Read Bhaibhiri Idzva rechiShona 1 Johani 3 Bible Online

1 Johani 3 - Bhaibhiri Idzva rechiShona bible

1 Johani 3

¹Tarisai muone kuti rudo rwakadii rwatakaitirwa naBaba, rwokuti tinzi vana vaMwari uye ndizvo zvatiriwo izvozvo. Chinoita kuti pasi pasatizive ndechokuti hapana kumuziva.

²Vadikanwi izvozvi tiri vana vaMwari. Zvatichava hazvisati zvavakuonekwa. Asi zvatinoziva ndezvokuti kana iye ozviratidza, tichange takafanana naye nokuti tichamuona sezvaari.

³Munhu wose ane chitarisiro maari kudai anozvichenesa nokuti iye mutsvene.

⁴Munhu wose anopara chitadzo, kushaya mutemo kwomunhu iyeyo. Kupara chitadzo, kushaya mutemo ikoko.

⁵Munoziva kuti Jesu akazviratidza kuti abvise zvitadzo uye maari hamuna chitadzo.

⁶Hapana anogara akabatana naye anoita zvitadzo. Munhu anoita chitadzo, haasati ambomuona kana kumuziva.

⁷Vanangu, musanyengedzwe nomunhu; munhu anoita zvakanaka, mururami, sezvakangoitawo Jesu mururami.

⁸Munhu anoita chitadzo, ndowaSatani nokuti Satani aingotadzira Mwari kubvira pakutanga. Chikonzero chakaita kuti Mwanakomana waMwari azviratidze ndechichi chokuti aparadze mabasa aSatani.

⁹Hapana munhu akaberekwa naMwari anoita chitadzo nokuti mhodzi yaMwari[7] inogara maari. Haakwanisi kutadzira Mwari nokuti akaberekwa naMwari.

¹⁰Izvozvi ndizvo zvinotiratidza pachena kuti vana vaMwari ndavapi uye kuti vana vaSatani ndavapi. Munhu wose asingaiti zvakarurama, haasi waMwari ndizvo zvimwechetezvo nomunhu asingadi hama yake.

¹¹Nokuti ndiro shoko ramakanzwa kubvira pakutanga, rokuti tinofanira kudanana

¹²tirege kuita saKaini akanga ari womuipi uya akaponda munun'una wake. Akamuponderei? Nokuti zviito zvake zvakanga zvakaipa asi zvomunun'una wake zvakanga zvakanaka.

¹³Hama musashamisike kana pasi pachikuvengai.

¹⁴Inga isu tinoziva wani kuti takabva kurufu tichienda kuupenyu nokuda vehama kwatinoita. Munhu asina rudo anogara ari murufu.

¹⁵Munhu anovenga mumwe wake imhondi uye munoziva kuti mhondi haina upenyu husingaperi hunogara mairi.

¹⁶Izvi ndizvo zvatinoziva nazvo chinonzi rudo, zvokuti akapira upenyu hwake pamusana pedu, isuwo tinofanira kuparadza upenyu hwedu nokuda kwavamwe vedu.

¹⁷Ngatitii munhu ane upfumi hwapanyika akaona mumwe wake asina chokubata iye womuomesera mwoyo pakadaro rudo rwaMwari runganzi ruri maari sei?

¹⁸Vanangu ngatiregei kungodana zvapamuromo kana zvokungobatana kumeso asi muzviito nomuchokwadi.

¹⁹Izvozvi ndizvo zvinotizivisa kuti tiri pachokwadi uye zvinotigadzanisa mwoyo pamberi pake

²⁰kana hana dzedu dzotipomera mhosva, nokuti Mwari mukuru pane hana dzedu uye anoziva zvose.

²¹Vadikanwi kana hana dzedu dzisingatipi mhosva tine chivimbo pamberi paMwari.

²²Tinopiwa naye zvose zvatinokumbira nokuti tinochengeta mitemo yake tichiita zvinomufadza.

²³Mutemo wake ndouya wokuti: Tinofanira kutenda muzita roMwanakomana wake Jesu Kristu uye kudanana sokutiudza kwaakaita.

²⁴Vose vanochengeta mitemo yake vanogara vakabatana naye iyewo akabatanawo navo. Izvi ndizvo zvinotizivisa kuti iye akabatana nesu, zvokuti akatipa Mweya Mutsvene.