Read Bhaibhiri Idzva rechiShona VaHebheru 3 Bible Online

VaHebheru 3 - Bhaibhiri Idzva rechiShona bible

VaHebheru 3

¹Naizvozvo, imi hama varurami, vechikwata chavakadaidzirwa denga, chimbofungai nezvaJesu, mupositori nomupristi mukuru wechitendero chedu.

²Aiva munhu wakatendeka kuna iye wakamusarudza; sokutendekawo kwakanga kwakaita Mosesi mumba maMwari.

³Asi Jesu akakodzera kukudzwa kupinda Mosesi sezvinoitwa muvaki wemba; anokudzwa kupinda imba.

⁴Nokuti imba ipi neipi ine wakaivaka asi muvaki wezvinhu zvose ndiMwari.

⁵Zvino Mosesi, somuranda akanga akatendeseka muimba yose yaMwari, achipa uchapupu hwezvinhu zvakanga zvichazotaurwa.

⁶Asi Kristu, iye mukuru wemba yaMwari akatendeseka somwana. Ndisu iyesu imba yake, chero tikaramba tichingovimba chete, nokudada nechitarisiro chedu.

⁷Naizvozvo sokutaura kwaMweya Mutsvene anoti: “Nhasi kana monzwa izwi rake,

⁸musazoomesa mwoyo yenyu sapachimurenga paya, pazuva riya rokuedzwa murenje,

⁹madzibaba enyu pavakandiedza, asi ivo vakaona mabasa angu kwamakore makumi mana.

¹⁰Naizvozvo ndakashatiriswa nechizvarwa ichocho; ndikazoti vanogarokanganisa mumwoyo yavo. Havasati vamboziva nzira dzangu.

¹¹Sokupika kwandakaita ndakashatirwa, havachazombopinda muzororo rangu.”

¹²Chenjerai, hama dzangu, kuti munaani — nani wenyu murege kuva nemwoyo wakaipa usingatendi, ungadaro ukamutsautsa muna Mwari mupenyu.

¹³Asi kurudziranai mumwe nomumwe mazuva ose kana chete kuchiri kunzi, “Nhasi” kuti kusave nomumwe wenyu anoomeswa mwoyo nounyengedzi hwechivi.

¹⁴Nokuti tinogoverana muna Kristu, chero chete tikaramba takabata zvakasimba ruvimbo rwedu rwapakutanga, kusvika pakupedzisira.

¹⁵Zvazvinonzi: “Nhasi kana monzwa izwi rake musazoomesa mwoyo yenyu sapachimurenga paya.”

¹⁶Ndavanani vakazvinzwa asi vakazopanduka, handiti ndivo here vaya vakabva kuIjipiti vachitungamirirwa naMosesi?

¹⁷Ndivanani vakamutsamwisa pamakumi mana amakore? Havasi ivo here vaya vakaita zvivi, zvitunha zvavo zvikazoti rakata murenje.

¹⁸Ko akapika kuna vanaani kuti havasi kuzombopinda muzororo rake asi kuna ivavo vakanga vasingateereri.

¹⁹Naizvozvo tinoona kuti havana kukwanisa kupinda nemhaka yokusadavira.