Read Bhaibhiri Idzva rechiShona Joshuwa 10 Bible Online

Joshuwa 10 - Bhaibhiri Idzva rechiShona bible

Joshuwa 10

¹Adhonizedheki mambo weJerusaremu akanzwawo kuti Joshuwa akatora guta reAi rikava mumaoko ake, uye kuti akanga anyatsoriparadza achinzwawo kuti Joshuwa akaita kuguta reAi namambo waro zvaakanga aita kuguta reJeriko namambo waro. Akanzwawo kuti vanhu vokuGibheoni vakanga vava kutowirirana zvavo navaIsiraeri uye kuti vava kutogarisana navo savavakidzani.

²Zvakamutyisa zvikuru nokuti guta reGibheoni raiva guta guru kwazvo, rakatoita seguta guru ramambo, rakakura zvokupfuura guta reAi. Varume vose vomo vakanga vari mvumba chaidzo dzokurwa hondo.

³Naizvozvo Adhonizedheki mambo weJerusaremu akatuma nhume kuna Hohamu, mambo weHebhuroni, nokuna Piramu, mambo weJarimuti, nokuna Jafia, mambo weRakishi, nokuna Dhebhiri, mambo weEgironi achiti,

⁴“Uyai muzondibatsirawo tirwise guta reGibheoni nokuti rakatowirirana zvaro naJoshuwa navaIsiraeri.”

⁵Madzimambo mashanu iwaya avaAmori aiti mambo weJerusaremu namambo weHebhuroni, namambo weJarimuti namambo weRakishi namambo weEgironi vakaunganidzana ndokukwira nehondo dzavo dzose kundokomberana kurwisa guta reGibheoni.

⁶Vanhu vokuGibheoni vakatuma nhume kuna Joshuwa kuGirigari kwavakanga vakadzika matendhe vachiti, “Matiregerera kuno isu varanda venyu. Uyai kuno nokukurumidza muzotinunura, mutibatsirewo nokuti madzimambo ose avaAmori vanogara munyika yamakomo vakokorodzana kuzotirwisa.”

⁷Joshuwa akabva kuGirigari akakwira ikoko. Akaendako nehondo yake yose, varume vose vaya vaiva mvumba dzokurwa hondo.

⁸Tenzi akati kuna Joshuwa, “Usambovatya zvako nokuti ndatovaisa mumaoko ako. Hakuna nomumwe wavo achagona kumirisana newe.”

⁹Joshuwa akaerekana ati pfacha kusvika pavari, avavinga kubva kuGirigari nousiku.

¹⁰Tenzi akavapinza mweya wokutya vaIsiraeri. VaIsiraeri vakavaita murakatira kuuraya paGibheoni ipapo vakavadzingirira kusvikira kumukwidza weBhetihoroni vachingovakatakazha kudzamara vasvika kuAzeka nokuMakedha.

¹¹Pavaingunotiza vaIsiraeri kudai, voteremuka zvino nomutenure weBhetihoroni, Tenzi akanayisa mhitsa dzechivhuramahwe pavari kusvikira kuAzeka, vakafa. Vanhu vakaurayiwa nechivhuramahwe ichi vakanga vakawanda kupfuura vanhu vakaurayiwa navaIsiraeri namapakatwa.

¹²Pazuva iroro rakaiswa vaAmori mumaoko avaIsiraeri naTenzi, Joshuwa akataurira Tenzi vaIsiraeri vachinzwa achiti, “Iwe zuva pano paGibheoni iti mbikiti kumira, newe mwedzi iti ndi kumira padunhu rino reAjaroti.

¹³Zuva rakati mbikiti kumirapo. Mwedzi ukatiwo ndi kumira kusvikira vaIsiraeri vapedza vavengi vavo kutsividza.” Handiti izvozvi zvakanyorwa muBhuku raJashari here? Zuva rakaramba rakati mbikiti panguva yarinorova nhongonya, rikarega kukurumidza kudoka, kwezuva rose.

¹⁴Hakuna kumbova nezuva rakadai kubvira pasi chigare kana shure kwaizvozvo rokuti Tenzi akateerera munhu, nokuti Tenzi akarwira vaIsiraeri.

¹⁵Joshuwa akadzokera zvake navaIsiraeri vose vaaiva navo kumatendhe kuGirigari.

¹⁶Madzimambo iwayo mashanu akatiza akandohwanda mubako rokuMakedha.

¹⁷Joshuwa akaudzwa kuti, “Madzimambo mashanu aya awanikwa akahwanda mubako rokuMakedha.”

¹⁸Joshuwa akati, “Kungurutsirai mabwe makuru pamuromo webako iroro, mugoisa vanhu vanogaririra ipapo.

¹⁹Asi imi pachenyu regai kumirapo, rondai vavengi venyu, vateverei muchivarwisa, vanenge vasarira muchiuraya, musavarege vachindopinda mumaguta avo nokuti Tenzi Mwari wenyu avaisa mumaoko enyu.”

²⁰Kuzoti Joshuwa navaIsiraeri vapedza kuvauraya vachivaita murakatira kusvikira vanhu ava vaparadzwa, uye kusvikira chitsama chakasara chandopinda mumaguta akanga aine tsvingo,

²¹vanhu vose vakadzokera zvakanakanaka kuna Joshuwa kumatendhe avo kuMakedha. Hakuna kuwanika munhu ane chaakati bufu kuvaIsiraeri.

