Read Bhaibhiri Idzva rechiShona Jemusi 2 Bible Online

Jemusi 2 - Bhaibhiri Idzva rechiShona bible

Jemusi 2

¹Hama dzangu musave norusarura, imi muine chitendero muna Tenzi wedu Jesu Kristu, Tenzi wembiri.

²Ngatitii munhu ane mhete dzendarama, akapfeka hanzu dzakanakisisa anouya pasangano penyu. Munhu murombo akapfeka marengenya ouyawo

³imi motarira uya akapfeka hanzu dzakanakisisa moti kwaari, “Uya ugare napapa,” asi muchiti kumurombo, “Mira uko” kana kuti, “Uya ugare pasi pedyo nechitambarariko chetsoka dzangu.”

⁴Hamuna here kuita rusaruro pakati penyu muchiva vatongi vane pfungwa dzakaipa.

⁵Teererai, hama dzangu dzadiwa. Mwari haana kusarudza here varombo panyika kuti vave vapfumi muchitendero uye vagari venhaka youmambo hwaakatsidzira vanomuda.

⁶Asi imi munoshora murombo. Vapfumi havasirivo here vanokudzvanyirirai uye havasirivo vanokukwekweretserai kumatare here?

⁷Havasirivo vanoshonha here zita rinoremekedzwa ramunodaidzwa naro?

⁸Kana mukazadzisa mutemo woumambo maererano namagwaro matsvene unoti, “Ida mumwe wako sokuda kwaunozviita.” Munoita zvakanaka.

⁹Asi mukaratidza rusaruro, munopara chitadzo uye munopihwa mhosva nomutemo savatyori vomutemo

¹⁰nokuti munhu anochengeta mutemo wose asi okundika pamwe pawo ane mhosva yokutyora wose.

¹¹Chikonzero ndechokuti iye akati, “Usaite upombwe,” ndiye akatiwo, “Usauraye.” Kana ukarega zvako kuita upombwe asi iwe uchiuraya watodarika mutemo.

¹²Kutaura nokuita kwenyu zviitei savanhu vachatongwa nomutemo worusununguko

¹³nokuti kutonga hakuna tsitsi kune munhu asinawo kuratidza tsitsi. Asi kune vakaratidza tsitsi kutonga hakuna zvakunovaita.

¹⁴Zvinobatsireiko nhai hama dzangu, kana munhu achiti ane chitendero asi iye asina mabasa? Chitendero chingamuponese here?

¹⁵Ngatitii hamarume kana hamakadzi haina chokupfeka isina chokudya chamazuva ose,

¹⁶mumwe wenyu oti kwavari, “Endai zvenyu norugare mudziirirwe uye mugute” asingavape zvinodikanwa nomuviri zvinobatsirei.

¹⁷Nokudaro chitendero pachacho chisina mabasa chakafa.

¹⁸Mumwe angati “Iwe une chitendero ini ndina mabasa. Ndiratidze chitendero chako iwe usina mabasa ini namabasa angu ndikuratidze chitendero changu.”

¹⁹Unotenda kuti Mwari mumwechete unoita zvakanaka. Kunyange mweya yakaipa inotendawo kudaro ichitodedera.

²⁰Nhaiwe benzi romunhu, unoda here kuziva kuti chitendero chisina mabasa hachina muchero?

²¹Abhurahamu baba vedu havana kururamiswa namabasa here pavakapira mwanakomana wavo Isaki paatari.

²²Unozviona kuti chitendero chavo namabasa avo zvaishanda pamwechete, chitendero chakazadzikiswa namabasa.

²³Magwaro Matsvene akabva azadziswa anoti, “Abhurahamu vakatenda muna Mwari zvikaita kuti anzi akarurama akanzi shamwari yaMwari.”

²⁴Munozvionawo kuti munhu anoruramiswa namabasa kwete nechitendero choga.

²⁵Handizvo zvimwechetezvo here nepfambi Rahabhu yakaruramiswa namabasa payakagamuchira vasori ikavaendesa neimwe nzira?

²⁶Nokuti ndizvo zvakaita muviri, kana usina mweya wakafa; saizvozvowo chitendero chisina mabasa chakafa.