Read Bhaibhiri Idzva rechiShona Zvakaratidzwa 18 Bible Online

Zvakaratidzwa 18 - Bhaibhiri Idzva rechiShona bible

Zvakaratidzwa 18

¹Mushure maizvozvi ndakaona mumwe mutumwa achibva kudenga ane simba guru rokutonga, pasi pakapenyeswa nembiri yake.

²Akadaidzira nezwi guru achiti, “Raparara, raparara Bhabhironi guta guru rava musha wemweya yakaipa; rava dambiro remweya yose yakan'ora nechirugu cheshiri dzose dzakan'ora necheshiri dzisingadiwi navanhu.

³Ndudzi dzose dzakanwa waini yehavi dzaro dzakaipa, madzimambo ose akaita upombwe naro. Vashambadzi vapasi vakapfumiswa noupfumi nounzenza hwaro.”

⁴Ndakanzwazve rimwe izwi richibva kudenga richiti, “Budai mariri vanhu vangu. Mungadaro mukazoitawo zvitadzo zvaro mukapinda mupfumvu dzaro

⁵nokuti zvitadzo zvaro zvakaita murwi unosvika kudenga. Mwari akayeuka huipi hwaro.

⁶Achariitira zvarakaitirawo vamwe achiridzorera kakapetwa, zviito zvaro. Riitirei zvarakakuitirai muridzorere kakapetwa zviito zvaro muripe waini inokaripa zvakapetwa kaviri.

⁷Rionesei nhamo murirwadzise zvakaenzana nembiri namafaro arakazvipa. Zvarinozviti nechomumwoyo, ‘Ndigere zvangu samambokadzi, handisi chirikadzi, kuchema handimbofa ndakachema.’

⁸Pfumvu dzaro dzichariwira nezuva rimwechete, dzinoti rufu, kuchema rufu, neshangwa yenzara uye richapiswa nomoto nokuti Mwari anoritonga ane simba guru.”

⁹Madzimambo apanyika akaita upombwe nounzenza naro vacharichema vachiungudza pavachaona kutogoka utsi hwokutsva kwaro.

¹⁰Vachamira kure uko nokutya matambudziko aro vachiti, “Maiwe! Maiwe! Nhaiwe guta guru, iwe guta rakasimba, Bhabhironi zvakuwana neawa imwechete.”

¹¹Veshawo dzokutengeserana vapanyika vanorichema vachiungudza nokuti hapana achatenga zvinhu zvavo;

¹²zvinhu zvavo izvi zvinoti: ndarama nesirivha nezvishongo namapera kwoti machira erineni yakanakisisa neeruvara rwohute neesirika namatsvuku, kwouya mapuranga anonhuwirira akasiyana — siyana, kozouya mhando nemhando yezvinhu zvakavezwa nenyanga dzenzou; kozoti zvinhu zvakagadzirwa nemiti inokosha zvakaitwa nendarira nesimbi kana namatombo anokosha;

¹³kuchizoti chinamoni, netwekubikisa tunonhuwirira; kotiwo rusenzi nemura norusenzi rune kakunhuwirira kakanakisa kwazvo; kuchizouya waini namafuta noupfu hwekoroni hwakatsetseka uye nekoroni kuchiuyawo mombe nehwai namabhiza nengoro dzehondo ndokuchizouyawo nhapwa zvichireva vanhu.

¹⁴Vanoti zvawaida kuwana namafaro ako zvakusiya, hudobori hwako namafaro ako zvakupesa hauchambozviwanazve.

¹⁵Veshawo dzokutengeserana ivava vakawana upfumi mariri vachamira kure uko nokutya nokuoneswa nhamo kwaro vacharichema vachiungudza zvinonzwika vachiti,

¹⁶“Maiwe! Maiwe guta guru kudai rakanga rakapfeka rineni yakanakisisa nehanzu dzoruvara rwohute netsvuku rakashongedzwa nendarama nezvishongo namapera.”

¹⁷Neawa imwechete, upfumi hwose uhu hwaparara. Vatungamiriri vengarava navanhu vanofamba nzendo nengarava navafambisi vengarava navose vanoshava mari vachishandisa nyanza, vakamira kure uko,

¹⁸vakachema zvinonzwisa tsitsi pavakaona utsi hwokutsva kwaro. “Nderipi guta ringaenzaniswe neguta iri guru?”

¹⁹Vakazvidira ivhu mumusoro vachichema vachiungudza vachiridza mhere vachiti, “Maiwe! Maiwe guta guru kudai rakapfumisa vose vaiva nengarava munyanza, neawa imwechete raparara.

²⁰Imi matenga nemi vatsvene nemi vapositori nemi vaporofita ritii, ‘Tsvatu waro.’ Itii nomufaro kwariri, ‘Tsvatu waro.’ Nokuti Mwari akaripa chirango pamusoro pezvarakakuitirai.”

²¹Mutumwa ane simba guru akatora dombo rakakura seguyo akarikanda mugungwa achiti, “Ndiko kukundwa zvine utsinye kuchaitwa Bhabhironi guta guru marisingazombowanikwazve.”

²²Mumhanzi wevemadimbwa newavaimbi newevenyere newevemabhosvo hauchazombonzwiki mauri uyewo mhizha youmhizha hupi zvaho, hauchazombowanikwamo uyezve mauri hamuchazombonzwika ruzha rwokukuya.

²³Kana mwenje werambi hauchabvirazve mauri. Mauri hamuchazombonzwikazve izwi romukuwasha kana romuroora nokuti veshawo dzokutengeserana vako vanga vari madzichangamire apanyika. Marudzi ose akanyengedzwa nouroyi hwako.

²⁴Mariri makawanikwa ropa ravaporofita neravatsvene neravose vakauraiwa pasi pano.