Read Bhaibhiri Idzva rechiShona Firimoni 1 Bible Online

Firimoni 1 - Bhaibhiri Idzva rechiShona bible

Firimoni 1

¹Ndini Pauro musungwa akasungirwa Kristu Jesu, tinokunyorera tiri pamwechete naTimoti hama yedu iwe Firimoni

²mushandipamwe nesu wapamwoyo naApiya hanzvadzi yedu naAchipusi musoja pamwechete nesu nesangano rinonamatira pamba pako.

³Nyasha norugare ngazvive nemi zvichibva kuna Mwari Baba vedu nokuna Tenzi Jesu Kristu.

⁴Ndinotenda Mwari nguva dzose pandinokuyeuka muminamato yangu

⁵nokuti ndinonzwa nezvorudo rwako kuvanhu vaMwari vose uye nechitendero chako chauinacho muna Tenzi Jesu.

⁶Dai mubatirapamwe wako muchitendero wangobereka muchero wokuti iwe uzive zvakanaka zviri matiri kuitira Kristu

⁷nokuti ndakawana rufaro rwakawanda nokusimbaradzwa zvichibva murudo rwako, iwe hama yangu nokuti wakaita kuti mwoyo yavanhu vaMwari ifaranuke.

⁸Nezvo kunyange zvangu, muna Kristu, ndiine simba, rokukuudza zvokuita,

⁹asi pamusana porudo, zviri nani kuti ndiite zvokukukumbira, iyeni Pauro harahwa kudai uyewo musungwa akasungirwa Kristu Jesu.

¹⁰Ndinokuteterera ndichikumbirira mwana wangu Onesimo[1] wandakabereka muusungwa hwangu.

¹¹Iye akanga ari munhu asina maturo kwauri asi iye zvino ave munhu ane basa kwauri nokwandiri.

¹²Zvino ndava kumudzorera kwauri ndichimutumira somunhu wapamwoyo pangu chaiye,

¹³Ndingadai ndakatosarudza kuramba ndiinaye kuno kuti andishandire panzvimbo pako nguva yandiri muusungwa kudai pamusana peShoko Rakanaka.

¹⁴Asi ndakasarudza kuti ndirege kuva nechandinoita ndisina mvumo yako kuitira kuti kundiitira zvakanaka kwako kurege kuva kokumanikidzwa asi kuti kuve kwaunosarudza wakasununguka.

¹⁵Pamwe ndizvo zvakaita kuti amboparadzaniswa newe kwekachinhambo kuti azodzorerwa kwauri zvachose,

¹⁶kwete senhapwa asi atokosha kupinda nhapwa, ava munun'una wapamwoyo zvikuru kwandiri, ko kutozoti kwauri, inga mwana womumusha wani uyewo akakosha muna Tenzi.

¹⁷Zvino kana iwe uchindiona sasahwira wako, mugamuchire sokundigamuchira kwaungandiite.

¹⁸Kana pane chii zvacho chaakakunganisira kana kuti ane chikwereti newe chinyore pazita rangu sechikwereti.

¹⁹Iyeni Pauro ndinosaina izvi noruoko rwangu kuti ndichachibhadhara tisingatauri zvedu zvechikwereti chako, chokuti iwe unotova nechikwereti[2] kwandiri.

²⁰Hongu, hama ndinoda rubatsiro kwauri zvichibva muna Tenzi. Chindifaranutsawo mwoyo muna Kristu.

²¹Pane zvokuteerera kwako ndine chivimbo newe. Ndinokunyorera ndichiziva kuti uchatoita zvinopfuura zvandiri kutaura.

²²Chimwezve ndechokuti ndigadzirirewo imba yavaenzi nokuti ndinotarisira kuti, ndichibatsirwa neminamato yenyu, ndichadzorerwa kwamuri.

²³Epafurasi musungwa pamwe neni muna Kristu Jesu anokukwazisa,

²⁴uyewo Mariko naAristakusi naDhemasi naRuka vashandipamwe neni.

²⁵Tenzi Jesu Kristu ngaape chikomborero chenyasha kumweya wenyu.