ndiye anoziva kuti ndinokudai.

¹²Ndichangoramba ndichiita zvandiri kuita, kuti nditadzise kubudirira avo vanoda kuzvizuwidza vachiti vanongoshandawo sezvatinongoita.

¹³Vanhu vakadaro vapositori venhema, vashandi vanonyengedza, vanobata vanhu kumeso vachizviti vapositori vaKristu.

¹⁴Hazvishamisi izvozvo nokuti kunyange Satani anonyengedza achizviita somutumwa wechiedza.

¹⁵Naizvozvo hazvishamisi kana varanda vake vachinyengedza sokunge varanda voururami. Mugumo wavo uchaenderana nezviito zvavo.

¹⁶Ndinodzokororazve kuti ngaparege kuva nomunhu anofunga kuti ndiri benzi romunhu; asi kunyange mukafunga zvenyu kudaro, nditorei zvenyu sebenzi kuti ndiwanewo mazvikudziro zvishomanene.

¹⁷Zvandiri kutaura hazvina Tenzi mukati, asi sebenzi, mukuzvirova dundundu kwangu uku kune chivindi,

¹⁸sezvo vazhinji vachizvikudza nezvinhu zvenyika, neniwo ndichazvirumbidza,

¹⁹nokuti munoitira mwoyo murefu mapenzi muchifara asi imi muri vanhu vakangwara.

²⁰Munoitiraka imi mwoyo murefu munhu akakuitai varanda kana akakudyai nomunyati achikushandisai kana kuzvikudza kana kutokurovai nembama kumeso.

²¹Ndinonyara kutaura kuti hwaiva humbwende kuita izvozvo. Asi kana pane munhu angade kuzvikudza nechii zvacho, ndava kutaura zvangu sebenzi, ndingatoitawo chivindi chokuzvikudza saizvozvo.

²²Ivo vaHebheru here? Kana neniwo ndiri muHebheru. Ivo vaIsiraeri here kana neniwo. Ivo zvizvarwa zvaAbhurahamu here? Kana neniwo.

²³Ivo vashandi vaKristu here? Ini ndinotova mushandi wake ari nani. Zvino ndava kutaura zvangu somunhu anopenga. Ndakashanda zvakaomarara kupinda ivo. Ndakaiswa mujeri kakatowanda kutovapfuura. Ndakarohwa kakawanda, ndikatarisana norufu kakawanda.

²⁴Ndakarohwa ndiri mumaoko avaJudha shamhu dzinosvika makumi matatu nepfumbamwe kanosvika kashanu.

²⁵Ndakarohwa nemibhadha kanosvika katatu. Ndakatakwa namatombo kamwechete. Ndakakudubuka nechikepe katatu. Ndakaita siku nesikati ndakayangarara mugungwa.

²⁶Panzendo dzangu dzakawanda ndakapinda njodzi dzenzizi nenjodzi dzamakororo, uye njodzi dzaibva kuvanhu vokwangu uyewo nenjodzi dzaibva kunevechirudzi kwozoti njodzi muguta, kwoti njodzi musango, kwouya njodzi mugungwa nenjodzi dzaibva kuhama dzenhema

²⁷mubasa rakaoma nomuzvinhu zvinotambudza nomukushaiswa hope kakawanda; munzara nenyota uye kazhinji ndisina chokudya; muchando nomukushaya chokufuka

²⁸tisingatauri zvedu nezvezvimwe izvi, mazuva ose ndinogara ndakaremerwa nokufunga masangano ose.

²⁹Ndiani anorukutika ndikasarukutikawo. Ndiani anopinzwa mukutadza ndikasagumbuka nazvo.

³⁰Dai kuri kuti ndinozvirova dundundu ndingatozvirovera dundundu utera hwangu,

³¹Mwari naBaba waTenzi Jesu, iye anofanira kurumbidzwa nokusingaperi anoziva kuti handitauri nhema.

³²KuDhamasikosi mutongi aiva pasi paMambo Aretasi akagaririra guta reDhamasikosi kuti andibate

³³asi ndakaburutswa ndiri mutswanda napaburi raiva parusvingo ndikamupunyuka.