Read Bhaibhiri Idzva rechiShona Zvakaratidzwa 10 Bible Online

Zvakaratidzwa 10 - Bhaibhiri Idzva rechiShona bible

Zvakaratidzwa 10

¹Ndakazoona mumwe mutumwa ane simba achibva kudenga akaputirwa negore aine muraraungu pamusoro pake. Uso hwake hwakanga hwakaita sezuva; makumbo ake akanga akaita semisimboti yemoto.

²Akanga aina kabhuku kokumononora kakazaruka muruoko rwake. Akaisa rutsoka rworudyi rwake pagungwa, rutsoka rwake rworuboshe akaruisa panyika.

³Akadaidzira nezwi guru seshumba iri kudzvova. Paakadaidzira mheni nomwe dzakabva dzadhiriridza.

⁴Pakadhiriridza mheni nomwe dziya ndakanga ndava kuda kunyora, asi ndakanzwa izwi richibva kudenga richiti, “Ingochengetedza zvataurwa nemheni nomwe usazvinyoreba.”

⁵Mutumwa uya wandakaona akamira pagungwa napanyika akasimudzira ruoko rwake kudenga.

⁶Akapika naiye anogara narini narini; akasika denga nezvirimo nenyika nezvirimo negungwa nezviri mariri, zvechinono hapachisina.

⁷Asi mutumwa wechinomwe, panguva yaacharidza bhosvo rake, [8] Mwari achabva azadzisa zvirongwa zvake zvaakataurira varanda vake vaporofita.

⁸Ipapo izwi randakambenge ndanzwa mudenga rakataurazve kwandiri richiti, “Enda undotora bhuku rokumononora rakazaruka riri muruoko rwomutumwa akamira akatsika pagungwa napanyika.”

⁹Zvino ndakaenda kumutumwa ndikamuti andipe kabhuku kaya kokumononora. Iye akanditi, “Tora ukadye. Kachavava munhumbu mako, asi iko kachitapira souchi mukanwa mako.”

¹⁰Ndakatora kabhuku kaya mumaoko omutumwa uya ndikakadya. Kaitapira souchi mukanwa mangu, asi pandakanga ndakadya, mudumbu mangu makaita chirungurira.

¹¹Ndakaudzwa kuti, “Unofanira kuporofita zvakare nezvendudzi dzavanhu vazhinji nezvamarudzi nezvendimi nezvamadzimambo.”