Read Bhaibhiri Idzva rechiShona 2 Vatesaronika 3 Bible Online

2 Vatesaronika 3 - Bhaibhiri Idzva rechiShona bible

2 Vatesaronika 3

¹Pokupedzisira hama dzangu, tinamatireiwo kuti shoko raTenzi rirambe richingomhanya kuenda mberi uye kuti rikunde sezvarakaita pakati penyu

²uye kuti tinunurwe kuvanhu vakaipa vanyangadzi. Havasi vose vose vane chitendero,

³asi Tenzi akatendeka achakudzivirirai kumuipi.[1]

⁴Isu tine chivimbo muna Tenzi kuti muri kuita uye mucharamba muchiita zvinhu zvatakati muite.

⁵Dai Tenzi angotungamirira mwoyo yenyu kurudo rwaMwari uye kuno kutirira kwaKristu.

⁶Zvino tinokuudzai hama muzita raTenzi Jesu Kristu kuti siyanai nehama inenge iri nyope isingatevedzi magamuchidzanwa amakagamuchira kwatiri.

⁷Imi munoziva wani kuti munofanira kutitevedzera zvakadii. Isu takanga tisingagari maoko patanga tiinemi.

⁸Hatina kudya chokudya chomunhu mahara, asi taishanda zvakaoma tichifondoka siku nesikati kuti tirege kuwana watinoremedza.

⁹Hazvirevi kuti isu hatina mvumo yokubatsirwa nemi[2] asi kuti tikupei muenzaniso wokuti mutevedzere.

¹⁰Kunyange pataiva tiinemi takakuudzai kuti kana munhu asingadi kushanda ngaarege kudya.

¹¹Nokuti tinonzwa kuti vamwe venyu vari kugara zvavo maoko; basa ravo riri rokunekaira chete pasina chavanoita.

¹²Zvino tinokomera vanhu vakadaro tichivakurudzira muna Tenzi Jesu Kristu kuti vaite basa ravo chinyararire vachizviwanira zvokurarama nazvo.

¹³Hama dzangu musanete mukuita zvakanaka.

¹⁴Kana pane anoramba kuteerera zvatiri kutaura mutsamba ino nyatsomuzivai murege kuva nechii chamunoita naye kuti anyare.

¹⁵Musamutore semhandu asi muyambirei sehama.

¹⁶Zvino Tenzi worugare pachake ngaakupei rugare nguva dzose nenzira dzakasiyana — siyana. Tenzi ngaave nemi mose.

¹⁷Ndini Pauro ndiri kunyora kwaziso iyi noruoko rwangu. Aya ndiwo masainiro andinoita tsamba dzangu dzose ndiwo manyorero andinoita.

¹⁸Tenzi Jesu Kristu ngaakupei mose chikomborero chenyasha dzake.