Read Bhaibhiri Idzva rechiShona Vagaratia 4 Bible Online

Vagaratia 4 - Bhaibhiri Idzva rechiShona bible

Vagaratia 4

¹Zvino ndinoti mugari wenhaka paanenge chete achiri mwana muduku, haana zvaanosiyana nomuranda nyangwe zvazvo ari iye muridzi wezvinhu zvenhaka zvose izvozvo.

²Asi achiri mumaoko avabereki navatariri kusvikira pazuva rakatarwa nababa.

³Ndizvozvowo zvinesu, pataiva vana vaduku takanga tiri varanda vemweya yomudenga'mu nezvapasi pano.

⁴Nguva payakakwana Mwari akatuma Mwanakomana wake akaberekwa nomukadzi. Akaberekwa ari pasi pomutemo

⁵kuti anunure vanhu vakanga vari pasi pomutemo kuti tiwane nhaka savana.

⁶Pamusana pokuti muri vana, Mwari akatuma Mweya woMwanakomana wake mumwoyo yedu watinokwanisa naye kudaidza tichiti, “Abha, Baba.”

⁷Nezvo nokuna Mwari, hauchisiri muranda, wava mwana. Zvino kana uri mwana naizvozvo uri mugari wenhaka.

⁸Kare pamakanga musingazivi Mwari maiva varanda vezvinhu zvisiri Mwari.

⁹Asi zvino, pamavakuzivana naMwari, kana kuti pamavakuzivikanwa naMwari, mungapindukire seizve kumweya yezvinhu zvisina simba uye isina chayo yamavakuda kuva varanda vayozve.

¹⁰Munochengeta mazuva makuru, nemwedzi nemwaka namakore.

¹¹Inga ndinokaronge ndakashandira pasina.

¹²Hama, ndinokukumbirisai kuti ivai sezvandiri nokuti iniwo ndakava sezvamuri. Imi hapana chamakanditadzira

¹³sezvamunongozivawo kuti pamusana pezvaindirwadza munyama'mu zvakaita kuti ndiparidze Shoko Rakanaka kwamuri pakutanga paya.

¹⁴Kunyange zvazvo zvandaiva chaiva chiedzo kwamuri, hamuna kundisema kana kundishora asi makatondigamuchira sokunge ndaiva mutumwa waMwari, saKristu Jesu.

¹⁵Ko kufara kwenyu kuyazve kuripi? Ndinokupupurirai kuti dai zvaikwanisika mungadai makatosvukunura maziso enyu muchiapa kwandiri.

¹⁶Ko zvino ndava muvengi wenyu pamusana pokukutaurirai chokwadi here?

¹⁷Vamwe vanhu vaya vanoratidza savanokudai kwazvo. Asi chinangwa chavo chaicho hachina kunaka. Chavari kungoda kukuparadzanisai neni kuti muvadewo ivo.

¹⁸Chinhu chakanaka nguva dzose kuva nechido chakakura kudaro kana chinangwa chacho chakanaka kwete kana ndiinemi chete.

¹⁹Vanangu, ndinorwadziwazve saamai vave panguva yokuda kusununguka kusvikira Jesu aumbwa mamuri.

²⁰Ndinodisa chaizvo kuti dai ndanga ndiinemi iye zvino. Ndaibva ndasandura maitiro andiri kuita, nokuti ndiri kushaya kuti ndokutaurirai ndichiti kudii.

²¹Ndiudzei, imi munoda kuva pasi pomutemo, hamunzwi here zvinorehwa nomutemo

²²nokuti zvakanyorwa kuti Abhurahamu akanga aina vanakomana vaviri. Mumwe akamubereka nomuranda, mumwe akamubereka nomudzimai asiri muranda.

²³Mwana womuranda akaberekwa sezvinongoitwawo chero munhu. Mwana womusununguki akaberekwa nokuda kwechitsidzo.

²⁴Zvino iri raiva dimikira. Vakadzi vaviri ava vanomirira zvitenderano zviviri. Chimwe chitenderano ndechokugomo reSinai chinobereka vana vouranda, ndiye Hagari.

²⁵Zvino Hagari ndiro gomo reSinai kuArabhia. Rinomirira guta reJerusaremu riripo nhasi uno nokuti riri muuranda pamwechete navana varo.

²⁶Asi guta reJerusaremu rokumusoro riri murusununguko uye ndiro amai vedu,

²⁷nokuti zvakanyorwa zvichinzi, “Fara zvako iwe mukadzi asina mbereko asingabereki, pururudza uchidaidzira kwazvo iwe usina kumbonzwa kurwadza kwemimba nokuti mukadzi akarambwa ana vana kupinda anomurume.”

²⁸Zvino, hama dzangu, isu, saIsaki tiri vana vechitsidzo.

²⁹Sapanguva iyoyo, uya akaberekwa maererano nenyama akatambudza uyo akaberekwa maererano naMweya. Ndizvozvo nanhasi.

³⁰Ko Magwaro Matsvene anoti kudiiko? Anoti dzinga mukadzi muranda nemwana wake nokuti mwana womuranda haafaniri kudya nhaka nomwana womukadzi wakasununguka.

³¹Saizvozvo, hama dzangu, hatisi vana vomukadzi muranda asi vomukadzi wakasununguka.