Read Bhaibhiri Idzva rechiShona Joshuwa 4 Bible Online

Joshuwa 4 - Bhaibhiri Idzva rechiShona bible

Joshuwa 4

¹Vanhu vose pavakapedza kuyambuka Jorodhani, Tenzi akati kuna Joshuwa,

²“Sarudza varume gumi navaviri muvanhu, murume mumwechete padzinza,

³uvati, ‘Torai mabwe gumi namaviri apano apa pakati paJorodhani panga pamire vapristi chaipo, muatakure muende nawo, mundoaisa pamucharara usiku hwanhasi.’ ”

⁴Joshuwa akadaidza varume gumi navaviri muvaIsiraeri, vaakanga asarudza achitora murume mumwechete padzinza.

⁵Zvino Joshuwa akati kwavari, “Endai mberi kwebhokisi rechitenderano chaTenzi Mwari wenyu, pakati paJorodhani, mumwe nomumwe wenyu atore ibwe aritakure papfudzi rake, maererano nouwandi hwamadzinza avaIsiraeri.

⁶Itai izvozvi kuti chigova chiratidzo; pakati penyu chokuti mangwana, kana vana venyu vobvunza kuti, ‘Ko kwamuri imi mabwe ayo anorevei’?

⁷Imi muvataurire kuti, ‘Mvura yaJorodhani yakamboganhurwa pamberi pebhokisi raTenzi rechitenderano pakuyambuka kwarakaita Jorodhani. Mvura yaJorodhani yakaganhurwa. Saka mabwe iwaya achava chiyeuchidzo kuvaIsiraeri nokusingaperi.’ ”

⁸Saizvozvo vaIsiraeri ivavo vakaita zvavakaudzwa naJoshuwa. Vakatora mabwe gumi namaviri pakati paJorodhani maererano nouwandi hwamadzinza avaIsiraeri sokuudziwa kwakaitwa Joshuwa naTenzi. Vakaatakura vakayambukira nawo kwavakandorara, vakaaisa ikoko.

⁹Joshuwa akarongawo mabwe gumi namaviri pakati paJorodhani, pakanga pamire vapristi paya, vainge vakatakura bhokisi rechitenderano. Mabwe iwayo achiripo nanhasi uno,

¹⁰nokuti vapristi vainge vakatakura bhokisi rechitenderano vakaramba vamire pakati paJorodhani kusvikira zvose zvakanga zvaudzwa Joshuwa naTenzi kuti ataurire vanhu zvapera kuitwa, maererano nezvose zvakanga zvaudzwa Joshuwa naMosesi. Vanhu vakaita chipitipiti kuyambuka.

¹¹Kuzoti vanhu vose vapedza kuyambuka, vapristi vakayambukawo nebhokisi rechitenderano vanhu vachiona.

¹²Vedzinza rokwaRubheni nevokwaGadhi nechikamu chapakati napakati chevedzinza rokwaManase vakayambuka vakapakata zvombo zvehondo vari mberi kwavaIsiraeri, sokuudzwa kwavakanga vaitwa naMosesi.

¹³Kwakayambuka zviuru zvinenge makumi mana zvavanhu vakanga vakapakata zvombo zvehondo pana Tenzi vakandosvika kumapani eJeriko.

¹⁴Musi iwoyo Tenzi akasimudzira Joshuwa pamusoro vaIsiraeri vose vachiona, vakamuremekedza sokuremekedza kwavaiita Mosesi upenyu hwake hwose.

¹⁵Tenzi akataurira Joshuwa achiti,

¹⁶“Chiudza vapristi vakatakura bhokisi rechitenderano vachibuda muna Jorodhani.”

¹⁷Saka Joshuwa akati kuvapristi, “Chibudai muna Jorodhani!”

¹⁸Vapristi vainge vakatakura bhokisi raTenzi rechitenderano pavakakwira vachibva muna Jorodhani, pavakangoti simudzei tsoka dzavo vachitsika pasi pakaoma, mvura yaJorodhani yakabva yadzokera pakare ikafashukira mhiri nemhiri sezvayakanga yakaita.

¹⁹VaIsiraeri vakabuda muna Jorodhani pazuva rechigumi romwedzi wokutanga, vakandodzika matendhe avo vava kuGirigari, kumuganhu wokumabvazuva weJeriko.

²⁰Joshuwa akaronga matombo gumi namaviri iwayo avakatora muna Jorodhani kuGirigari.

²¹Akataurira vaIsiraeri kuti, “Kana mangwana, zvizukuru zvenyu zvozobvunza madzibaba azvo kuti, ‘Matombo aya anorevei?’

²²Ipapa izotaurira vana venyu kuti, ‘VaIsiraeri vakayambuka Jorodhani urwu napakaoma.’

²³Ndinodaro nokuti Tenzi, Mwari wenyu akakuomeserai mvura yaJorodhani kusvikira mayambuka, sezvakaitawo iye Tenzi, Mwari wenyu kugungwa Dzvuku raakatiomesera kusvikira tayambuka,

²⁴kuitira kuti ndudzi dzose dzapasi pose dzigoziva kuti Tenzi ane simba guru kwazvo, uyewo kuti mutye Tenzi Mwari wenyu wose narini narini.”