Read Bhaibhiri Idzva rechiShona Joshuwa 21 Bible Online

Joshuwa 21 - Bhaibhiri Idzva rechiShona bible

Joshuwa 21

¹Vakuru vakuru vemhuri dzokwaRevhi vakaenda kune vanhu ava vanoti; mupristi Ereazari naJoshuwa mwanakomana waNuni navakuru vakuru vemhuri dzavaIsiraeri.

²Vakataura navo vari kuShiro munyika yeKanani vachiti, “Tenzi akaudza Mosesi kuti isu tinofanira kupiwa maguta okugara ana mafuro emombe dzedu.”

³Saka sokutaura kwaTenzi vaIsiraeri vakapa vaRevhi nhaka yavo yamaguta ano aya namafuro awo.

⁴Mugove wakagoverwa vokwaKohati mhuri nemhuri ndiwo wakatanga kubuda pachin'ange. Saka vaRevhi vemba yomupristi Aroni vakapiwa maguta gumi namatatu omudzinza rokwaJudha nerokwaSimeoni nerokwaBhenjamini.

⁵Vamwe vose zvavo vemhuri yokwaKohati vakapiwa gumi ramaguta omunyika yokwaEfuraimu neyokwaDhani neyechimwe chikamu chevokwaManase.

⁶VokwaGerishoni vakagoverwa nechin'ange maguta gumi namatatu omunyika yokwaIsakari neyokwaAsheru neyokwaNafutari neyechimwe chikamu chevokwaManase vokuBhashani.

⁷VokwaMerari vakapiwa mhuri nemhuri maguta gumi namaviri omunyika dzevedzinza rokwaRubheni nerokwaGadhi nerokwaZebhuruni.

⁸Saka vaIsiraeri vakagovera vaRevhi nechin'ange maguta iwayo namafuro awo sezvakanga zvaudzwa Mosesi naTenzi.

⁹Mudzinza rokwaJudha neraSimeoni vakapiwa maguta akaita zvokudomwa namazita.

¹⁰Maguta iwayo akapiwa vemhuri yokwaAroni, vaRevhi vemba yokwaKohati nokuti mugove wavo ndowakatanga kubuda pachin'ange.

¹¹Vakavapa Kiriatiaribha, ndiro guta reHebhuroni. (Aribha uyu aiva baba waAnaki.) Vakapiwa guta irori riri munyika yamakomo yokwaJudha pamwechete namafuro akaripoteredza.

¹²Asi minda yaro nemisha yaro zvakanga zvapiwa kare kuna Karebhu mwanakomana waJefune kuti zvive zvake.

¹³Vakapa vemhuri yomupristi Aroni maguta aya anoti Hebhuroni, guta rokuti munhu anenge auraya mumwe awane kwokupotera, pamwechete namafuro aro vakavapawo guta reRibhuna namafuro aro;

¹⁴kwouyawo reJatiri namafuro aro nereEshitemoa namafuro aro,

¹⁵neHoroni namafuro aro neDhebhiri namafuro aro;

¹⁶kwoti guta reAini namafuro aro neJuta namafuro aro neBhetishemeshi namafuro aro. Ose pamwechete aiva maguta mapfumbamwe omudzinza rokwaJudha nerokwaSimeoni.

¹⁷Maguta avakapiwa omudzinza rokwaBhenjamini ndeaya kunoti guta reGibheoni namafuro aro neGebha namafuro aro;

¹⁸kwouya Anatoti namafuro aro neArimoni namafuro aro pamwechete aiva maguta mana.

¹⁹Saka maguta akapiwa vapristi vemba yokwaAroni ose pamwechete aiva gumi namatatu, namafuro awo.

²⁰Kune vamwe vose vokwaKohati vakanga vasara vemhuri dzevokwaKohati vomudzinza rokwaRevhi wakapiwa maguta omudzinza rokwaEfuraimu.

²¹Vakapiwa maguta aya anoti: Shikemu guta romunyika yaEfuraimu yemakomo, namafuro aro rokuti munhu anenge auraya mumwe awane kwokupotera, kwouya Gezeri namafuro aro,

²²neKibhuzaimu namafuro aro, neBhetihoroni namafuro aro, ose pamwechete aiva maguta mana.

