Read Bhaibhiri Idzva rechiShona Zvakaratidzwa 16 Bible Online

Zvakaratidzwa 16 - Bhaibhiri Idzva rechiShona bible

Zvakaratidzwa 16

¹Ndakazonzwa izwi guru richibva muTemberi richiti kuvatumwa vanomwe, “Endai mundodurura panyika ndiro nomwe dzehasha dzaMwari.”

²Saizvozvo mutumwa wokutanga akaenda akadururira ndiro yake panyika. Vanhu vaya vakanga vaine mucherechedzo wechikara vakagwadama vachinamata chifananidzo chacho, vakaita maronda anonyeka akaipisisa.

³Mutumwa wechipiri akadururira ndiro yake mugungwa rikaita seropa romunhu afa, zvipenyu zvose zvaiva mugungwa zvikafa.

⁴Mutumwa wechitatu akadururira ndiro yake munzizi nomuzvisipiti zvemvura zvikapinduka zvikava ropa.

⁵Ndakazonzwa mutumwa anotonga zvemvura achiti, “Imi muri mutsvene kutonga kwenyu kwakarurama imi muripo uye makanga muripo.

⁶Vanhu vakadeura ropa ravatsvene neravaporofita imi mukavapa ropa kuti vanwe. Toko waro! Ndomubayiro wavo.”

⁷Ndakanzwa izwi kuchema paatari richiti, “Hamuoneka Tenzi Mwari Samasimbaose, kutonga kwenyu ndekwepachokwadi uye kwakarurama.”

⁸Mutumwa wechina akadururira ndiro yake pazuva rikabvumirwa kupisa vanhu nomoto.

⁹Vanhu vakapiswa nokupisa kunotyisa kwazvo. Vakashonha zita raMwari aiva nesimba pamusoro pepfumvu uye havana kupinduka kuti vamurumbidze.

¹⁰Mutumwa wechishanu akadururira ndiro yake pachigaro choumambo chechikara chiya. Umambo hwacho hwakava murima, vanhu vakazvirumaruma rurimi mukurwadziwa.

¹¹Vakashonha Mwari wedenga pamusana pokurwadziwa kwavo uye pamusana pamaronda avo asi havana kutendeuka pazviito zvavo.

¹²Mutumwa wechitanhatu akadururira ndiro yake parukova rukuru rweYufuratesi mvura yarwo ikabva yapwa kugadzirira madzimambo okumabvazuva nzira.

¹³Ndakaonawo mumuromo mezigaranyanya riya nomumuromo mechikara chiya uye nomumuromo womuporofita wenhema muchibuda mweya mitatu yakaipa yakaita samatatya.

¹⁴Iyoyi mweya yakaipa inoita zvishamiso inofamba nenyika yose kumadzimambo apasi pano ichivakokorodzera hondo yapazuva guru raMwari Samasimbaose.

¹⁵“Tarisai muone ndichauya sembavha; akakomborerwa munhu anenge akasvinura, achichengeta hanzu dzake kuti arege kufamba akadaro ari mutwi achionererwa.”

¹⁶Mweya iyoyo ichaunganidza madzimambo aya kunzvimbo inonzi Amagedhoni muchiHebheru.

¹⁷Mutumwa wechinomwe akadururira ndiro yake mumhepo, izwi guru rikabva muTemberi pachigaro choumambo richiti, “Zvaitika!”

¹⁸Mheni yakavaima kukadhiriridza, kukaita mabhanan'ana kukava nokundengendeka kwapasi kusati kwamboitika kubvira kuvapo kwavanhu panyika. Hakusi kukura ikoko kokundengendeka kwacho.

¹⁹Guta guru riya rakabva rakamurwa muzvikamu zvitatu maguta evechirudzi akaparara. Mwari haana kukanganwa guta guru reBhabhironi kuti rinofanira kunwa mukombe wehasha dzake huru.

²⁰Zvitsuwa zvose zvakatiza, kana makomowo akanyangarika.

²¹Chivhuramahwe chairema makirogiramu makumi mana anamashanu chakawira vanhu chichibva mudenga kusvikira vanhu vashonha Mwari pamusana pepfumvu yechivhuramahwe, hakusi kutyisa ikoko kwepfumvu iyoyo.