Read Bhaibhiri Idzva rechiShona Zvakaratidzwa 2 Bible Online

Zvakaratidzwa 2 - Bhaibhiri Idzva rechiShona bible

Zvakaratidzwa 2

¹“Nyorera mutumwa wesangano rokuEfesusi, mazwi ouyo akabata nyenyedzi nomwe muruoko rwake rworudyi uye anofamba mukati mezvigadzikiro zvomwenje zvinomwe zvendarama uti:

²“ ‘Ndinoziva mabasa ako ndinozivawo kushingaira kwako nebasa nokutirira kwako uye kuti haufarirani navanhu vakaipa. Wakaedza avo vanozviti vapositori ivo vasiri ukavaona kuti ndevenhema.

³Ndinoziva kuti uri kutirira chinyararire, uchitirira zvako pamusana pezita rangu uye usingamboneta.

⁴Asi chandinovenga mauri ndechichi, chokuti wakakanda pasi rudo rwawaiva narwo pakutanga.

⁵Naizvozvo rangarira pawakakoromoka upinduke uite mabasa awaiita pakutanga. Kana usina kuita saizvozvo, ndichauya kwauri ndigobvisa chigadzikiro chomwenje wako panzvimbo pacho kusatoti watendeuka.

⁶Zvimwe zvimwewo zvazvo, chako chaunacho ndechokuti unovenga mabasa avateveri vaNikoraitesi andinovengawo

⁷uyo ane nzeve ngaanzwe zviri kurehwa naMweya kumasangano. Uyo anokunda ndichamupa mvumo yokudya muti woupenyu uri muparadhiso yaMwari.’

⁸“Nyorera mutumwa wesangano rokuSimuna, mazwi owokutanga nowokupedzisira, akafa asi akazomuka.

⁹Nhamo dzako ndinodziziva nourombo hwako ndinouziva; asi iwe uri mupfumi zvako uye ndinoziva kureverwa makuhwa kwaunoitwa navavo vanozviti tiri vaJudha asi ivo vasiri, chavari chaicho isangano raSatani.

¹⁰Usatye matambudziko awava kupinda. Hezvo Dhiabhori ava kuzokanda vamwe venyu mujeri kuti muedzwe. Kwamazuva gumi muchapinda mupfumvu. Rambai makatendeka kusvikira pakufa. Ini ndichakupai mubayiro wechiremba choupenyu.

¹¹Ane nzeve ngaanzwe zviri kutaurwa naMweya kumasangano. Uyo anokunda, rufu rwechipiri haruna charunomuita.

¹²“Nyorera mutumwa wesangano rokuPerigamumu mazwi ouyo ane bakatwa romucheka kose uti,

¹³‘Maunogara ndinomuziva, mumuzinda waSatani wakaramba wakangoti kwati — kwati nezita rangu. Hauna kukanda pasi chitendero changu kunyange pamazuva aAntipasi mupupuriri wangu. Munhu wangu akatendeka, uya akauraiwa pakati penyu mumusha imomo maSatani.’

¹⁴Asi ndine zvimwe zvishomanana zvandisingadi pauri. Ikoko muna vamwe vanotevera chidzidziso chaBharamu akarairidza Bharaki kufurira vaIsiraeri kuchitadzo kuti vadye chokudya chakanga chapirwa kuzvifanananidzo uye kuita unzenza.

¹⁵Uyezve una vamwe vanotevera zvidzidziso zvevekwaNikoraitesi.

¹⁶Nezvo pinduka; pasina izvozvo, ndichakuvinga ndizovarwisa nebakatwa romuromo wangu.

¹⁷Ane nzeve ngaanzwe zviri kutaurwa naMweya kumasangano. Uyo anokunda ndichamupa imwe mana yakavanzika. Ndichamupawo dombo jena nezita idzva rakanyorwa padombo iroro, zita risina anoriziva, kusiya iyeyo chete anenge arigamuchira.

¹⁸“Nyorera mutumwa wesangano rokuTiatira mazwi oMwanakomana waMwari ana maziso anenge rimi romoto anamakumbo akaita sendarira yakakwenenzverwa.

¹⁹Ndinoziva mabasa ako norudo rwako nechitendero chako nokushanda kwako nokutirira kwako uye kuti mabasa ako okupedzisa anokunda okutanga.

²⁰Asi chandisingadi pauri ndechichi chokuti unoregerera mukadzi uyu Jezebhero anozviti muporofitakadzi asi achidzidzisa nokufurira varanda vangu kuita ufeve nokudya chokudya chakapirwa kuzvifananidzo.

²¹Ndakamupa nguva yokuti apinduke asi ari kuramba kusiyana nounzenza hwake.

²²Ndichamurarisa pasi nedenda, naavo vanoita ufeve naye ndichavapinza mudambudziko rinorwadza kusatoti vasiyana nezviito zvake.

²³Vana vake ndichavaparadza norufu. Masangano ose ndipo paachaziva kuti ndini ndinoongorora pfungwa nemwoyo womunhu uye ndichakupai, mumwe nomumwe wenyu, maererano nezviito zvake.

²⁴Asi kunemi vamwe mose muri muTiatira imomo, vasingatenderani nechidzidziso ichi, vasina kudzidza zvinonzi navanhu zvakadzama zvaSatani, ndinoti kwamuri ini handichakuremedzai nomumwe mutoro

²⁵asi kuti batisisai zvamuinazvo kusvikira ndauya.

²⁶Uyo anokunda uye anoramba ari pabasa rangu kusvikira pakupedzisira, ndichaita kuti vechirudzi vave mumaoko ake.

²⁷Iye achavatonga akavabatira shamhu yesimbi achivapwanya zvokuti mwarara sehari dzevhu sokugamuchira kwandakaitawo simba kubva kuna Baba vangu.

²⁸Uye ndichamupa nyenyedzi yorungwanani.

²⁹Ane nzeve ngaanzwe zviri kurehwa naMweya kumasangano.”