²³Maguta avakapiwa omudzinza rokwaDhani ndeaya: kunoti guta reEriteke namafuro aro, neGibhetoni namafuro aro,

²⁴kwoti Aijaroni namafuro aro, neGatirimoni namafuro aro, Ose pamwechete aiva maguta mana.

²⁵Maguta avakapiwa mune chimwe chikamu chedzinza rokwaManase ndeaya. Kunoti guta reTanaki namafuro aro neGatirimoni namafuro aro, aiva maguta maviri.

²⁶Maguta emhuri idzi dzokwaKohati dzakanga dzasara ose zvawo pamwechete aiva gumi, aiva namafuro awo.

²⁷VaRevhi vemhuri yokwaGerishoni vakagoverwa maguta mune chimwe chikamu chevedzinza raManase anoti: guta reGorani rokuBhashani namafuro aro, rokuti munhu anenge auraya mumwe awane kwokupotera kwouya Beeshitera namafuro aro, aiva maguta maviri.

²⁸Mudzinza rokwaIsakari vakapiwa maguta aya anoti guta reKishioni namafuro aro, nereDhabherati namafuro aro,

²⁹neJarimuti namafuro aro, neEniganimu namafuro aro, ose pamwechete aiva maguta mana.

³⁰Mudzinza rokwaAsheri vakapiwa maguta aya anoti: guta reMishori namafuro aro, neAbhudhoni namafuro aro.

³¹Kwouya reHerikati namafuro aro, neRehobhu namafuro aro, ose pamwechete aiva maguta mana.

³²Mudzinza rokwaNafutari vakapiwa maguta aya anoti: Kedheshi riri kuGarirea namafuro aro, rokuti munhu anenge auraya mumwe awane, kwokupotera, kwouya guta reHamatidhori namafuro aro, neKaritani namafuro aro, ose pamwechete aiva maguta matatu.

³³Maguta emhuri dzose dzokwaGerishoni ose zvawo pamwechete aiva gumi namatatu aivawo namafuro awo.

³⁴Kune vose vaRevhi vakanga vasara vemhuri dzokwaMerari vakapiwa maguta mudzinza rokwaZebhuruni aya anoti: guta reJokineamu namafuro aro neKarita namafuro aro;

³⁵Kwoti Dhimuna namafuro aro neNaharara namafuro aro ose pamwechete aiva maguta mana.

³⁶Mudzinza rokwaRubheni vakapiwa maguta aya anoti: guta reBhezeri namafuro aro neJahazi namafuro aro

³⁷kwouya Kedhemoti namafuro aro neMefaati namafuro aro. Ose pamwechete aiva maguta mana.

³⁸Mudzinza rokwaGadhi vakapiwa maguta aya anoti: guta reRamoti riri kuGireadhi namafuro aro, rokuti munhu anenge auraya mumwe awane kwokupotera.

³⁹Kwouya reMahanaimu namafuro aro neHeshibhoni namafuro aro neJazeri namafuro aro; ose pamwechete aiva maguta mana.

⁴⁰Saka maguta emhuri dzavamwe vaRevhi vose, vakanga vasara vemhuri dzokwaMerari ose pamwechete aiva gumi namaviri.

⁴¹Naizvozvo maguta avaRevhi avakapiwa pamwechete namafuro awo mukati menyika yavaIsiraeri yenhaka aiva makumi mana ana masere.

⁴²Pamaguta ose iwaya, guta roga roga rakanga rakapoteredzwa namafuro; ndozvakanga zvakaita maguta iwayo ose.

⁴³Nokudaro Tenzi akapa vaIsiraeri nyika yose yaakatsidzira kupa kumadzibaba avo. Vakaitora ikava yavo ndokubva vagaramo.

⁴⁴Tenzi akavapa runyararo kumative ose sokutsidza kwaakaita kumadzibaba avo. Hakuna kana nomumwe wavavengi vavo akagona kumirisana navo nokuti Tenzi akaisa vavengi vavo vose mumaoko avo.

⁴⁵Hakuna kana chinhu chimwechete chakanaka chakanga chatsidzirwa vaIsiraeri naTenzi chisina kuzoitika, zvose zvakaitika.