Read Bhaibhiri Idzva rechiShona Joshuwa 13 Bible Online

Joshuwa 13 - Bhaibhiri Idzva rechiShona bible

Joshuwa 13

¹Zvino Joshuwa akanga akwegura zvokunyatsochemberawo, Tenzi ndokumutaurira achiti, “Wakwegura, makore ako oupenyu ayendedzana, asi kuchine nyika huru kwazvo yokutora kuti ive yenyu.

²Kuchine nyika huru yamusati matora: kunoti matunhu ose zvawo avaFirisitia, nenyika yose yavaGeshuri namatunhu ose avaGeshuri,

³(zvichitangira kuShihori kumabvazuva kweIjipiti kusvikira kuchamhembe kumuganho weEkironi, inonzi ndeyevaKanani. Kune vatongi vashanu vechiFirisitia vanoti wokuGaza nowokuAshidhodhi nowokuAshikeroni nowokuGati nowokuEkironi navaAvhimu.)

⁴Kumaodzenyemba, inotangira kunyika yavaKanani yose zvichienda nokuMeara kunyika yavaSidhoni kusvikira kuApeki kumuganhu wavaAmori.

⁵Kwouya nyika yavaGebaru nenyika yeRebhanoni mujinga megomo reHerimoni kudzamara toda kupinda muHamati,

⁶vanhu vose zvavo vomunyika yemakomo kubvira kuRebhanoni kusvikira kuMisirefotimaimu kunyangewo nevaSidhoni vose zvavo. Ini pachangu ndichadzingira vaIsiraeri vanhu ivavo chako iwe chete govanisa vaIsiraeri nyika iyi senhaka, sezvandakakuudza.

⁷Saka chigovera nyika iyoyi madzinza mapfumbamwe nechikamu chevedzinza raManase senhaka yavo.”

⁸Vedzinza raRubheni nerokwaGadhi nechimwe chikamu chevedzinza raManase, vanotova kare nenhaka yavo yavakapiwa naMosesi kumhiri kwaJorodhani kumabvazuva, sokupiwa kwavakaitwa naiye Mosesi muranda waTenzi.

⁹Kubvira kuguta reAroeru kumucheto webani raArinoni, neguta riri pakati pebani renyika yakatumhumara yeMadhebha zvichienda nokuDhibhoni,

¹⁰namaguta ose aSihoni mambo wavaAmori aitonga kuHeshibhoni ichindosvika kumuganhu navaAmori.

¹¹Akavapawo nyika yeGireadhi namatunhu ose avaGeshuri neavaMaaka, nokugomo reHerimoni kwose, nenyika yeBhashani yose zvichisvika kuSareka,

¹²nyika yose zvayo yamambo Ogu kuBhashani aimbotonga Ashitaroti neEdhirei. (Iyeyu ndiye aiva hofori imwechete yechiRefaimu yakanga yasara.) Mosesi akakurira ivava akaavadzingamo.

¹³VaIsiraeri havana kudzingamo vaGeshuri navaMaaka, asi kutoti vokwaGeshuri novokwaMaaka vagere pakati pavaIsiraeri kusvikira pari nhasi.

¹⁴Dzinza raRevhi chete ndiro risina kupiwa nhaka naMosesi nokuti mipiro inopirwa kuna Tenzi, Mwari waIsiraeri ichiita zvokupiswa nomoto ndiyo nhaka yaro sokuudzwa kwaakaitwa.

¹⁵Mosesi akagovera vedzinza rokwaRubheni nhaka yemhuri dzavo.

¹⁶Kubvira kuAroero pamucheto webani raArinoni ichibvira muguta riri pakati pebani, nenyika yose yakatunhumara yokuMedhebha

¹⁷zvichienda kuHeshibhoni namaguta ose omunyika yakatunhumara aya anoti: Dhibhoni neBhamotibhaari neBhetibhaarimeoni

¹⁸neJahazi neKedhimoti neMefaati

¹⁹neKiriataimu neSibhuma neZeredhishahari riri pachikomo chomubani chiya,

²⁰neBhetipeori nemateru okubva mujinga megomo rePisiga neBhetijeshimoti,

²¹zvichireva kuti maguta ose zvawo omunyika yakatunhumara, nenyika yose yaSihoni mambo wavaAmori aitonga kuHeshibhoni uya wokukundwa naMosesi pamwechete navatungamiriri vavaMidhiani vanaEvhi naRekemu naZuru naHuru naRebha, vakanga vari madzishe aiva pasi pamambo Sihoni, vachigara munyika iyoyo.

²²Bhiriamu mwanakomana waBheori uya aiita maminimini uya akaurayiwawo navaIsiraeri pamwechete navamwe vavakauraya namapakatwa.

²³Saka nyika yevedzinza rokwaRubheni yaindosvika muna Jorodhani ndiwo waiva muganhu wavo. Maguta iwaya nemisha yawo ndiyo yaiva nhaka yevedzinza rokwaRubheni irori nemhuri dzavo.

²⁴Mosesi akagoverawo vedzinza rokwaGadhi nhaka yemhuri dzavo.

²⁵Nyika yavo yaiva yeGazeri zvichienda nokumaguta ose omuGireadhi nechidimbu chenyika yevaAmoni ichisvika kuAroeru kumabvazuva eRabha.

²⁶Yaibvirawo kuHeshibhoni kundosvika kuRamatimizipe nokuBetonimu, ichibvirawo kuMahanaimu kusvikira kunyika yaDhebhiri

²⁷zvichienda nokubani kuBhetiharamu nokuBhetinimura nokuSukoti nokuZafoni ndochimwewo chidimbu chenyika yaSihoni mambo weHeshibhoni, Jorodhani ruriwo muganhu wenyika yacho inosvika kumahombekombe egungwa reKinereti kumabvazuva kumhiri kwaJorodhani.

²⁸Maguta iwaya nemisha iyi ndiyo yaiva nhaka yevedzinza rokwaGadhi nemhuri dzavo.

²⁹Mosesi akagovera nhaka kune chimwe chikamu chevedzinza rokwaManase. Akapa nhaka iyi kune chikamu ichi chevedzinza raManase nemhuri dzavo.

³⁰Nyika yavo yaibvira kuMahanaimu zvichienda nokuBhashani kwose zvako, zvichireva kuti nyika yose zvayo yaOgu mambo weBhashani, namaguta ose aJairi omuBhashani, ose pamwechete aiva makumi matanhatu amaguta,

³¹kwouya chidimbu chenyika yeGireadhi neguta reAshitaroti nereEdhirei, maguta omunyika yaOgu yeBhashani, ndozvechikamu chemhuri dzokwaMakiri mwanakomana waManase.

³²Ndidzodzi nhaka dzakagoverwa naMosesi mumapani eMoabhu kumhiri kwaJorodhani nechokumabvazuva kweJeriko.

³³Asi Mosesi haana kugovera vedzinza rokwaRevhi nhaka, Tenzi Mwari wavaIsiraeri ndonhaka yavo, sezvaakavaudza.