Read Bhaibhiri Idzva rechiShona Joshuwa 15 Bible Online

Joshuwa 15 - Bhaibhiri Idzva rechiShona bible

Joshuwa 15

¹Nyika yakagoverwa vedzinza rokwaJudha nemhuri dzavo yakanga yakamira yakadai: Kumaodzanyemba kwokupedzesera chaiko yaindosvika kumuganhu neEdhomu, kurenje reZini.

²Muganhu wayo wokumaodzanyemba ikoko waitangira kumahombekombe kwegungwa roMunyu, mahombekombe eko okumaodzanyemba.

³Woenda wakananga kumaodzanyemba kwemukwidza weAkirabhimu wopfuura wosvika kuZini, wokwidza wakananga kumaodzanyemba kweKadheshibharinea. Wonopfuura nokuHezironi wosvika kuAdhari, wopoterera nokuKarika,

⁴wozondosvika kuAzimoni, wotevedza Kakova keIjipiti kusvikira kwakanodira kugungwa reMedhiterenieni uko.[5] Ndomuganhu wenyu[6] wokumaodzanyemba.

⁵Muganhu wayo wokumabvazuva igungwa roMunyu, kunosvika kumadiro aJorodhani. Kuchamhembe, muganhu wayo unotangira kumahombekombe kwegungwa iroro pamadiro aJorodhani,

⁶wokwira nokuBhetihogira wopfuura nechokuchamhembe kweBhetiarabha kusvikira paDombo raBhohani mwanakomana wokwaRubheni.

⁷Muganhu wacho wozobvira ipapo mubani reAkori wokwidza wakananga kuDhebhiri uchienda kuchamhembe wakananga nechekuGirigari wakatarisana nomukwidza weAdhumimu uri kumaodzanyemba kwebani iroro. Muganhu iwoyu waizopfuura woenda kubani remvura yeEnishemeshi uchindosvika kuEnirogeri.

⁸Muganhu uyu waikwidza uchibva ipapo wakananga kubani romwanakomana waHinomu uchipfuura napamateru okumaodzanyemba kweguta reJebhusi ndiro Jerusaremu, wokwidza napamusoro pegomo rakavambirana nebani iri rokwaHinomu nechokumadokero, kusvikira kumucheto wokuchamhembe webani rokuvaRefaimu.

⁹Muganhu iwoyo unozobvira pamusoro pegomo iroro wakananga kukasipiti keNafutoa, wokwidza kumaguta okugomo reEfuroni wonanga nokuguta reBhaara ndiro Kiriatijearimu.

¹⁰Muganhu iwoyu waizobva kuBhaara wopindukira kumadokero, wakananga kugomo reSeiri uchipfuura nokumawere okuchamhembe kwegomo reJearimu ndiro Kesaroni wodzika nokuBhetishemeshi uchipfuura nokuTimuna.

¹¹Muganhu iwoyu waizoenda nokumawere echikomo chiri kuchamhembe kweEkironi wopinduka wonanga kuShikeroni wopfuura wakananga kugomo reBhaara wosvika kuJabhuneeri wondogumira kugungwa.

¹²Muganhu wayo wokumadokero iGungwa guru namahombekombe aro. Iyoyi ndiyo miganhu yakapoteredza vemhuri dzokwaJudha.

¹³Mukati mevedzinza rokwaJudha, Joshuwa akapa Karebhu mwanakomana waJefune guta reKiriatiaribha, ndirowo reHebhuroni, sokuudzwa kwaakaitwa naTenzi. (Aribha iyeyu aiva baba waAnaki.)

¹⁴Karebhu akadzingamo vanakomana vavaAnaki vatatu ava vanoti: Sheshai naAhimani naTarimai munyika yavo.

¹⁵Achibva ipapo akandorwisa vagari vokuDhebhiri. Kare guta reDhebhiri raimbonzi Kiriatiseferi.

¹⁶Karebhu akati, “Anenge andorwisa akakurira guta reKiriatisefari ndichamupa Akesa mwanasikana wangu kuti ave mukadzi wake.”

¹⁷Otinieri mwanakomana waKenazi munun'na waKarebhu akandorikurira. Ndokubvawo amupawo mwanasikana wake kuti ave mukadzi wake.

¹⁸Akesa paakauya kwaari akamukurudzira kuti akumbire baba vake munda. Akesa akaburuka padhongi rake. Karebhu ndokumubvunza achiti, “Unodeiko mwanangu?”

¹⁹Iye ndokupindura achiti, “Zvamakandipa nyika yokuNegevhu, ndiitireiwo mwoyochena mundipewo nezvisipiti zvemvura.” Karebhu ndokumupa zvisipiti zvoko zvokumusoro nezvisipiti zvoko zvezasi.

