Read Bhaibhiri Idzva rechiShona 2 Johani 1 Bible Online

2 Johani 1 - Bhaibhiri Idzva rechiShona bible

2 Johani 1

¹Ini mukuru wesangano, ndinokunyorerai imi amai makasarudzwa. Ndinokunyorerai imi pamwechete navana venyu musangano, imi vapamwoyo chaivo, kwete kwandiri chete, asi vapamwoyowo kuvanhu vose vanoziva chokwadi

²pamusana pechokwadi chinogara matiri uye chichagara matiri nokusingaperi.

³Nyasha netsitsi norugare ngazvive nesu zvichibva kuna Mwari Baba uye kuna Jesu Kristu Mwanakomana waBaba muchokwadi uye murudo.

⁴Ndakafara kwazvo kuona vamwe vana venyu vachitevera chokwadi sokuudzwa kwatakaitwa naBaba.

⁵Zvino ndinokukumbirai mai, kwete sokunge ndiri kukunyorerai nezvomutemo mutsva asi mutemo watakanzwa kubvira pakutanga wokuti tinofanira kudana.

⁶Chinonzi rudo ndechichi chokuti, tinofanira kuchengeta mitemo yake. Mutemo wacho, sokunzwa kwamakaita kubvira pakutanga, ndowokuti munofanira kutevedza upenyu hworudo.

⁷Ndinodaro nokuti vanyengedzi vakawanda vapararira nenyika. Vanhu ivavo havabvumi kuti Jesu Kristu akauya somunhu. Munhu akadaro ndiye munyengedzi uya, uye ndiye mhandu yaKristu.

⁸Zvichenjererei kuti murege kurasikirwa nezvamakashandira asi kuti muwane mubayiro uzere.

⁹Ani naani anowedzera zvomusoro wake asingarambe ari mune zvinodzidziswa naKristu, haana Mwari. Munhu anoramba ari mune zvinodzidziswa naKristu ana Baba naMwanakomana.

¹⁰Kana mumwe munhu akauya kwamuri aine chidzidziso chakasiyana nechichi musamupinze mumba kana kumukwazisa

¹¹nokuti anomukwazisa anodyidzana naye mubasa rake rakaipa.

¹²Kunyange zvazvo ndiine zvakawanda zvokukunyorerai ndinosarudza kusashandisa pepa neingi. Ndinovimba kuti ndichauya ndozokuonai tozotaurirana tichionana uso nouso kuti kufara kwedu kunyatsozara kuti tuba.

¹³Vana vomunun'una wenyu, akasarudzwa naMwari vanokukwazisai.