Read Bhaibhiri Idzva rechiShona 2 Timoti 2 Bible Online

2 Timoti 2 - Bhaibhiri Idzva rechiShona bible

2 Timoti 2

¹Naizvozvo iwe mwanangu chisimba uchibatsirwa nenyasha dzatinowana muna Kristu Jesu.

²Zvawakanzwa kwandiri pamberi pezvapupu zvizhinji, zviturire kuvanhu vakatendeka vanokwanisa kudzidzisawo vamwe.

³Tirira chikamu chako chamatambudziko zvakanaka somurwi waKristu Jesu.

⁴Hakuna musoja achiri pabasa anozvipinza mumabasa amazuva ose kana achida kugutsa akamunyora pabasa.

⁵Hakunawo munhu wamapitse omutambo anopiwa chiremba kusatoti achengeta mitemo yacho.

⁶Murimi anoshanda zvakasimba ndiye anofanira kuwana mukoho wokutanga wembeswa.

⁷Rangarira zvandinotaura nokuti Tenzi achakupa kunzwisisa muna zvose.

⁸Yeuka Jesu Kristu akamuka muvafi, wedzinza raDhavhidhi sokuparidzwa kwazvinoitwa muShoko rangu Rakanaka

⁹randiri kutambudzikira ndakasungwa makechemi somunhu anotyora mitemo yenyika. Asi Shoko Rakanaka harisungwi.

¹⁰Naizvozvo ndinotirira zvose pamusana pavasarudzwi kuti naivowo vawane ruponeso rwuri muna Kristu Jesu nembiri yarwo inogara narini narini.

¹¹Izvi ndezvechokwadi zvokuti “Kana takafa pamwechete naKristu tichararama pamwechete naye.

¹²Kana tikatirira tichatonga pamwe naye kana tikamuramba iye achatirambawo.

¹³Kana tikasatendeka iye anoramba akatendeka nokuti haagoni kuva zvaasiri.”

¹⁴Vayeuchidze izvi uvakomerese pamberi paTenzi kuti varege kuitirana nharo nezvamazwi zvisingavabatsiri asi zvinotouraya vanenge vakateerera.

¹⁵Edza napose paunogona kuva munhu anogamuchirika pana Mwari, mushandi asina chaanganyare nacho anoziva kushanda namagwaro matsvene echokwadi zvakanaka.

¹⁶Siyana nehurukuro dzisina zvoumwari mukati nokuti zvinoramba zvongotungamirira vanhu mune zvisina umwari.

¹⁷Hurukuro dzavo dzinonyenga seronda risingapori. Vamwe vavo ndavana Himenayosi naFiretusi

¹⁸vakatsauka pachokwadi, vanoti zvokumuka kuvafi zvakatoitika. Vari kudzongodza chitendero chavamwe.

¹⁹Asi hwaro hwaMwari hwakasimba hunoramba huripo hwakanyorwa kuti, “Tenzi anoziva avo,” uye kuti, “Munhu wose anodaidza zita raTenzi, ngaasiyane nouipi.”

²⁰Muzimba hombe hamuna midziyo yendarama neyesirivha chete asi mune yemiti neyevhu. Mimwe ndeyamazuva makuru, imwewo ndeyamazuva ose.

²¹Munhu akazvichenura kune zvinoshoreka anobva ava mudziyo wakakosha wamazuva makuru achiva mudziyo wakayereswa une basa, kumuridzi wemba, wakagarira basa ripi neripi rakanaka.

²²Naizvozvo siyana nehavi dzevechiduku unangane noururami nechitendero norudo norugare pamwechete navanodaidza kuna Tenzi nemwoyo wakanaka.

²³Siyana nenharo dzoupenzi dzisina musoro. Iwe unoziva kuti dzinomutsa gakava.

²⁴Muranda waTenzi haafaniri kuva munhu wenharo asi kuva nomutsa kuvanhu vose ari mudzidzisi kwaye ano mwoyo murefu,

²⁵anodzora vanorwisana naye nounyoro. Zvichida Mwari anovasvitsa pakutendeuka vakasvika pakuziva chokwadi

²⁶vachigona kutopunyuka riva raDhiabhori ivo vambobatwa naye kuti vaite zvaanoda.