Read Bhaibhiri Idzva rechiShona VaHebheru 10 Bible Online

VaHebheru 10 - Bhaibhiri Idzva rechiShona bible

VaHebheru 10

¹Pamusana pokuti mutemo mumvuri chete wezvinhu zvakanaka zvichauya, panze pokuva nezvinhu zvacho chaizvo, kuchingova kupira zvibayiro zvimwechetezvo zvinoramba zvichingopirwa gore negore, haumbofa wakaruramisa vanamati.

²Dai mutemo waigona, zvibayiro zvingadai zvisina kuregerwa kupirwa here? Dai kuri kuti vanamati vakanatswa chakamwe vangadai vasinganzwe kuti vane chitadzo.

³Asi zvibayiro izvozvi zvinoyeuchidza zvitadzo gore negore

⁴nokuti hazvigoneki kuti ropa rehandira nerembudzi ribvise zvitadzo. Naizvozvo Kristu paakauya panyika akati,

⁵“Zvibayiro nemipiro hazvisizvo zvamakafarira asi makandigadzirira muviri.

⁶Mupiro wokupisa nomupiro wokupfupira zvitadzo hamuna kuufarira.

⁷Ndipo pandakati, ‘Mwari, tarisai muone ndauya kuzoita kuda kwenyu, sokunyorwa kwazvakaitwa nezvangu mubhuku rokumononora.’ ”

⁸Paanoti pamusoro apo: “Hamuna kuda kana kufarira zvibayiro nemipiro nemipiro yokupisa nemipiro yokupfupira zvitadzo.” (Izvi zvinopirwa maererano nomutemo).

⁹Ndokuzoti: “Tarirai ndauya kuzoita kuda kwenyu.” Arikudzima chokutanga achiisa chechipiri.

¹⁰Nokuda kwaizvozvo takaitwa vatsvene pamusana pechibayiro chomuviri waJesu Kristu chakamwe.

¹¹Uyewo mupristi mumwe nomumwe anomira achiita basa rake achipira zuva nezuva zvibayiro zvimwechetezvo zvisingambokwanisa kubvisa zvitadzo.

¹²Asi Kristu paakapira nokusingaperi chibayiro chimwechete chokupfupira zvitadzo akandogara kurudyi rwaMwari

¹³achimirira kuti vavengi vaitwe chitambarariko chetsoka dzake.

¹⁴Naizvozvo nechibayiro chimwechetecho akanatsa nokusingaperi avo vakaitwa vatsvene.

¹⁵Mweya mutsvene anotipupurirawo paanomboti,

¹⁶“Ichi ndicho chitenderano chandichaita navo mumashure mamazuva iwayo ndozvinotaura Tenzi. Ndichaisa mitemo yangu mumwoyo yavo uye ndichainyora mundangariro dzavo.”

¹⁷Anotizve handichazorangarirazve zvitadzo zvavo nezviito zvavo zvakaipa.

¹⁸Zvino pane ruregerero rwezvizvi panenge pasisina chibayiro chezvitadzo.

¹⁹Saizvozvo hama dzangu, zvatiine chivimbo chokuti tichapinda munzvimbo inoeresesa nokuda kweropa raJesu

²⁰nenzira itsva mhenyu yaakatizarurira nokupinda kwaakaita napajira rokudzikatirisa, zvichereva muviri wake,

²¹uye zvatino mupristi mukuru mutariri wemba yaMwari,

²²ngatiswederei pedyo nomwoyo uri pachokwadi norudaviro rwakasimba mwoyo yedu yakasaswa isina chinorovesa hana nemiviri yakashambidzwa nemvura yakachena.

²³Ngatichengetedzei zvakasimba chitendero chezvatinotarisira tisingazungunutswi nokuti iye akatsidza anotendeka.

²⁴Ngatinyatsofungisisai nzira dzokukurudzirana rudo namabasa akanaka.

²⁵Tisaregere kusangana setsika inoitwa navamwe asi kuti tikurudzirane, zvikuru sei sezvamunoona kuti Zuva riya ravakusvika.

²⁶Nokuti tikaramba tichingotadza zvedu isu tichiziva, isu takambogamuchira ruzivo rwechokwadi, hapazovezve nechibayiro chezvitadzo

²⁷asi kungotarisira kutonga kunotyisa nomoto unotyisa uchaparadza mhandu.

²⁸Munhu anotyora Mutemo waMosesi anouraiwa zvisina tsitsi paine zvapupu zviviri kana zvitatu.

²⁹Ko kutozoti munhu anotsokodzera Mwanakomana waMwari achin'oresa ropa rechitenderano rakamuita mutsvene achishatirisa Mweya wenyasha, acharangwa zvakaipisisa sei?

³⁰Inga tinoziva wani iye akati “Kutsiva ndokwangu, ndichatsividza.” Uyezve anoti, “Tenzi achatonga vanhu vake.”

³¹Chinhu chinotyisa kuwira mumaoko aMwari mupenyu.

³²Asi yeukai, mazuva akare kuti mushure mokunge mavhenekerwa mukatirira matambudziko akaomarara.

³³Dzimwe nguva maipinda mukutukwa nokutambudzwa pazere vanhu kana kubatanidzirwa navanenge vachiitirwa zvakadaro.

³⁴Pamusana pokuti imi maiva netsitsi navasungwa uye maigamuchira nomufaro kupambwa kwezvinhu zvenyu nokuti imi pachenyu munoziva kuti mune chamuinacho chiri nani chinogara nokusingaperi.

³⁵Nokudaro musarase chivimbo chenyu chino mubayiro mukuru.

³⁶Munofanira kutirira kuti muite kuda kwaMwari kuitirawo kuti mugamuchire zvakatsidzirwa zvinoti:

³⁷“Kwangosara kanguva kaduku duku uya anonzi achauya ari kuuya, haachanonoki;

³⁸asi mururami wangu achararama nokutenda asi akadzokera shure handimufariri.”

³⁹Asi isu hatisi vaya vokudzokera shure vanoparadzwa asi isu tiri vanhu vane chitendero vanoponesa mweya yavo.