Read Bhaibhiri Idzva rechiShona Zvakaratidzwa 17 Bible Online

Zvakaratidzwa 17 - Bhaibhiri Idzva rechiShona bible

Zvakaratidzwa 17

¹Zvino mumwe wavatuma vanomwe vaya vakanga vane ndiro nomwe, akauya akanditi, “Uya ndikuratidze chirango chichatemerwa chifeve chembiri chiya chigere pamvura zhinji

²chakaitwa ufeve nacho namadzimambo apanyika chine waini youfeve yakararadzisa vagari vapanyika.”

³Ndiina Mweya mandiri akaenda neni kugwenga ndikaona mukadzi akatasva pachikara chitsvuku chakanga chazara namazita okushonha Mwari chakanga chiine misoro minomwe nenyanga gumi.

⁴Mukadzi iyeyo akanga akapfeka hanzu dzinokosha dzoruvara rwohute norutsvuku akashongedzwa nendarama, nezvishongo zvinokosha namatombo anokosha amapera akabata kapu yendarama izere zvisingadiwi naMwari nezvakan'ora zvoufeve hwake.

⁵Pahuma pake pakanga pakanyorwa zita rakavandika rokuti, “BHABHIRONI GUTA GURU, ZIMAI REPFAMBI uye ZIMAI REZVISINGADIWI NAMWARI PASI POSE.”

⁶Uye ndakaona mukadzi uya akararadza neropa ravatsvene uye neropa rezvapupu zvakafira Jesu. Pandakamuona ndakashamiswa kwazvo.

⁷Asi mutumwa akati kwandiri, “Ko uri kushamiswa nei? Rega ndikutaurire zvakavandika zvomukadzi uyu uye nezvechikara chine misoro minomwe nenyanga gumi chinomutakura.

⁸Chikara chawakaona chaivapo iye zvino hachisisipo chichabuda mugomba risina parinoperera chichindoparadzwa. Vanhu, panyika, vasina kunyorwa mazita avo mubhuku roupenyu pasi pasati pavapo, vachashamiswa vachiona chikara chiya, kuti chaimbovapo zvino hachichisipo asi chichavapozve.

⁹Izvi zvinoda munhu anofunga anoungwaru. Misoro minomwe zvikomo zvinomwe zvakagarwa nomukadzi;

¹⁰uyewo kune madzimambo manomwe. Vashanu vavo vakatofa. Mumwe wavo ndiye ari kutonga mumwe haasati atouya asi kana auya achatonga kwechinguvana.

¹¹Chikara chiya chakanga chiripo asi chisisipo ndiye mambo wechisere. Asi ari pamwechete navanomwe vaya; bva achaparadzwa.

¹²“Nyanga gumi dzawaona, madzimambo gumi vasati vagadzwa umambo asi vachapiwa simba roumambo kweawa imwechete pamwechete nechikara chiya.[17]

¹³Vane mweya wechirwirangwe uye vakapa simba ravo noukuru hwavo kuchikara.

¹⁴Vacharwisa Hwayana asi Hwayana ichavakurira nokuti ndiTenzi wavanatenzi naMambo wamadzimambo. Uye vaainavo vanhu vakadanwa vakasarudzwa uye vakatendeka.”

¹⁵Mutumwa akanditi, “Mvura yawaona panga pagere chifeve chiya, vanhu nemhomho yavanhu namarudzi nendimi.

¹⁶Nyanga gumi dzawaona, idzo nechikara zvichavenga chifeve chiya. Zvichachitorera zvose zvachinazvo zvichichisiya chisina kupfeka chinhu. Zvichadya nyama yacho zvichachipisa nomoto

¹⁷nokuti Mwari akaisa mumwoyo yavo pfungwa yokuti vaite zvaanoda nomwoyo mumwechete nokupa umambo hwavo kuchikara nokuombera vachiteerera chikara kusvikira mashoko aMwari azadzikiswa.

¹⁸Mukadzi wawaona ndiro guta guru rinotonga madzimambo apasi pano.”