Read Bhaibhiri Idzva rechiShona 2 Vakorinde 8 Bible Online

2 Vakorinde 8 - Bhaibhiri Idzva rechiShona bible

2 Vakorinde 8

¹Tingade kuti muzive, hama dzangu, nezvenyasha dzaMwari dzakaratidzwa mumasangano okuMasedhonia

²nokuti vakayedzwa zvinorwadza kwazvo asi mufaro wavo wakafashukira vakava vanamupanegombe[6] kunyange zvavo vakanga vava varombo vokupedzisira.

³Vakapa vakasununguka sokugona kwavo zvandingatopupurawo uye zvaitopfuura zvavaikwanisa

⁴vachititeterera kwazvo kuti vabatsire vatsvene.

⁵Izvozvo zvakanga zviri zvinhu zvatakanga tisingambotarisira asi vakatanga vazvipira kuna Mwari, mushure maizvozvo nokuda kwaMwari, vakazvipirawo kwatiri.

⁶Saizvozvo takakurudzira Titosi, somunhu akanga atanga basa iri rakanaka pakati penyu, kuti anofanira kuripedzisa.

⁷Zvino sezvo makabudirira zvikuru muzvinhu zvose izvi zvinoti: chitendero, kwouya kutaura zvakanaka kwoti ruzivo kwozoti shungu dzenyu huru dzokuda kubatsira uyezve rudo rwenyu kwatiri, chibudiriraiwo zvakanyanya pabasa iri renyasha.

⁸Handitauri izvi kwamuri somurau asi kuti neshungu dzavamwe ndizvionere kuti rudo rwenyu nderwe chokwadi here

⁹nokuti imi munoziva nyasha dzaTenzi wedu Jesu Kristu kuti kunyange akanga akapfuma asi akazova murombo nokuda kwenyu kuti nourombo hwake imi mugova vapfumi.

¹⁰Uye panezvizvi ndinokubairai zanhi ndichiti, zviri nani kwamuri kuti mupedzise zvamakatanga kuita gore rakapera, kusiri kungoita chete asi kuva nechido chokuzviita.

¹¹Zvino, chipedzisai basa iroro kuti kuripedzisa kwenyu kuenzane neshungu dzenyu dzokuda kuriita maererano nezvamunazvo.

¹²Kana chido chokupa chiripo, chipo chomunhu chinogamuchirika maererano nezvaanazvo, kwete maererano nezvaasina.

¹³Handisi kuti vamwe varerukirwe imi muchiremerwa

¹⁴asi kuti pave nokuenzana, panguva ino zvamuine zvakawanda movabatsirawo pavasina chokubata kudai, kuti ivo kana vava nezvakawanda imi musina pokubata vagokubatsiraiwo kuti pave nokuenzana.

¹⁵Sokunyorwa kwazvakaitwa zvichinzi uyo akakohwa zvakawanda haana kuva nezvakapfurikidza, uyowo akakohwa zvishoma haana chaakashaiwa.

¹⁶Mwari ngaatendwe akaita kuti Titosi ave nomwoyo wakaita sowangu pakuva nehanya nemi.

¹⁷Hakusiri kuti akanzwa chete chikumbiro changu asi kuti iye pachake aiva neshungu zvokuti iye pachezvake akada kuuya kwamuri.

¹⁸Tinomutuma nehama inozivikanwa pamasangano ose pamusoro pokuparidza kwake Shoko Rakanaka.

¹⁹Hazvisiri izvo zvoga, asi kuti akatosarudzwa namasangano kuti atiperekedze mubasa iri romwoyochena ratiri kuitira mbiri yaTenzi uyewo kuratidza mwoyo unoda.

²⁰Taichenjererawo kuti pasave naanotipa mhosva kuti tinobata sei chipo chakakura kudai.

²¹Chinangwa chacho chiri chokuti tiite zvinoremekedzwa kwete naTenzi chete asi kuti navanhuwo.

²²Pamwechete naivava tiri kutumira hama yedu yatakaedza kazhinji tikaona ari munhu ane chido chokuita zvinhu mune zvizhinji asi ava nechido chakatonyanya zvino kupfuura kare pamusana pokuvimba kukuru kwaanako nemi.

²³Kana zviri zvaTitosi, ndomumwe wangu, mushandipamwe neni mubasa ratinokuitirai, asi dzimwe hama idzi, inhumwa dzamasangano uye vanopa mbiri kuna Kristu.

²⁴Naizvozvo ratidzai masangano rudo rwenyu uye kuti isu tinodada nemi zvakadii kuvarume ava.