Read Bhaibhiri Idzva rechiShona 2 Vakorinde 4 Bible Online

2 Vakorinde 4 - Bhaibhiri Idzva rechiShona bible

2 Vakorinde 4

¹Naizvozvo, Mwari, nenyasha dzake, zvaakatipa basa iri hatirasi mwoyo.

²Takasarudza kusamboita zvinhu zvinonyadzisa nezvomuchivandevande. Takaramba kuita zvoujarijari kana kushatisa shoko raMwari. Asi tinozviratidza zvatiri kuhana yomunhu wose zvake takamira pachokwadi chizere pamberi paMwari.

³Kunyange zvazvo Shoko redu Rakanaka rakafukidzwa, rakafukidzwa chete kuna vari kuparara.

⁴Pane zvaivava, mwari wapasi pano akapofomadza pfungwa dzavasingatendi kuti varege kuona mwenje weShoko Rakanaka rembiri yaKristu, iye akatodzana naMwari.

⁵Isu hatizviparidzi asi watinoparidza ndiJesu Kristu saTenzi, isu tiri varanda venyu pamusana paJesu,

⁶nokuti iye Mwari ndiye akati, “Chiedza ngachivheneke murima,” ndiye akavhenekawo mumwoyo yedu, kuti atipe mwenje woruzivo rwembiri yaMwari iri muuso hwaKristu.

⁷Asi upfumi uhu tinaho huri muhari dzevhu, kuratidza kuti simba ramasimba ose nderaMwari, kwete redu.

⁸Tinotambudzwa nenzira dzakasiyana — siyana asi hatishai pokupunyuka napo, tinoshaiswa mazano asi hatirasi mwoyo;

⁹tinoshushwa asi hatisiiwi tiri toga; tinorigirwa pasi asi hatiparadzwi.

¹⁰Tinogara takaberekana narwo rufu rwaJesu kuti upenyu hwaJesu huratidzwewo mumiviri yedu.

¹¹Paupenyu hwedu, tinogara takangotarisana narwo rufu pamusana paJesu kuti upenyu hwaJesu huratidzwe munyama yedu inofa.

¹²Naizvozvo, isu tinogara takafudzwa narwo rufu asi imi muri muupenyu.

¹³Zvino zvatino mweya mumwechetewo wechitendero wakanga uine uyo akanyora achiti, “Ndakatenda ndikataura, saizvozvo,” isuwo takatenda tinotaura saizvozvo

¹⁴tichiziva kuti iye akamutsa Tenzi Jesu achatimutsawo naJesu achizotiunza pamwechete nemi paari.

¹⁵Zvose izvi kuitira imi, kuti nyasha nokupararira kwadzinoita kuvanhu vakawanda kutendawo kuwande, kuti Mwari agorumbidzwa nazvo.

¹⁶Nezvo hatirasi mwoyo. Kunyange tavakuchembera, umunhu hwedu[3] hokunze; hwomukati huri kutovandudzwa zuva nezuva,

¹⁷nokuti tunhamo tunopera utwu, twuri kutigadzirira mbiri isingaperi, inoremerera, isina chokuienzanisa nacho.

¹⁸Chikonzero chacho ndechokuti ziso redu harisi pazvinhu zvinoonekwa asi kuzvinhu zvisingaonekwi nokuti zvinhu zvinoonekwa zvinopfuura asi zvinhu zvisingaonekwi zvinogara nokusingaperi.