Read Bhaibhiri Idzva rechiShona Vaefeso 5 Bible Online

Vaefeso 5 - Bhaibhiri Idzva rechiShona bible

Vaefeso 5

¹Naizvozvo savana vaMwari vapamwoyo, tevedzai zvinoita Mwari.

²Garai upenyu hworudo sokutida kwakaita Kristu akazvipirira isu ari mupiro unonhuwirira nechibayiro kuna Mwari.

³Sechinhu chinokodzerana navatsvene, pakati penyu hapafaniri kana kudomwa zvako upombwe nezvinhu zvose zvakaora kana makaro.

⁴Ngaparege kuva nezvinhu zvisingakodzeri nezvetsvina zvose kana tunyaya tusina maturo kana kushaya hunhu asi chinofanira kuvapo kutenda. [6]

⁵Chamunofanira kuva nechokwadi nacho ndechichi chokuti hakuna anowana nhaka youmambo hwaKristu nohwaMwari kana ari mhombwe kana anoita zvakaora kana munhu ana makaro, iyeyo ndiye munhu anonamata mwari asiri iye.

⁶Musanyengedzwe nomunhu ana mazwi asina maturo nokuti pamusana paizvozvi Mwari anoitira hasha vanhu vasingateereri.

⁷Nezvo musafambidzane navo

⁸nokuti maimbova verima asi muna Tenzi mava vechiedza. Naizvozvo fambai savana vechiedza. (

⁹Muchero wechiedza [7] unowanikwa mune zvakanaka zvose nomune zvakarurama nezviri pachokwadi.)

¹⁰Edzai kudzidza zvinofadza Tenzi.

¹¹Musave nechii chokuita namabasa asina muchero erima asi imi afumurei

¹²nokuti zvinotonyadzisa kutaura zvinhu zvavanoita muchivande.

¹³Asi kana chinhu chose chaburitswa pachena nechiedza chinobva chaonekwa. Zvino, chinhu chinenge chavakuoneka chinobva chava chiedza.

¹⁴Ndokusaka zvichinzi; “Muka iwe uvete, muka muvakafa, Kristu achakuvhenekera.”

¹⁵Naizvozvo fambai makachenjera kwete savanhu vasina kungwara asi savanhu vakangwara.

¹⁶Nyatsoshandisai nguva yenyu nokuti kwaipa mazuva ano.

¹⁷Naizvozvo musave mazirema asi nzwisisai zvinoda Tenzi

¹⁸uye musararadze newaini nokuti unzenza hwakapfuuridza ihwohwo, asi ini zadzwai naMweya.

¹⁹Tauriranai muchiimbirana nziyo nedzimbo nezvimbo zvaMweya muchiimba muchiita mumhanzi kuna Tenzi nemwoyo yenyu yose

²⁰muchitenda Mwari Baba muzita raTenzi wedu Jesu Kristu nguva dzose uye muna zvose.

²¹Zviisei pasi pomumwe nomumwe wenyu pamusana pokuremekedza Kristu.

²²Imi vadzimai zviisei pasi pavarume venyu sokuna Tenzi

²³nokuti murume ndiye musoro womudzimai sezvakangoita Kristu ari musoro wesangano iro riri muviri wake uye iye ari mununuri waro.

²⁴Sangano sezvariri pasi paKristu, vadzimaiwo ngavave pasi pavarume vavo muna zvose.

²⁵Imi varume idai vadzimai venyu sokuda kwakaita Kristu sangano akazvipira

²⁶iye pamusana paro kuti ariite dzvene, mushure mokunge ari shambidza mumvura neshoko

²⁷kuti aritsvitse kwaari rakanaka kwazvo risina kana kavara kana pakaunyana kana chimwe chakadaro kuti rive dzvene risina chinoshoreka.

²⁸Saizvozvo varume vanofanira kuda vadzimai vavo sokuda kwavanoita miviri yavo. Munhu anoda mudzimai wake ari kutozvida iye pachake

²⁹nokuti hapana munhu anovenga muviri wake. Asi anotoupa chokudya nokunyatsouchengetedza sezvinoita Kristu kusangano.

³⁰Izvi pamusana pokuti tiri nhengo dzomuviri wake.

³¹Nokuda kwaizvozvi murume anosiya baba vake naamai vake achibatanidzwa nomudzimai wake. Vose vari vaviri vachiva nyama imwechete.

³²Ichi chinhu chikuru chakavandika. Ndiri kureva nezvaKristu nesangano.

³³Asi izvi zvinorevawo imi. Mumwe nomumwe wenyu ngaade mudzimai wake sokuzvida kwaanoita iye pachake. Mudzimai ngaaremekedzewo murume wake.