Read Bhaibhiri Idzva rechiShona 2 Vakorinde 13 Bible Online

2 Vakorinde 13 - Bhaibhiri Idzva rechiShona bible

2 Vakorinde 13

¹Aka kava kechitatu ndichiuya kwamuri. Nyaya yose inofanira kutsigirwa nezvapupu zviviri kana zvitatu.

²Ndakayambira avo vakambotadza navamwe vose uye ndiri kuvayambira, iye zvino, ndisipo sezvandakamboita ndiripo, pandakakushanyirai rwechipiri, kuti kana ndouyazve handivaregi vasina kurangwa.

³Zvamunoda chinhu chinoratidza nacho kuti Kristu anotaura mandiri, iye ndiye achaonana nemi, haasi dera ane simba pakati penyu.

⁴Iye akarovererwa pamuchinjikwa muutera asi mupenyu nesimba raMwari. Nokudaro muchaona kuti isu tine utera pamwechete naye asi tichararama pamwechete naye nesimba raMwari.

⁵Zviongororei muone kuti muchiri pachokwadi nechitendero chenyu here? Zvionei pamumire. Hamuoni here kuti Jesu Kristu ari mamuri kusatoti makundika mukuzviongorora kwenyu!

⁶Ndinotarisira kuti imi muchaona kuti isu hatina kukundika.

⁷Tinonamata Mwari kuti murege kukanganisa, kwete kuti zvioneke kuti isu takabudirira asi kuti muite zvakarurama kunyange isu tichiita sokunge takakundika.

⁸Hatigoni kuita chii zvacho kurwisana nechokwadi asi kutorwira chokwadi chacho.

⁹Tinotofara kana tine utera imi muine simba. Chatinonamatira ndechokuti imi mururamiswe.

¹⁰Ndiri kunyora izvi ndiri kure nemi kuti kana ndouyako, ndirege kuva munhu akaomarara pandinoshandisa simba randakapiwa naTenzi rokuvaka kwete kupaza.

¹¹Pokupedzisira, hama dzangu, ndinoti chisarai. Gadziridzai nzira dzenyu. Teererai zvandinotaura, wiriranai, garisanai zvakanaka. Mwari werudo norugare achava nemi.

¹²Kwazisanai nokutsvodana kunoera.[8]

¹³Vatsvene vose vanokukwazisai. Chikomborero chokutirwa nyasha naTenzi wedu Jesu Kristu norudo rwaMwari nokuwadzanisa kwaMweya Mutsvene ngachive nemi.