Read Bhaibhiri Idzva rechiShona Zvakaratidzwa 14 Bible Online

Zvakaratidzwa 14 - Bhaibhiri Idzva rechiShona bible

Zvakaratidzwa 14

¹Ndakati tarisei ndikaona pagomo reZioni pakamira Hwayana iina vanhu zviuru zana namakumi mana ane zvina vakanga vakanyorwa pahuma dzavo zita rayo nezita raBaba wayo.

²Ndakanzwa izwi richibva kudenga samapopopo emvura zhinji uye sokudhiriridza kwemheni kukuru. Izwi randakanzwa rainge vanhu vari kuridza madimbwa avo

³vachiimba rumbo rutsva pamberi pechigaro choumambo pamberiwo pezvisikwa zvipenyu zvina zviya napamberi pavakuru vakuru vaya. Hapana aikwanisa kudzidza rumbo irworwo kunze kwavaya zviuru zana namakumi mana ane zvina vakanunurwa panyika.

⁴Ava ndivo vasina kuzvisvibisa navakadzi vakachengeta utsvene hwavo ivava ndivo vanotevera Hwayana kose kwainoenda, ivava ndivo vakanunurwa muvanhu somuchero wokutanga kuna Mwari nokuHwayana.

⁵Mumuromo mavo hamuna kumbobuda nhema nokuti havana chinoshoreka pavari.

⁶Ndakazoona mumwe mutumwa achibhururuka mudenga aine Shoko Rakanaka rokugara nokugara rokuparidza vanhu vanogara pasi pano munyika dzose, namarudzi ose nendimi dzose navanhu vose.

⁷Akadaidzira nezwi guru achiti, “Ityai Mwari mumupe mbiri nokuti nguva yake yokutonga yasvika. Munamatei iye akasika denga napasi negungwa nezvisipiti zvemvura.”

⁸Mumwewo mutumwa wechipiri akatevera achiti, “Guta guru reBhabhironi raparara, raparara. Raparara iro rainwisa nyika dzose waini yehavi dzaro[15] dzakaipa.”

⁹Mumwezve mutumwa wechitatu akavatevera achiti nezwi guru, “Kana munhu akanamata chikara nechifananidzo chacho achiiswa mucherechedzo pahuma yake kana paruoko rwake,

¹⁰achanwawo waini yehasha dzaMwari inodirwa isina kudirwa mvura mumukombe wehasha dzake. Acharwadziswa nomoto nesarufa pamberi pavatumwa vatsvene napamberi peHwayana.

¹¹Utsi hokurwadziwa kwavo hucharamba huchingotogoka kudenga nokusingaperi uye havana zororo siku nesikati, ivava vanonamata chikara nomufananidzo wacho navavo vanogamuchira mucherechedzo nezita racho.”

¹²Ndikoka kutirira kunodiwa pavatsvene uku! Vanochengeta mitemo yaMwari nechitendero chaJesu.

¹³Ndakanzwa izwi richibva kudenga richiti, “Nyora izvi zvokuti: ‘Vakakomborerwa vanofira muna Tenzi, kubvira zvino zvichienda mberi.’ “Vakakomborerwa zvechokwadi, ndozvinotaurwa naMweya. Vachazorora pamabasa avo, nokuti zviito zvavo zvinovatevera.”

¹⁴Ndakatarisazve ndokuona gore jena, ndakaona mumwe akanga agere pagore akaita soMwanakomana womunhu aine chiremba chendarama mumusoro nejeko rakapinza muruoko.

¹⁵Mumwe mutumwa akabuda muTemberi achidanidzira nezwi guru kuna uya akanga agere pagore achiti, “Shandisa jeko rako ukohwe nokuti nguva yokukohwa yasvika, kukohwa pasi kwasvika.”

¹⁶Uya akanga agere pagore akavheesa jeko rake panyika nyika ikabva yakohwewa.

¹⁷Mumwezve mutumwa akabuda muTemberi kudenga. Naiyewo akanga aine jeko rinopinza.

¹⁸Mumwe mutumwa akabuda achibva kuatari; aiva nesimba rokutonga zvomoto akadanidzira nezwi guru kuna uya akanga ane jeko rinopinza achiti, “Shandisa jeko rako uunganidze zvisumbu zvamagirepisi apanyika nokuti magirepisi ayo aibva.”

¹⁹Naizvozvo mutumwa akavheesa jeko rake panyika akaunganidza magirepisi apanyika, akaakanda muguvi guru rokusvinira waini rehasha dzaMwari.

²⁰Muguvi makakanywa kunze kweguta ropa rakapopoma richibva muguvi zvokusvika pamatomhu ebhiza kukwira namazana matatu amakiromita kureba.