Read Bhaibhiri Idzva rechiShona Zvakaratidzwa 12 Bible Online

Zvakaratidzwa 12 - Bhaibhiri Idzva rechiShona bible

Zvakaratidzwa 12

¹Zvino mudenga makaonekwa chiratidzo chinokatyamadza chomudzimai akatenderedzwa nezuva mwedzi uri pasi petsoka dzake, aine ndaza mumusoro yenyenyedzi gumi nembiri.

²Akanga akazvitakura achichema nokurwadziwa ava kupona achitambudzika pakusununguka.

³Kwakaonekwa chimwe chiratidzo mudenga chezigaranyanya guru dzvuku rine misoro minomwe negumi renyanga nengundu nomwe pamisoro yaro.

⁴Muswe waro wakakumba chikamu chechitatu chenyenyedzi dzedenga ukadzikanda pasi. Zigaranyanya riya rakandomira pamberi pomudzimai akanga ava kuda kusununguka mwana kuti ridye mwana wake paanongomupona.

⁵Akasununguka mwana mukomana aizotonga marudzi ose avanhu netsvimbo yesimbi. Mwana akabva anzi hwetu kuendwa naye kuna Mwari nokuchigaro chake choumambo.

⁶Mudzimaiwo ndokuti ware kutizira kurenje kune nzvimbo yaakanga agadzirirwa naMwari maaizoriritirwa kwamazuva ane chiuru namazana maviri namakumi matanhatu.

⁷Mudenga makamuka hondo Mikaeri navatumwa vake vachirwisa zigaranyanya riya. Zigaranyanya navatumwa varo rakarwisawo.

⁸Zigaranyanya navatumwa varo rakakurirwa; pakanga pasisina nzvimbo yavo kudenga.

⁹Zigaranyanya guru riya rakakandidzirwa pasi, ndiyo nyoka iya yapasichigare inonzi Dhiabhori kana kuti Satani munyengedzi wapasi pose. Akakandidzirwa pasi; vatumwa vake vakakandidzirwawo pasi pamwechete naye.

¹⁰Ndakazonzwa izwi guru mudenga richiti, “Zvino ruponeso nesimba noumambo hwaMwari wedu noukuru hwaMesia wake zvauya nokuti mupomeri wehama dzedu akakandidzirwa pasi; ndiye uya anovapomera mhosva siku nesikati pamberi paMwari wedu.

¹¹Vakamukurira neropa reHwayana uye neshoko rokupupura kwavo nokuti vakazvipira upenyu hwavo kusvika pakutofa.

¹²Fara iwe denga nemi mugere mariri. Une nhamo iwe nyika negungwa nokuti Dhiabhori aburukira kwauri nehasha huru nokuti anoziva kuti nguva yake ipfupi.”

¹³Zigaranyanya parakaona kuti rakandidzirwa pasi rakaronda mudzimai uya akanga asununguka mwana mukomana.

¹⁴Asi mudzimai akanga apiwa mapapiro maviri egondo guru kuti abhururukire kugwenga achitiza nyoka iya kunzvimbo yaaizoriritirwa kwamakore matatu ane hafu.

¹⁵Nyoka iya yakawodzvora mvura serwizi ichibva mukanwa mayo yakananga kumudzimai uya kuti imueredze neboporodzi iroro.

¹⁶Asi nyika ndiyo yakazobatsira mudzimai uya. Nyika yakashama muromo wayo ikamedza rwizi rwuya rwakanga rwaodzvorwa nezigaranyanya rwuchibva mumuromo maro.

¹⁷Zigaranyanya rakashatirirwa mudzimai uya ndokuenda kundorwisa vamwe vana vake vose vanochengeta mitemo yaMwari nouchapupu hwavo kuna Jesu.

¹⁸Rakamira[14] pamahombekombe egungwa.