Read Bhaibhiri Idzva rechiShona Zvakaratidzwa 20 Bible Online

Zvakaratidzwa 20 - Bhaibhiri Idzva rechiShona bible

Zvakaratidzwa 20

¹Ndakazoona mumwe mutumwa achiburuka kudenga akabata muruoko rwake kiyi yegomba risina parinoperera nengetani huru.

²Akabata zigaranyanya riya, zinyoka rapasichigare riya rinonzi Dhiabhori kana kuti Satani ndokumusunga kwamakore ane chiuru ndokumukanda mugomba riya.

³Akarizarira ndokumunamiriramo kuti aregezve kunyengedza marudzi kusvikira makore ane chiuru aya apera. Mushure maizvozvo anofanira kumbosunungurwa kwenguva diki.

⁴Zvino ndakazoona zvigaro zvoumambo. Vakanga vagere pazviri ndivo vakapiwa simba rokutonga uye ndakaonawo mweya yavavo vakanga vadimburwa musoro pamusana pokupupurira kwavo Jesu uye pamusana peshoko raMwari uye pamusana pokuti havana kunamata chikara kana kunamata chifananidzo chacho kana kuiswa mucherechedzo wacho pahuma dzavo kana pamaoko avo. Vakamukazve vakatonga naKristu kwechiuru chamakore.

⁵Vamwe vafi vose havana kumuka kusvikira chiuru chamakore chiya chapera, uku ndiko kumuka muvafi kokutanga.

⁶Akakomborerwa zvake uye mutsvene munhu uyo anenge ari mumwe waavo vapakumuka kokutanga ikoko. Pane vakadai, rufu rwechipiri haruna simba asi vachava vapristi vaMwari naKristu, vachatonga naiye kwechiuru chamakore.

⁷Panopera chiuru chamakore Satani achasunungurwa mujeri rake.

⁸Achabuda kundonyengedza marudzi ari kumativi mana enyika, Ndivo vana Gogu nanaMagogu achavaunganidzira kurwa hondo vakawanda sejecha regungwa.

⁹Vachafamba nenyika yose, vakakomberedza musasa wavatsvene neguta rapamwoyo asi moto uchatozomoka mudenga uchivaroromesa.

¹⁰Dhiabhori akanga avanyengedza achakandwa muzidziva romoto nesarufa mune chikara chiya nomuporofita wenhema uya, vachaoneswa nhamo siku nesikati narini narini.[18]

¹¹Ndakazoona chigaro chikuru chichena choumambo naiye akanga agerepo. Nyika nedenga zvakatiza kubva paari zvakabva zvava zvinhu pasina.

¹²Ndopandakazoona vafi, vakuru navaduku vakamira pamberi pechigaro choumambo. Mabhuku akazarurwa. Kwakazarurwawo rimwe bhuku. Iroro ndiro bhuku roupenyu. Vakafa vakatongwa maererano nezvakanga zvakanyorwa mumabhuku iwayo zvichifambirana nezvavakanga vaita.

¹³Gungwa rakaburitsa vakafa vaiva mariri. Rufu nenzvimbo yavafi zvakaburitsawo vakafa vakanga vari mazviri; vose vakatongwa maererano nezvavakanga vaita.

¹⁴Rufu nenzvimbo yorufu zvakakandwa muzidziva romoto. Urwu ndirwo rufu rwechipiri; dziva romoto.

¹⁵Kana zita romunhu rikashaikwa risina kunyorwa mubhuku iroro roupenyu, munhu iyeyo anokandwa mudziva riya romoto.