Read Bhaibhiri Idzva rechiShona Joshuwa 22 Bible Online

Joshuwa 22 - Bhaibhiri Idzva rechiShona bible

Joshuwa 22

¹Joshuwa akadaidza vedzinza rokwaRubheni nerokwaGadhi nechimwe chikamu chevedzinza rokwaManase

²akavati, “Makachengeta zvose zvamakaudzwa naMosesi muranda waTenzi, mukanditeerera pane zvose zvandakakuudzai.

³Hamuna kana kumbosiyana zvenyu nehama dzenyu nguva yose iyi yanga yakareba kudai kusvikira nhasi uno, asi kutoti manga muchinyatsochengeta zvamakaudzwa naTenzi, Mwari wenyu.

⁴Zvino Tenzi Mwari wenyu apa hama dzenyu runyararo sokuvatsidzira kwaakaita. Saka imimi chidzokerai zvenyu kumusha kwenyu, kunyika yenyu yamakapiwa naMosesi muranda waTenzi kumhiri kwaJorodhani, kuti ive yenyu.

⁵Nyatsongwarirai kuchengeta mutemo nomurao wamakaudzwa naMosesi muranda waTenzi, wokuti mude Tenzi, Mwari wenyu, mufambe munzira dzake dzose muteerere mirao yake muti kwati kwati naye, muchimushandira nomwoyo wenyu wose, nomweya wenyu wose.”

⁶Saka Joshuwa akavapa chikomborero ndokuvati vaende zvavo, vakaenda kumisha yavo.

⁷Zvakanga zvaitika ndezvokuti Mosesi akanga apa chimwe chikamu chevedzinza rokwaManase nyika yavo kuBhashani, Joshuwa ndokupawo chimwe chikamu chevedzinza irori nyika, pedyo nehama dzavo yokumadokero kwaJorodhani. Pakuonekana navo, Joshuwa akavapa chikomborero

⁸achiti kwavari, “Chidzokerai zvenyu kumisha yenyu muine upfumi hwenyu hwakawanda kwazvo, hwamatanga namatanga ezvipfuwo nesirivha nendarira nesimbi, namatutu matutu ehanzu, musvikogoverana nehama dzenyu zvamakapamba kuvavengi venyu.

⁹Naizvozvo vokwaRubheni nevokwaGadhi nechimwe chikamu chevedzinza rokwaManase vakadzokera kumusha. Vakaonekedzana navamwe vavo vaIsiraeri kuShiro, munyika yeKanani, voenda zvavo kuGireadhi kunyika yavo yavakatora vakaiita yavo sokutaura kwakanga kwaita Tenzi nokuna Mosesi.”

¹⁰Pavakasvika kunharaunda[8] yokuna Jorodhani munyika yeKanani, vokwaRubheni novokwaManase vakavaka atari huru kwazvo munyasi maJorodhani.

¹¹Pazvakasvika munzeve dzavamwe vavo vaIsiraeri zvichinzi, “Hezvoka, vokwaRubheni nevokwaGadhi vaya nechimwe chikamu chevedzinza rokwaManase chiya vavaka atari kumuganhu wenyika yeKanani kunharaunda yokunaJorodhani kumhiri ino munyika yavaIsiraeri.”

¹²VaIsiraeri pavakazvinzwa, gungano rose ravaIsiraeri rakakokorodzana kuShiro kundovarwisa.

¹³VaIsiraeri vakatumira Finehasi mwanakomana womupristi Ereazari kune vedzinza rokwaRubheni nerokwaGadhi nokune chimwe chikamu chevedzinza rokwaManase riya kunyika yeGireadhi.

¹⁴Akaenda navatungamiriri gumi, mutungamiriri mumwechete mumwechete pamadzinza gumi avaIsiraeri. Mumwe nomumwe wavo aiva mukuru mukuru wemhuri mumadzinza avaIsiraeri.

¹⁵Vakasvika kune vokwaRubheni nevokwaGadhi nevechimwe chikamu chiya chevokwaManase kunyika yeGireadhi, vakati kwavari,

¹⁶“Chinzwai zvarehwa negungano rose raTenzi, zvanzi, ‘Ko madarirei kupandukira Mwari wavaIsiraeri kudai, motsauka kuna Tenzi nhasi nokutozvivakira zvenyu atari muchipandukira Tenzi?

¹⁷Ko mhosva iya yechitadzo chokuPeori munoti haina kukwana here? Inga mhosva yacho hatisati taishamba wani kusvikira pari nhasi uno. Ndiyo yakaunza denda pagungano raTenzi.

¹⁸Zvamava kutosiyana zvenyu nhasi uno naTenzi. Zvino kana imi mukapandukira Tenzi nhasi uno, mangwana achashatirirwa gungano rose ravaIsiraeri.

