Read Bhaibhiri Idzva rechiShona 1 Vatesaronika 4 Bible Online

1 Vatesaronika 4 - Bhaibhiri Idzva rechiShona bible

1 Vatesaronika 4

¹Pokupedzisira hama dzangu, isu muna Tenzi Jesu tinokukumbirai tichikukurudzirai kuti sokudzidza kwamakaita kwatiri, mugariro wamunofanira kuita, mufadze Mwari, sezvamuri kungoita. Itai saizvozvo zviri zvakatowandisisa.

²Imi munoziva zvatakakutaurirai musimba raTenzi Jesu.

³Izvi ndizvo zvinoda Mwari zvokuti imi muve vatsvene musiane noupombwe.

⁴Mumwe nomumwe wenyu ngaazive kuchengeta muviri wake[2] muutsvene nomukuuremekedza

⁵kwete nehavi dzomuviri dzoruchiva sezvinoita vechirudzi vasingazivi Mwari

⁶uye kuti panyaya iyoyi hapafaniri kuva nomunhu anonyengedza kana kukanganisira mumwe wake. Nokuti sezvatakambokuyambirai, Tenzi anotsividza mune zvose izvi, uye nokuti

⁷Mwari haana kutidaidzira zvetsvina izvi asi zvoutsvene.

⁸Naizvozvo munhu anoramba izvi haasi kuramba vanhu asi ari kuramba Mwari anopa Mweya Mutsvene wake kwamuri.

⁹Panyaya yorudo navamwe vanamati, hazvimboda kuti munhu akunyorerei, nokuti imi pachenyu makadzidziswa naMwari kudana.

¹⁰Ichokwadi kuti munoda vehama vose vari muMasedhonia yose asi chatinokukurudzirai, hama, kuita izvozvo zvakatowanda kwazvo

¹¹uye kuvavarira kugara upenyu hwenyu chinyararire, muzive zvenyu, muchizvishandira namaoko enyu sokukuudzai kwatakaita

¹²kuti vokunze vakuremekedzei murege kupona nokubatsirwa navo.

¹³Hama hatidi kuti munge musingazivi nezvavakafa kuti murege kusuwa sezvinoita vamwe vasina chitarisiro.

¹⁴Sezvatinotenda kuti Jesu akafa akamukazve saizvozvowo, nokuna Jesu, Mwari achadzosa pamwe naye vakafa.

¹⁵Izvi tinokutaurirai zviri pachena, iro ririwo shoko raTenzi kuti isu vapenyu, takasara kusvikira kuuya kwaTenzi, hatitangiri vaya varere

¹⁶nokutiwo Tenzi pachake achaburuka achibva kudenga pachidaidzirwa. Pachanzwika izwi romutumwa mukuru uye pacharira hwamanda yaMwari. Vakafa muna Kristu ndivo vachatanga kumuka.

¹⁷Zvino isu vapenyu takasara tichatorwa pamwechete navo tichiendeswa kumakore kundosangana naTenzi mumhepo. Naizvozvo ticharamba tiina Tenzi.

¹⁸Naizvozvo potai muchinyaradzana namashoko iwaya.