²⁰Ino iyi ndiyo nhaka yevedzinza rokwaJudha nemhuri dzavo.

²¹Maguta evedzinza rokwaJudha, kumaodzanyemba takananga kumuganhu neEdhomu ndeaya: Kwaiti guta reKabhuzeeri neEdheru neJaguri,

²²neKina neDhimona neAdhadha,

²³neKedheshi neHazori neItinani,

²⁴kwouya Zifu neTeremu neBhearoti,

²⁵neHazorihadatita neKiriatihezironi, kana kuti Hazori.

²⁶Kwouyawo reAmamu neShema neMoradha,

²⁷neHazarigadha neHeshmoni neBhetipereti,

²⁸neHazarishuari neBheerishebha, neBhiziotia

²⁹neBhaara neIimu neEzemu,

³⁰kwoti Eritoradhi neKesiru neHoruma,

³¹neZikiragu neMadhimana neSanisana,

³²kwozoti Rebhaoti neShirihimu neAini neRimoni, ose pamwechete aiva makumi maviri amaguta ana maguta mapfumbamwe ane misha yawo.

³³Maguta okunyika yokumanhika ndeaya: kwaiti guta reEshitaori neZora neAshina,

³⁴neZanoa neEniganimu neTapua neEnamu,

³⁵kwoti Jarimuti neAdhuramu neSoko neAzeka,

³⁶neSharaimu neAdhitiaimu neGedhara neGedherotiaimu, ose pamwechete aiva maguta gumi namana ane misha yawo.

³⁷Kuchitiwo reZenani neHadhasha neMigidharigadhi,

³⁸neDhireani neMizipe neJoktieeri,

³⁹kukati Rakishi neBhozikati neEgironi,

⁴⁰neKabhoni neRahimasi neKitishi,

⁴¹kwouya Gedheroti neBhetidhagoni neNaama neMakedha, ose pamwechete aiva maguta gumi namatanhatu ane misha yawo.

⁴²Kwouyawo guta reRibhuna neEteri neAshani,

⁴³nereIfuta neAshina nereNezibhu,

⁴⁴neKeira neAkizibhu neMaresha, ose pamwechete aiva maguta mapfumbamwe ane misha yawo.

⁴⁵Kwaizoti Ekironi notumaguta twaro nemisha yaro yaibvira kuEkironi kusvikira kugungwa,

⁴⁶neose zvawo aiva pedyo neguta reAshidhodhi nemisha yawo.

⁴⁷Iro Ashidhodhi notumaguta twaro nemisha yaro, neGaza notumaguta twaro nemisha yaro kusvikira kukakova keIjipiti nekumahombekombe kwegungwa Guru.

⁴⁸Kwozotiwo omunyika yemakomo aiti: guta reShamiri neJatiri neSoko

⁴⁹neDhana neKiriatisana, ndiro Dhebhiri,

⁵⁰kwotiwo Anabhu neEshitemo neAnimu,

⁵¹neGosheni neHoroni neGiro ose pamwechete aiva maguta gumi nerimwechete aine misha yawo.

⁵²Kwouyawo Arabhu neDhuma neEshani,

⁵³neJanimu neBhetitapua neAfeka neHumuta,

⁵⁴neKiriatiaribha ndiro Hebhuroni, neZiori ose pamwechete aiva maguta mapfumbamwe aine misha yawo.

⁵⁵Kwochiti Maoni neKarimeri neZifu neJuta,

⁵⁶neJezireeri neJokidheamu neZanoa,

⁵⁷neKaini neGibhea neTimuna ose pamwechete aiva maguta gumi aine misha yawo.

⁵⁸Kuchizoti Harihuru neBhetizuru neGedhori,

⁵⁹neMaarati neBhetianoti neEritekoni, ose pamwechete aiva maguta matanhatu ane misha yawo.

⁶⁰Ndokuzouya reKiriatibhaari, ndiro Kiriatijearimu, kwoti reRabha aya aiva maguta maviri aine misha yawo.

⁶¹Ndokuzotiwo maguta okurenje aiti Bhetiarabha neMidhini neSekaka

⁶²neNibhushani rainziwo, “Guta roMunyu neguta reEnigedhi,” ose pamwechete aiva maguta matanhatu aine misha yawo.

⁶³Vedzinza rokwaJudha havana kukwanisa kudzinga vaJebhusi vagari vomuJerusaremu. Saka vaJebhusi ivava vagere nevokwaJudha muJerusaremu kusvikira pari nhasi.