Read Bhaibhiri Idzva rechiShona 2 Timoti 4 Bible Online

2 Timoti 4 - Bhaibhiri Idzva rechiShona bible

2 Timoti 4

¹Ndinokukomeresa pamberi paMwari uye pamberi paKristu Jesu achazotonga vapenyu navakafa, pamberi paiye achazozviratidza muumambo hwake.

²Paridza shoko. Ramba uchingoriparidza panguva yarinofanira kuparidzwa kana panguva isiri yokuriparidza. Vataurire vazvinzwe; tsiura; uye vakurudzire. Usanete kuva nomwoyo murefu uye usanete kudzidzisa.

³Nokuti nguva iri kuuya vanhu pavanenge vasisadi chidzidziso chechokwadi vave nenzeve dzinovava vachizviunganidzira vadzidzisi vanowirirana nezvavanoda.

⁴Vachafuratira chokwadi votendeukira kune zvengano.

⁵Iwe ramba wakasimba, tirira matambudziko. Ita basa romuparidzi weShoko Rakanaka. Ita basa rako.

⁶Kana ndiri ini ndatosvika pokuti ndichiitwa chibayiro. Nguva yangu yokuenda yasvika.

⁷Ini ndakarwisa zvakanaka; ndakapedza mujaho, ndakachengeta chitendero.

⁸Kubva zvino ndakachengeterwa chiremba choururami, chandakagadzirirwa naTenzi mutongi wakarurama chaachandipa paZuva riya riya, kwete ini ndoga asi vose vanofarira kuzviratidza kwake.

⁹Edza napaunogona kuuya kwandiri nokukurumidza

¹⁰nokuti, Dhemasi, pamusana pokuda zvapanyika pano, akanditiza akaenda kuTesaronika. Kiresenzia akaenda kuGaratia. Titosi akaendawo Dharimatia.

¹¹Ruka chete ndiye aneni. Tora Mariko uuye naye nokuti anobatsira kwazvo nokundishandira kwaanoita.

¹²Tikikusi ndakamutuma kuEfeso.

¹³Kana wouya ndivigirewo bhachi randakasiya naKariposi kuTiroasi uye mabhuku zvikuru amatehwe ose okunyorera.

¹⁴Arekizanda, mupfuri wesimbi akandiitira zvakaipa zvikuru. Tenzi achamutsividza zviito zvake.

¹⁵Kana iwewo muchenjerere nokuti anopikisana kwazvo neshoko redu.

¹⁶Pakutongwa kwangu kwokutanga hapana akamira neni, vose vakanditiza. Dai vangorega kupihwa mhosva nazvo.

¹⁷Asi Tenzi ndiye akanditsigira akandipa simba kuti ndiparidze shoko zvizere kuti vechirudzi vose varinzwe. Ndizvozvo ndakanununurwa mukanwa meshumba.

¹⁸Tenzi achandinunura kumabasa ose akaipa achindichengetedzera umambo hwake hwokudenga. Iye ngaarumbidzwe narini narini. Ameni.

¹⁹Ndikwazisirewo Pirisika naAkwira nevemba yaOnesiforosi.

²⁰Erasitosi akasara Kukorinde. Tirofimosi ndakamusiya achirwara kuMiretusi.

²¹Edza kuuya mwaka wechando usati wauya. Yubhurosi anokukwazisa naPudhenzi naRinusi naKiraudhia nevehama vose.

²²Tenzi ngaave newe. Chikomborero chenyasha ngachive newe.