Read Bhaibhiri Idzva rechiShona Vatongi 17 Bible Online

Vatongi 17 - Bhaibhiri Idzva rechiShona bible

Vatongi 17

¹Munyika yokwaEfuraimu yamakomo makanga muine mumwe murume ainzi Mika.

²Akati kuna amai vake, “Chiuru chiya nezana rimwechete remari yesirivha zvamakabirwa, mukarengerera rushambwa nyakuitora wacho ndichinzwa mufungeka, ndini ndakaitora.” Amai vake ndokuti, “Mwanangu, dai Tenzi akachikukomborera zvake.”

³Akadzosera amai vake chiuru chiya nezana rimwechete rezvidimbu zvesirivha. Amai vake vakati, “Ini nemwoyo wangu wose ndinoturira kuna Tenzi sirivha iyi ndichireverera mwana wangu kuti kugadzirwe chifananidzo chokuveza chakaumbiridzwa nesirivha. Zvino ndochikudzosera sirivha iyoyo.”

⁴Paakadzosera amai vake mari iyi, vakatora mazana maviri ezvidimbu zvesirivha ndokupa kune mupfuri wesirivha. Iye akagadzira chifananidzo chokuveza chakaumbiridzwa nesirivha, chikaiswa mumba maMika.

⁵Mika uyu aiva nemba yebanya[9] mokunamatira vamwari. Akagadzira hanzu yeEfodhi namwari wake anonzi terafimu, akagadza mumwe mwana wake mukomana kuti ave mupristi wake.

⁶Panguva iyoyo muIsiraeri makanga musina mambo. Yaingova njake njake, munhu wose achingoita zvake zvomusoro wake.

⁷Zvino kwaiva nomumwe murume aiva wechidiki wedzinza rokwaRevhi aimbogara muguta reBheterehemu rokwaJudha.

⁸Akatama kuBheterehemu rokwaJudha ikoko achindotsvaka pokugara. Ari munzira akasvika mumusha waMika kunyika yaEfuraimu yamakomo.

⁹Mika akamubvunza achiti, “Unobva kupiko?” Murume uyu ndokuti, “Ndiri muRevhi wokuguta reBheterehemu rokwaJudha. Ndiri kufamba zvangu ndichitsvakawo pokugara.”

¹⁰Mika akamuti, “Dai wachigara zvako neni ugova baba nomupristi kwandiri ini ndichikutambirisa zvidimbu zvesirivha gumi pagore, ndichikupawo sutu yokupfeka nechokudya.” Ndokubva muRevhi apinda mumba.

¹¹Saka muRevhi uyu akagutsikana zvake kugara naye. Jaya iri raingoita somumwe wevana vake.

¹²Mika akagadza jaya iri muRevhi iyeyo, rakava mupristi wake, akagara mumusha maMika.

¹³Mika akachiti, “iye zvino ndava nechokwadi chokuti Tenzi achaita kuti zvinhu zvindifambire zvakanaka nokuti ndava nomupristi wangu wechiRevhi.”