Read Bhaibhiri Idzva rechiShona Vafiripi 2 Bible Online

Vafiripi 2 - Bhaibhiri Idzva rechiShona bible

Vafiripi 2

¹Zvino kana imi muine chinokukurudzirai muna Kristu, muine rudo runokugadzanisai mwoyo, muina Mweya uye muine rudo nomutsa,

²chiitai kuti ndinyatsofara nokuva nomwoyo mumwechete kwenyu muchidana zvimwechetezvo, muchinzwana muine mweya mumwechete.

³Musaite chii zvacho pamusana pokungozvifunga kana pamusana pokuzvikudza. Asi zvirerekei mutore vamwe savari nani kwamuri.

⁴Munhu ngaarege kungoisa ziso pane zvake chete asi ngaaite hanya nezvavamwe.

⁵Pakati penyu ivai nemwoyowo uyu mamuri waiva naKristu Jesu wokuti:

⁶Kunyange zvake akanga ari zvimwechetezvo naMwari, haana kuti ndoramba ndakangoomerana nokuenzana naMwari ikoko.

⁷Asi akazvidurura zvokuzvikwengura iye pachake akatora chimiro chomuranda akaberekwa akangoitawo zvakangoita vanhu.

⁸Ava munhu kudaro akazvidukupisa akateerera kudzamara pakufa, rufu rwomuchinjikwa.

⁹Naizvozvo Mwari akamusimudzirawo pamusorosoro akamupa zita rapamusorosoro kupfuura mazita ose;

¹⁰zvokuti kuremekedza zita raJesu, mabvi ose avari kudenga navari pasi pano navari pasi penyika, anofanira kumupfugamira

¹¹uye kuti rurimi rumwe norumwe rutaure pachena kuti Jesu ndiTenzi kuitira kuti Mwari Baba varumbidzwe.

¹²Naizvozvo hama dzangu dzadiwa, savanhu vanoteerera nguva dzose, nezvo nyatsoshandirai ruponeso rwenyu[4] muchitya uye muchidedera kwete kana ndiripo chete asi zvikuru kana ndisipo

¹³nokuti Mwari anoshanda mamuri kuti mude uye kuti mumushandire zvaanoda.

¹⁴Itai zvose musinganyunyuti kana kuita nharo

¹⁵kuti muve vanhu vasina mhosva vasina chakaipa pavari, vana vaMwari vasina chavanopomerwa mukati mechizvarwa chavanhu vakakombama, vakashata mamunopenya sezviedza panyika.

¹⁶Kubatisisa kwenyu shoko roupenyu ndiko kuchaita kuti ndizvikudze pazuva raKristu kuti handina kumhanyira pasina kana kushandira pasina.

¹⁷Kunyange zvazvo ndikadururwa somuteuro pamusoro pemupiro wechibayiro chechitendero chenyu ndinofara nokupembera pamwe nemi mose

¹⁸nemiwo munofanira kufara nokupembera pamwechete neni.

¹⁹Kana Tenzi Jesu ari mazviri, ndinotarisira kutuma Timoti kwamuri kuti ndifaranutswe kunzwa nezvenyu.

²⁰Handina mumwe ane mwoyo wakaita sowake, ane hanya chaidzo noupenyu hwenyu.

²¹Vose vari kungotsvaka zvavo bedzi, kwete zvaJesu Kristu.

²²Asi hunhu hwaTimoti munohuziva kuti akashanda neni pane zveShoko Rakanaka somwana nababa.

²³Naizvozvo ndinotarisira kumutumira kana ndangoona kuti zviri kundifambira sei.

²⁴Ndinovimba naTenzi kuti iyeni pachangu ndichauya nokukurumidza.

²⁵Ndinofunga kuti ndinofanira kutumira Epafurodhitosi, hama yangu nomushandipamwe neni, iye musoja pamwe neni. Ndiyewo mutumwa wenyu, kwandiri uye munhu anondibatsira mune zvandinoshaya.

²⁶Iye akanga achisuwira kwazvo kukuonai mose. Zvakamurwadza kwazvo kuti imi makanzwa kuti iye airwara.

²⁷Ichokwadiwo kuti airwara, zvokutoda kufa asi Mwari akamuitira tsitsi, kwete iye chete asi kana iniwo kuti ndirege kuva nenhamo pamusoro peimwe nhamo.

²⁸Nezvo ndinodisisa kwazvo kumutumira kuti mufare kwazvo kumuonazve uyewo kuti ndinge ndinoti gadzanei mwoyo.

²⁹Nezvo mugamuchirei nomufaro muna Tenzi. Remekedzai vanhu vakadai

³⁰nokuti akaisa upenyu rwake parumano zvokutoda kufira basa raKristu kuti andipe rubatsiro rwamakanga musingakwanisi kundipa.