¹⁹Ko, kana maona kuti nyika yenyu ino yakan'ora madii kusva mayambukira zvenyu kunyika yaTenzi kune tendhe raTenzi muwane nyika mukati medu. Asi chete musapandukire Tenzi, kana kupandukira isu muchitozvivakira zvenyu atari isiri atari yaTenzi, Mwari wedu.

²⁰Handiti Akani mwanakomana waZera akapara chitadzo panyaya yezvinhu zvakanga zvaturirwa kuna Tenzi kuti zviparadzwe. Chitadzo chacho hachina here kupfukira gungano rose ravaIsiraeri? Haasiri iye woga akafa pamusana pechitadzo chake.’ ”

²¹VokwaRubheni nevokwaGadhi nechimwe chikamu chevedzinza rokwaManase ndokupindura vatungamiriri vaya vemhuri dzavaIsiraeri vachiti,

²²“Tenzi, Samasimbaose, ndiye Mwari! Iye Tenzi, Samasimbaose, ndiye Mwari. Ndiye anoziva navaIsiraeri pachavo ngavazivewo kana izvozvi takazviita noumhandupandu kana kuti nokusatendeka kuna Tenzi musatirege tiri vapenyu nhasi uno.

²³Kana takazvivakira atari iyi kuti tikande pasi zvokutevera Tenzi kana kuti tipire pairi mupiro wokupisa, kana kupira pairi mipiro yembesanwa kana mipiro yokuwadzana, Tenzi pachake ngaatitsividze.

²⁴Aiwa. Takangozviita tichityira kuti, mune ramangwana vana venyu vanozokonora vana vedu vachiti, ‘Muneiwo zvenyu naTenzi, Mwari wavaIsiraeri.

²⁵Handiti Tenzi akaisa Jorodhani urwu kuti ruve muganhu pakati pedu nemi vokwaRubheni nevokwaGadhi, chenyu muna Tenzi hapana.’ Saka vana venyu vangazoregesa vana vedu kunamata Tenzi.

²⁶Ndokusaka takati, ‘Ngatidai izvi, ngativakei atari isiri yomupiro wokupisa kana yechibayiro,

²⁷asi kuti ive chapupu pakati pedu nemi, uyewo chigozova chapupu pakati pezvizvarwa zvedu zvichauya.’ Chive chinhu chokutipupurira kuti isuwo tinonamata Tenzi kunzvimbo yake tsvene nemipiro yedu yokupisa nezvibayiro zvedu nemipiro yedu yokuwadzana tichiitira kuti mangwana vana venyu vanozoti ‘Chenyu muna Tenzi hapana.’

²⁸Takati kana vakawana zvavanozotaura kwatiri, isu tichazoti, ‘Onaika atari iyo yakaita seyaTenzi yakavakwa namadzibaba edu isiri yemipiro yokuwadzana kana yechibayiro asi kuti ive chapupu pakati pedu nemi.’

²⁹Hazvimbofa zvakaitika kuti isu tipandukire Tenzi tokanda pasi nhasi zvokumutevera Tenzi tava kutovaka zvedu atari yomupiro wokupisa kana mupiro wembesanwa kunyange yechibayiro tichisiya atari yaTenzi, Mwari wedu iri kumusuo wetendhe rinoera!”

³⁰Mupristi Finehasi navatungamiriri vegungano, navakuru vakuru vemhuri dzavaIsiraeri vaaiva navo pavakanzwa zvakataurwa nevokwaRhubheni nevokwaGadhi nevokwaManase, vakafadzwa nazvo.

³¹Finehasi mwanakomana womupristi Ereazari akataurira vokwaRubheni nevokwaGadhi nevokwaManase achiti, “Nhasi tazoziva kuti Tenzi ari pakati pedu nokuti hamuna kuzviita muchipandukira Tenzi. Zvino mazonunura vaIsiraeri mumaoko aTenzi.

³²Finehasi mwanakomana womupristi Ereazari navatungamiriri vaya vakadzokera zvavo kunyika yeKanani neshoko kuvaIsiraeri vachibva kunyika yeGereadhi kune vokwaRubheni nevokwaGadhi.

³³Shoko iroro rakafadza vaIsiraeri. VaIsiraeri vakarumbidza Tenzi uye havana kana kuzotaura nezvokuvarwisa muhondo kuti vaparadze nyika yaigara vokwaRubheni nevokwaGadhi.

³⁴VokwaRubheni nevokwaGadhi vaya vakatumidza atari iya kuti chapupu vachiti, ‘Ndiyo chapupu pakati pedu chokuti Tenzi ndiMwari.’ ”