Read Bhaibhiri Idzva rechiShona Vatongi 21 Bible Online

Vatongi 21 - Bhaibhiri Idzva rechiShona bible

Vatongi 21

¹KuMizipa, vaIsiraeri vakanga vapika kuti, “Hapana mumwe wedu acharoodza mwana wake kune vokwaBhenjamini.”

²Zvino vaIsiraeri vakaenda kuBhetieri vakaswera vagere pana Mwari kusvikira manheru vachiridza mhere

³vachiti, “Nhai Tenzi, Mwari wavaIsiraeri zvamboitika seiko izvi muvaIsiraeri kuti rimwe dzinza ravaIsiraeri ritsakatike nhasi uno?”

⁴Mangwana acho vakafumomuka vakavaka atari vakapira mipiro yokupisa nemipiro yokuwadzana.

⁵VaIsiraeri vakati, “Ndiani pakati pamadzinza avaIsiraeri asina kuuya kuna Tenzi kumusangano?” Vakadaro nokuti vakanga vanyatsosimbisisa kupika nezvomunhu anenge asina kuuya kuna Tenzi kuMizipa vachiti, “Anofanira kutourayiwa chete.”

⁶VaIsiraeri vakanga vonzwira urombo hama dzavo dzokwaBhenjamini, voti, “Inga nhasi uno rimwe dzinza ratotsakatika muIsiraeri.

⁷Ko zvatakapika naTenzi kuti hatiroodzi vana vedu kwavari, zvino tichagoita sei kuti vaya vakasara vawane vakadzi?”

⁸Vakati, “Nderipiko dzinza ravaIsiraeri risina kuuya kuna Tenzi kuMizipa? Zvakabuda pachena kuti hakuna vokuJabheshigireadhi akanga auya kumusangano,

⁹nokuti pakaverengwa vanhu kwakabva kwaoneka kuti hakuna wokuJabheshigireadhi vose navakadzi navana.

¹⁰Naizvozvo gungano rakatumira zviuru gumi nezviviri nemvumba dzavo dzavarwi vachivati endai mundouraya vagari vekuJabheshigireadhi namapakatwa uye vakadzi navana.

¹¹Zvamuchaita ndezvizvi, urayayi varume vose mugourayawo mukadzi wose akambozivana nomurume.”

¹²Pavagari vose vomuJabheshigireadhi vakawana kune mazana mana emhandara dzisati dzazivana nomurume vakauya nadzo kumatendhe avo kuShiro munyika yeKanani.

¹³Gungano rose rakatuma kune vokwaBhenjamini kubako rakwaRimoni shoko rokuti pachiva nokunzwanana navo.

¹⁴Panguva iyoyo vokwaBhenjamini vakadzoka ndokuvapa vakadzi vaye vavasina kuuraya kuJabheshigireadhi, asi havana kuvawanira vanokwanirana navo.

¹⁵VaIsiraeri vakanzwira vokwaBenjamini urombo nokuti pakanga pava nevende pamadzinza avaIsiraeri.

¹⁶Vakuru vakuru vegungano ndokuti, “Vakadzi vomudzinza rokwaBhenjamini zvavakapera kufa, zvino tichagoita sei kuti varume vasara ava vawanewo vakadzi?”

¹⁷Vakati, “Padzinza iri rokwaBhenjamini panofanira kuva navana vanoita kuti dzinza iri riendere mberi rigorega kutsakatika muIsiraeri.

¹⁸Asi isu hatingagone kuroodza vana vedu kwavari kuti vave vakadzi vavo.” VaIsiraeri vakadaro nokuti vakanga vapika kuti, “Anenge angoroodza mwana wake kune vokwaBhenjamini, ngaawirwe norushambwa.”

¹⁹Saka vakati, “Inga kune zuva guru wani rokupemberera Tenzi rinochengetwa gore negore kuShiro kuchamhembe kweBhetieri kumabvazuva pedyo nomugwagwa mukuru unobva kuBhetieri uchienda kuShikemu kuri kumaodzanyemba kweRebhona.”

²⁰Vakaudza vokwaBhenjamini vaya kuti, “Chiendai mundohwandira muri muminda yamagirepisi,

²¹mugaririre. Kana vasikana vokuShiro ivavo vobuda kuzotamba mudariro imi ibvai mabuda muminda yamagirepisi mumwe nomumwe wenyu atore mukadzi pavasikana ivavo vokuShiro, aende kunyika yokwaBhenjamini.”

²²Madzibaba avo kana kuti hanzvadzi dzavo dzikauya kuzomhan'ara kwatiri, isu tichati kwavari, “Tapota vedu we-e! Chingotiitiraiwo mwoyochena mutipewo zvenyu nokuti vanhu ava hatina kuvawanira vakadzi kuhondo, nemiwo hamuna kuita zvokuvapa, dai makadaro mungadai muine mhosva.”

²³VokwaBhenjamini vakaita izvozvo, vakandozvitorera vakadzi zvakangoenzanirana nokuwanda kwavo muvasikana vaitamba vakaenda navo. Vakaenda vodzokera kunyika yenhaka yavo. Vakavakazve maguta vakagaramo.

²⁴Munguva iyoyo vaIsiraeri vakapararana, munhu wese akaenda kudzinza rake kumhuri yake. Vakabva ipapo mumwe nomumwe achienda kunyika yenhaka yake.

²⁵Panguva iyoyo muIsiraeri makanga musina mambo yaingova njake njake, munhu wose achingoita zvake zvomusoro wake.