Read Bhaibhiri Idzva rechiShona Vaefeso 6 Bible Online

Vaefeso 6 - Bhaibhiri Idzva rechiShona bible

Vaefeso 6

¹Imi vana, teererai vabereki venyu muna Tenzi nokuti ndizvo zvakanaka.

²“Remekedza baba naamai vako.” Uyu ndiwo mutemo unotanga kutaura uine chitsidzo

³kuti zvikufambire zvakanaka uye kuti ugare nguva ndefu panyika.

⁴Imi vabereki musashatirise vana venyu asi vayarutsei mukuzvibata nechidzidziso chaTenzi.

⁵Imi varanda teererai vanatenzi venyu vapano pasi muchivaremekedza nokuvateerera zvakaperera sokunge muri kuzviitira Kristu

⁶kwete zvechipameso zvokufadza vanhu asi savaranda vaKristu muchiita zvinodiwa naMwari nomwoyo wose.

⁷Munofanira kuita basa renyu nechido sokunge muri kuriitira Tenzi kwete sokunge muri kuriitira vanhu.

⁸Zivai kuti munhu anoita zvakanaka achapiwa zvakanaka naTenzi kunyange ari muranda kana musununguki.

⁹Imi vana tenzi itaiwo zvimwechetezvo kwavari. Musavatyisidzire. Zivai kuti Tenzi wavo ari kudenga ndiye Tenzi wenyuwo uye kuti iye haana rusaruro.

¹⁰Pokupedzisira itosimbai muna Tenzi uye nokusimbarara kwesimba rake.

¹¹Pfekai zvose zvokurwisa nazvo zvaMwari kuti mukwanise kumirisana namazano akaipa aDhiabhori

¹²nokuti hatisi kurwisana navanhu asi nomweya ine ukuru ukuru, neino ushe nemweya inotonga pasi pose pano pane rima riripo iri uye tiri kurwisana nehondo nehondo dzomweya youipi iri mumatenga'mu.

¹³Naizvozvo torai zvose zvokurwisa nazvo zvaMwari kuti mukwanise kumira pazuva iroro rinenge rakaipa. Kana marwisa zvakaomarara zvazvo kudaro imi mucharamba makamira.

¹⁴Saizvozvo mirai makazvisunga zviuno zvenyu nechokwadi sebhande makapfeka demautare rapaditi rokururama.

¹⁵Mutsoka dzenyu pfekai shangu dzokuda kuparidza Shoko Rakanaka rorugare

¹⁶uyewo garai nguva dzose makabata nhoo yechitendero yamunogona kudzima nayo miseve yose yomoto yewakaipa.

¹⁷Dzikai mumusoro ruponeso senguwani muine bakatwa raMweya zvichireva Shoko raMwari.

¹⁸Namatai nguva dzose muina Mweya. Itai minamato nemikumbiro. Nechikonzero ichochi garai makangwaririra musingamborasa mwoyo muchikumbirira vatsvene vose.

¹⁹Ndikumbirireiwo ini kuti ndiwaniswe mashoko pandinenge ndave kuda kutaura kuti ndiparidze nechivindi chakavandika chiya chezveShoko Rakanaka

²⁰randiri nhume yaro iri muusungwa kuti ndiriparidze ndakashinga sezvandinofanira kuita.

²¹Zvino kuti imi muzivewo kuti ndakadii uye kuti ndiri kuitei, Tikikusi achakutaurirai zvose. Iye ihama yedu yapamwoyo uye mushandi wedu akatendeka muna Tenzi.

²²Ndamutumira ikoko nechikonzero ichochi kuti muzive kuti takadii kuno uye kuti akusimbaradzei mwoyo.

²³Hama Mwari Baba naTenzi Jesu Kristu ngaakuwanisei rugare norudo nechitendero.

²⁴Dai vose vanoda Tenzi Jesu Kristu norudo rusingaperi vangoitirwa nyasha.