Read Bhaibhiri Idzva rechiShona Joshuwa 9 Bible Online

Joshuwa 9 - Bhaibhiri Idzva rechiShona bible

Joshuwa 9

¹Kuzoti izvozvi zvanzwikwa namadzimambo ose akanga agere kumhiri kwaJorodhani munyika yamakomo nenyika yamapani nokumahombekombe kwose kweGungwa guru[4] kwakatarisana neRebhanoni, vaHiti navaAmori navaKanani navaPerezi navaHivhi navaJebhusi vakazvinzwa,

²vakakokorodzana vakaita rimwe rokurwisa Joshuwa navaIsiraeri.

³Asi vanhu veGibheoni pavakanzwa zvakaitwa naJoshuwa kuguta reJeriko nereAi naivowo vakaita zvounyengedzi.

⁴Zvavakaita ndezvokuti vakaenda vachiita sokunge nhumwa dzenyika. Vakatora masaga matsaru vakaisa pamadhongi avo, nezvigubhu zvewaini zvamatehwe zvasakara zvakabvaruka-bvaruka zvakaitwa zvokusoneredzwa.

⁵Vakapfeka mutsoka shangu dzasakara dzine zvigamba. Vakapfekawo marengenya. Chingwa chembuva yavo chakanga chachiti papata kuoma chava nechiundudzi.

⁶Vakaenda kuna Joshuwa pamatendhe kuGirigari, vakataurira iye navaIsiraeri vachiti, “Tabva kunyika iri kure kwazvo. Zvino tinokumbirawo kuti muite chitenderano nesu.”

⁷Asi varume vechiIsiraeri vakati kuvaHivhi, “Ko zvimwe mungadaro muri vanhu vagere pakati pedu, tingagoita sei chitenderano nemi pakadaro?”

⁸Ivo vakati kuna Joshuwa, “Tiri varanda venyu.” Joshuwa akati kwavari, “Ko ndimi vanaani? Munobva kupi?”

⁹Vakati kwaari, “Isu varanda venyu tabva kunyika iri kure kure. Chatisvitsa kuno izita raTenzi Mwari wenyu nokuti, takanzwa nezvomukurumbira wake nezvose zvaakaita kuIjipiti,

¹⁰nezvose zvaakaita kumadzimambo maviri avaAmori aiva kumhiri kwaJorodhani, aiti Sihoni mambo weHeshibhoni naOgu mambo weBhashani aigara kuAshitaroti.

¹¹Naizvozvo vakuru vakuru vedu navanhu vose vomunyika medu vakatiti, ‘Torai mbuva mupinde munzira mundochingudzana navo, muvati, tiri varanda venyu, tiri kukumbirawo kuti tiite chitenderano nemi.’

¹²Tarisai muone chingwa chedu chembuva. Izvozvi musi watakasimuka tichiuya kwamuri, chakanga chichitopisa patakachitora mumba. Asi iye zvino chionai chaoma kuti papata, chatova nechiundudzi.

¹³Zvigubhu zvedu zvewaini zvematehwe izvi zvaiva zvitsva patakazvizadza, asi chitarisai muone zvatomwauka. Hanzu dzedu neshangu dzedu idzi dzatosakara pamusana perwendo rwacho rwakareba zvikuru.”

¹⁴Ipapo varume veIsiraeri vakadya zvavo zvokudya zvavanhu ivavo vasina kumbobvunza kuti Tenzi anoti kudii nenyaya yacho.

¹⁵Joshuwa akabva awirirana navo ndokuita chitenderano navo chokuti achavarega vari vapenyu. Vatungamiri vegungano vakavavimbisawo saizvozvo.

¹⁶Kwakati kwapera mazuva matatu mushure mokuita chitenderano navo, vakazonzwa kuti vakanga vari vavakidzani navo, vakanga vagere pedyo navo.

¹⁷VaIsiraeri vakafamba kwamazuva matatu vakandosvika kumaguta evanhu ivavo. Maguta acho aiti Gibheoni neKefira neBheeroti neKiriatijearimu.

¹⁸Asi vaIsiraeri havana kuvauraya nokuti vatungamiriri vegungano vakanga vapika naTenzi Mwari wavaIsiraeri. Vanhu vose vakabva vanyunyutira vatungamiriri.

¹⁹Vatungamiriri vose vakaudza gungano rose kuti “Takavapikira naTenzi Mwari wavaIsiraeri. Zvino hatikwanisi kana kumbovabata-bata zvedu.

²⁰Zvatichaita kwavari ndezvizvi, tichavarega zvedu vari vapenyu kuti tirege zvedu kuvirukirwa nehasha pamusana pemhiko yatakapika kwavari.”

²¹Vatungamiriri vakati kuvanhu, “Varegei vari vapenyu.” Saka vanhu ivava vakava vokutemera gungano huni nokuvatekera mvura sokutaura kwakaita vatungamiriri kwavari.

²²Joshuwa akavadaidza akati kwavari, “Ko makatinyengedzererei muchiti, ‘Tinogara kure kwazvo nemi.’ Nyamba imi munogara zvenyu pedyo nesu kudai.

²³Saka naizvozvo matopinda rushambwa, vamwe venyu muchagara muri varanda vokutemera huni, nokutekera mvura imba yaMwari wangu.”

²⁴Vakapindura Joshuwa vachiti, “Takaita izvozvi nokuti isu varanda venyu takanga tanyatsorondedzerwa zvakatemwa naTenzi Mwari wenyu akazvipa kuna Mosesi muranda wake zvokuti ari kukupai nyika iyi yose achifanokuurayirai vanhu vose vomo. Takabva tatyira upenyu hwedu ndokubva taita izvozvi.

²⁵Zvino isu tiri mumaoko enyu. Itai zvenyu nesu zvamunoona kuti ndizvo zvakanaka zvakakodzera.”

²⁶Ndizvozvo zvaakaita kwavari akavanunura mumaoko avaIsiraeri vakarega kuvauraya.

²⁷Kubvira pamusi iwoyo kusvikira pari nhasi, Joshuwa akavaita vatemi vehuni navateki vemvura vegungano neveatari yaTenzi pose pose paainge asarudza.