²²Joshuwa akati, “Chizarurai bako muburitse madzimambo mashanu aya, muuye navo kwandiri.”

²³Vanhu vakaita izvozvo, vakaunza kwaari madzimambo mashanu aya kubva mubako aiti mambo weJerusaremu namambo weHebhuroni, namambo weJarimuti namambo weRakishi namambo weEgironi.

²⁴Pavakaburitsa madzimambo aya vakauya navo kuna Joshuwa. Joshuwa akadaidza vaIsiraeri vose akati kuvakuru vakuru vose vehondo vaakanga aenda navo, “Uyai pano mutsike netsoka dzenyu mutsipa yamadzimambo iwaya.” Vakauya vakatsika mitsipa yamadzimambo aya.

²⁵Joshuwa akati kwavari, “Musatye zvenyu kana kuzeza, shingai mutsunge mwoyo nokuti ndizvo zvichaita Tenzi kuvavengi venyu vose vamucharwisa.”

²⁶Joshuwa akabva avaponda vakafa akavasungirira mumiti mishanu. Vakaswera vakaremberapo kusvikira manheru.

²⁷Kuzoti zuva rodoka Joshuwa akati vatururwe pamuti paya ndokuvakanda mubako muya mavakanga vahwanda ndokuisa mabwe pamuromo waro achiripo kusvikira pari nhasi.

²⁸Pamusi iwoyo Joshuwa akatora guta reMakedha rikava mumaoko ake. Akariparadza nebakatwa, iro namambo waro. Akanyatsoparadza vanhu vose zvavo vakanga varimo. Hapana kana munhu mumwechete waakasiyamo. Akaita kuna mambo weMakedha zvaakaita kuna mambo weJeriko.

²⁹Joshuwa akabva kuMakedha navaIsiraeri vose vaaiva navo akaenda kuguta reRibhuna, akarirwisa.

³⁰Tenzi akaisawo guta iroro namambo waro mumaoko avaIsiraeri. Vakauraya vanhu vaivamo vose zvavo namapakatwa. Hapana kana munhu mumwechete wavakasiyamo. Vakaita kuna mambo waro sezvavakanga vaita kuna mambo weJeriko.

³¹Joshuwa akabva kuRibhuna navaIsiraeri vose vaaiva navo akadimura oenda kuguta reRakishi. Vakarikomba vakarirwisa.

³²Tenzi akaisa guta reRakishi mumaoko avaIsiraeri. Vakaritora pazuva rechipiri, vakaparadza guta iroro vakauraya vanhu vaivamo vose zvavo namapakatwa sezvavakaita kuguta reRibhuna.

³³Horamu mambo weguta reGezeru akauya kuzobatsira vokuRakishi. Joshuwa akamuuraya, iye navanhu vake, kusara pasisina asara.

³⁴Joshuwa akabva kuRakishi navaIsiraeri vose vaaiva navo akadimura oenda kuguta reEgironi. Vakarikomba, vachirirwisa.

³⁵Musi iwoyo vakaritora rikava mumaoko avo. Vakaparadza guta iri vakanyatsouraya nebakatwa vanhu vaivamo vose zvavo musi wakarewo sezvavakaita kuguta reRakishi.

³⁶Joshuwa akabva kuEgironi navaIsiraeri vose vaaiva navo vakaenda kuguta reHebhuroni, vakabva varirwisa.

³⁷Vakaritora rikava mumaoko avo. Vakaparadza guta iroro nebakatwa namambo waro nemisha yaro. Vakauraya munhu wose akanga arimo. Hapana kana munhu mumwechete zvake wavakasiyamo. Vakanyatsoriparadza vakauraya munhu wose zvake akanga arimo sezvavakaita kuguta reEgironi.

³⁸Joshuwa akadzokera navaIsiraeri vose vaaiva navo kuDhebhiri, vakarirwisa.

³⁹Vakaritora rikava mumaoko avo, iro namambo waro nemisha yaro yose. Vakauraya namapakatwa vanhu vaivamo vakanyatsouraya vanhu vose vaivamo. Hapana wavakasiyamo. Zvavakaita kuguta reHebhuroni namambo waro ndozvavakaitawo guta reDhebhiri namambo waro.

⁴⁰Saka Joshuwa akakurira nyika yose zvayo inoti: nyika yamakomo neNegevhu nenyika yokumanhika namateru ayo. Akakurirawo madzimambo ose enyika idzodzo. Hapana kana munhu mumwechete zvake waakasiya, asi akatouraya vose zvokusambosiya kana chinhu chipenyu zvacho, sokureva kwakaita Tenzi Mwari wavaIsiraeri.

⁴¹Joshuwa akakurira vanhu kubvira kuKadheshibharinea zvichienda nokuGaza nenyika yose yeGosheni kusvikira kuGibheoni.

⁴²Joshuwa akakurira madzimambo ose iwaya, nyika dzawo dzikava mumaoko ake nenguva imwecheteyo nokuti Tenzi Mwari wavaIsiraeri, aivarwira.

⁴³Joshuwa akazodzokera navaIsiraeri vaaiva navo kwavakanga vakadzika matendhe kuGirigari.