Read Bhaibhiri Idzva rechiShona Zvakaratidzwa 1 Bible Online

Zvakaratidzwa 1 - Bhaibhiri Idzva rechiShona bible

Zvakaratidzwa 1

¹Izvi ndizvo zvakaratidzwa naJesu Kristu zvaakapiwa naMwari kuti aratidze varanda vake, zvichaitika nokukurumidza. Akazvizivisa nokutumira mutumwa wake kumuranda wake Johani

²uyo akapupurira izwi raMwari, akapupurawo uchapupu hwaJesu uye zvose zvaakaona.

³Akakomborerwa zvake uyo anoverenga[1] mazwi okuporofita aya. Vakakomborerwawo vanonzwa uye vanochengeta zvakanyorwamo nokuti nguva yavapedyo.

⁴Ndini Johani ndinokunyorerai imi masangano manomwe okuAsia ndichiti: Dai chikomborero chokuitirwa nyasha nokuwaniswa rugare changova nemi chichibva kuna iye aripo, akanga aripo uye achazovapo, uyewo chichibva kumweya minomwe iri pamberi pechigaro chake choumambo,

⁵uyezve chichibva kuna Jesu mupupuri akatendeka, dangwe ravafi, mutongi wamadzimambo apanyika. Iyeyu anotida, akatisunungura kuzvitadzo zvedu neropa rake akaita kuti tive umambo,

⁶uye kuti tive vapristi kuna Mwari wake nababa vake, iye ngaawaniswe mbiri nokutonga narini narini. Ameni.

⁷Hezvo achauya ari mumakore. Ziso rose richamuona nomunhu wose akamubaya uye marudzi ose apasi pano achamuchema zvikuru. Ngazvive saizvozvo. Ameni.

⁸Ndini Arifa naOmega[2] ndizvo zvinotaura Tenzi Mwari, iye aripo, akanga aripo uye achazovapo, iye Samasimbaose.

⁹Ndini Johani hama yenyu ndinoshamwaridzana nemi muna Jesu munhamo uye tiri pasi poumambo humwechete uyezve mukutsungirira kutirira. Ndakanga ndiri pachitsuwa chinonzi Patimosi pamusana peshoko raMwari uye pamusana pokupupurira Jesu.

¹⁰Ndaiva naMweya pazuva raTenzi ndikanzwa necheshure kwangu kurira kukuru kunenge kwebhosvo

¹¹richiti, “Nyora mubhuku zvauchaona uzvitumire kumasangano manomwe aya anoti, reEfesusi nereSimuna nerePerigamumu nereTiatira nereSadhisi nereFiradefia nereRaodhekia.”

¹²Ndipo pandakatendeuka kuti ndione kuti izwi rani raitaura neni. Pandakatendeuka ndakaona zvigadzikiro zvomwenje zvendarama zvinomwe.

¹³Pakati pezvigadzikiro zvinomwe zviya ndakaona akaita soMwanakomana womunhu akanga akapfeka gemenzi rakareba nomudya wendarama padundundu pake.

¹⁴Musoro wake nevhudzi rake zvakanga zvakachena sewuru chena, uye zvakachena samazaya echando. Maziso ake akanga akaita serimi romoto.

¹⁵Tsoka dzake dzakanga dzakaita somundarira wakakwenenzverwa mubisiro zvokutsvedzerera, izwi rake richiita seruzha rwemvura zhinji.

¹⁶Muruoko rwake rworudyi akanga akabata nyenyedzi nomwe. Mumuromo make makabuda bakatwa romucheka kose rinopinza, uso hwake hwaiita sezuva huchibwinya zvikuru.

¹⁷Pandakamuona ndakawira pasi patsoka dzake sokunge ndafa, asi iye akaisa ruoko rwake rworudyi pandiri achiti, “Usatye, ndini Wokutanga noWokupedzisira.

¹⁸Ndini mupenyu uya, hongu ndakambofa zvangu asi tarisa uone ndava mupenyu nokusingaperi uye ndine kii dzorufu nedzokunzvimbo yavafi.

¹⁹Zvino chipota uchinyora zvaunoona zviripo nezvichazovapo.

²⁰Pane zvechakavandika ichi, chezvenyenyedzi nomwe, dzawaona muruoko rwangu rworudyi nezvigadzikiro zvinomwe zvendarama; nyenyedzi nomwe ndivo vatumwa vamasangano manomwe, zvigadzikiro zvinomwe ndiwo masangano manomwe.”