Read Bhaibhiri Idzva rechiShona Vatongi 10 Bible Online

Vatongi 10 - Bhaibhiri Idzva rechiShona bible

Vatongi 10

¹Shure kwaAbhimereki kwakazomukawo mumwe wokununura Isiraeri ainzi Tora mwana waPuwa, mwanakomona waDhodho wedzinza rokwaIsakari. Aigara kuShamiri munyika yamakomo yokwaEfuraimu.

²Akatonga vaIsiraeri makumi maviri ana makore matatu, akazofa, akavigwa kuShamiri.

³Mushure maTora makazomuka Jairi wokuGireadhi, akatonga vaIsiraeri kwamakumi maviri amakore ana makore maviri.

⁴Akanga ane makumi matatu avana vakomana, vaitasva madhongi makumi matatu, vaine makumi matatu amaguta anonzi Havhotijairi nanhasi uno, ari munyika yeGireadhi.

⁵Jairi akazofa akavigwa kuKamoni.

⁶VaIsiraeri vakaita zvakare zvisingadiwi naTenzi. Vakatangazve kunamata vanaBhaari naAshitaroti, vamwari vokuSiria, navamwari vokuSidhoni, navamwari vokuMoabhu, navamwari vevaAmoni, navamwari vavaFirisitia. Vakazvicheka ukama naTenzi.

⁷Vakakanda pasi zvokumunamata. Tenzi akavirukira vaIsiraeri nehasha akabva avaisa mumaoko evaFirisitia nomumaoko evaAmoni.

⁸Gore iroro, vakaonesa vaIsiraeri ndondo, vachivabata zvakaipa. Kwakapera makore gumi namasere vachibata zvakaipa kwazvo vaIsiraeri vokumhiri kwaJorodhani, kunyika yavaAmori, kuGireadhi.

⁹VaAmoni vakayambukawo Jorodhani kundorwisa vedzinza rokwaJudha nerokwaBhenjamini nerokwaEfuraimu zvokuti vaIsiraeri vakapinda pfumvu isingatauriki.

¹⁰VaIsiraeri vakachema kuna Tenzi vachiti, “Takakutadzirai nokuti takakufuratirai imi Mwari wedu tikandonamata vanaBhaari.”

¹¹Tenzi akapindura vaIsiraeri achiti, “Handina kukununurai here kuvaIjipiti, nokuvaAmori nokuvaAmoni, nokuvaFirisitia?

¹²Makabatwa zvakaipa navaSidhoni navaAmareki navaMaoni, mukachema kwandiri ndikakununurai mumaoko avo.

¹³Kunyange zvakadaro makandifuratira mukandonamata vamwe vamwari, saka handichakununurai zvakare.

¹⁴Chiendaika zvenyu mundochemera vamwari vamakasarudza ivavo, vakununurei panguva yamunenge mava munhamo.”

¹⁵Asi vaIsiraeri vakati kuna Tenzi, “Takatadza isu! Itai zvenyu zvamunoda nesu. Tateterera, chatinongokumbira chete kuti mutinunurewo nhasi uno.”

¹⁶Saka vakabvisa pakati pavo vamwari vasingazikanwi, vakatangisa kunamata Tenzi, akabva atangawo kuva nehanya nenhamo dzavo.

¹⁷VaAmoni vakaunganidzirana hondo, vakandodzika matendhe kuGireadhi. VaIsiraeri vakaunganidzanawo vakandodzika matendhe kuMizipa.

¹⁸Vanhu, vatungamiriri vokuGireadhi, vechiIsiraeri, vakataurirana vachiti, “Ndiani angatange kurwisa vaAmoni? Ndiye achava mutungamiriri wavanhu, vose vokuGireadhi.”