Read Bhaibhiri Idzva rechiShona Joshuwa 18 Bible Online

Joshuwa 18 - Bhaibhiri Idzva rechiShona bible

Joshuwa 18

¹Zvino gungano rose ravaIsiraeri rakaungana kuShiro, rikadzika tendhe rokusanganira ikoko, nyika iyoyo yakanga yatova mumaoko avo.

²Asi kwakange kuchine madzinza manomwe avaIsiraeri akanga asati atora nyika yawo yenhaka.

³Joshuwa akataurira vaIsiraeri achiti, “Kusvikira riniko muchingoverengera kudai, musingandotora nyika iyi yamakapiwa naTenzi Mwari wamadzibaba enyu kuti ive yenyu?

⁴Ndipei varume vatatu vatatu padzinza ndivatume kuti vasimuke vandomema nyika iyi yose, vanyore vachiitsanangudza maererano nenhaka ichava yedzinza nedzinza, vozodzokera kuno kwandiri.

⁵Ngavaikamure muzvikamu zvinomwe. VokwaJudha ngavarambe vari kumaodzanyemba, vokwaJosefiwo vari kwavo kuchamhembe.

⁶Munonyora muchitsanangudza zvikamu izvozvo zvinomwe mouya nazvo kuno kwandiri, ndikuitirei chin'ange pana Tenzi, Mwari wedu.

⁷Asi vaRevhi havana mugove wenyika wavanowana pakati penyu nokuti upristi hwaTenzi ndonhaka yavo. Kana vari vokwaGadhi nevokwaRubheni nechimwe chikamu chevokwaManase vakatogoverwa kare nhaka yavo naMosesi muranda waTenzi, kumabvazuva kumhiri kwaJorodhani.”

⁸Varume vokundomema nyika vakasimuka vakapinda munzira. Joshuwa akavakomera achiti, “Chiendai mufambe nyika yose iyoyo muchiimema, muchinyora mamiriro ayakaita mugozodzoka kuno kwandiri ndikuitirei chin'ange pano paShiro pana Tenzi.”

⁹Saka varume ava vakaenda, vakafamba nyika yose iyoyo vachiimema, vachinyora mubhuku mamiriro ayakaita, guta neguta. Vakaiisa muzvikamu zvinomwe, ndokudzokera kwaiva naJoshuwa kumatendhe kuShiro.

¹⁰Joshuwa akavaitira chin'ange chiya kuShiro pana Tenzi, akagovera vaIsiraeri nyika ipapo achipa dzinza nedzinza nyika yaro.

¹¹Mugove wakapiwa vedzinza rokwaBhenjamini mhuri nemhuri ndiwo wakatanga kubuda pachin'ange. Vakagoverwa nyika iri pakati penyika yedzinza rokwaJudha neyedzinza rokwaJosefi.

¹²Muganhu wayo wokuchamhembe waibvira muna Jorodhani woenda nokumateru okuchamhembe kweJeriko. Hoyo wokwidza nomunyika yemakomo nechokumadokero kusvikira kurenje reBhetiavheni.

¹³Waizobva ipapo wakananga kumateru okumaodzanyemba kweguta reRuzi ravakunzi Bhetieri wodzika wakananga kuAtarotiadhori pamakomo okumaodzanyemba kweBhetihoroni yezasi.

¹⁴Muganhu wayo wokumadokero unotangira pachikomo chakatarisana neguta reBhetihoroni chiri kumaodzanyemba kwaro. Wozobvapo wakananga kumaodzanyemba kusvikira, kuKiriatibhaari ndiro guta reKiriatijearimu, guta revedzinza rokwaJudha. Iwoyu ndomuganhu wayo wokumadokero.

¹⁵Muganhu wayo wokumaodzanyemba waibvira kunoperera guta reKiriatijearimu wombonanga kumadokero wosvika kutsime remvura reNefutoa.

¹⁶Waizondosvika mujinga megomo rakatarisana nebani romwanakomana waHinomu kuchamhembe kwebani ravaRefaimu. Waizoti tande nebani iroro wopfuura nokumateru okumaodzanyemba kwavaJebhusi uchidzika kusvikira kuEnirogeri.

¹⁷Waibva ipapo wonanga kuchamhembe kusvika kuEnishemeshi, woramba uchienda kudzamara wasvika kuGeriroti rakatarisana nomupata weAdhumimu, wozondosvika kuDombo raBhohani mwanakomana waRubheni.

¹⁸Muganhu iwoyu unopfuura wakananga kumateru okuchamhembe kweBhetiarabha, kusvikira kunyika yeArabha.

¹⁹Waizopfuurapo wakananga kumateru okuchamhembe kweguta reBhetihogira, wondosvika kumahombekombe okuchamhembe kwegungwa roMunyu, kumaodzanyemba kwaJorodhani pamadiro arwo. Iwoyu ndomuganhu wayo wokumaodzanyemba.

²⁰Rwizi rwaJorodhani ndiwo munganhu wayo wokumabvazuva. Iyoyi ndiyo nhaka yemhuri yedzinza rokwaBenjamini mhuri nemhuri nemiganhu yayo kumativi ose.

²¹Maguta evedzedzinza rokwaBhenjamini mhuri nemhuri ndiwo aya. Kunoti guta reJeriko neBhetihogira neEmekikezizi,

²²neBhetiarabha neZemaraimu neBhetieri,

²³neAvhimu nePara neOfura,

²⁴neKefariamoni neOfuni neGebha, ose pamwechete aiva maguta gumi namaviri nemisha yawo;

²⁵kwouya reGibheoni neRama neBheeroti,

²⁶neMizipa neKefira neMoza,

²⁷neRekemu neIripeeri neTarara neZera;

²⁸Kwozoti guta reZera neHaerefu neJebhusi rakazonzi Jerusaremu, ndokuzouya guta reGibhea neKiriatijearimu. Ose pamwechete aiva gumi ramaguta rina maguta mana. Iyoyi ndiyo nhaka yemhuri dzedzinza rokwaBhenjamini.