Read Bhaibhiri Idzva rechiShona Zvakaratidzwa 21 Bible Online

Zvakaratidzwa 21 - Bhaibhiri Idzva rechiShona bible

Zvakaratidzwa 21

¹Ipapo ndipo pandakazoona denga idzva nenyika itsva nokuti denga rakare nenyika yakare zvakanga zvapfuura uye gungwa pakanga pasisina.

²Ndakazoona guta dzvene Jerusaremu idzva richiburuka mudenga richibva kuna Mwari rakagadzirirwa semwenga, mwenga akashongedzerwa murume wake.

³Ndakanzwa izwi guru richibva pachigaro choumambo richiti, “Tarisai muone kuti Mwari ava kuzoita musha wake pakati pavanhu. Achagara navo; ivo vachava vanhu vake iyewo Mwari pachake achava navo.

⁴Achapukuta misodzi yose pamaziso avo. Rufu haruchazovapozve, hapachazova nokuungudza kana kuchema kana kurwadziwazve, nokuti zvinhu zvakare zvinenge zvapfuura.”

⁵Uya akanga agere pachigaro choumambo akati, “Tarisai muone ndava kuita kuti zvinhu zvose zvive zvitsva.” Akatizve, “Nyora izvi nokuti mazwi aya mazwi anovimbika uye ndeechokwadi.”

⁶Uya akanditi, “Zvaitika. Ndini Arifa naOmega ndini mavambo namagumo ezvinhu kune vane nyota ndichavapa mvura pasina muripo ichibva mukasipiti kemvura youpenyu.

⁷Uyo anokunda achawana mugove wenhaka yezvinhu izvi ini ndichava Mwari wake iye achivawo mwana wangu.

⁸Asi mbwende, navanohedhuka navakapara zvitadzo nemhondi nemhombwe navaroyi, navanamati vezvinhu zvisiri Mwari, navarevi venhema, chavo ivo zidziva riya rinobvira moto nesarufa. Ndirwo rufu rwechipiri.”

⁹Ndipo pakazouya mumwe wavatumwa vanomwe vaya vakanga vane ndiro nomwe dzakanga dzizere pfumvu nomwe dzokupedzisira. Akati kwandiri, “Uya ndikuratidze mwenga, mudzimai weHwayana.”

¹⁰Ndiina Mweya, akanditakura akaenda neni kuGomo refurefu akandiratidza guta dzvene reJerusaremu richiburuka richibva mudenga, richibva kuna Mwari

¹¹riine kupenya kokuvapo kwaMwari. Rain'aima sechishongo chinokosha kwazvo uye seemeradhi rakachena sezvimedu zvedombo romusarasara.

¹²Rakanga riine rusvingo rukuru rwakareba kuenda mudenga ruine misuo mikuru gumi nemiviri. Pamisuo mikuru iyoyo paiva navatumwa gumi navaviri. Pamisuo mikuru iyoyo pakanga pakanyorwa mazita amadzinza gumi namaviri avaIsiraeri.

¹³Kumabvazuva kwaiva nemisuo mikuru mitatu; kuchamhembe kuine misuo mikuru mitatu; kumaodzanyemba kuine misuo mikuru mitatu kumadokerowo kuine misuo mikuru mitatu.

¹⁴Rusvingo rweguta iroro rwakanga ruina matombo ohugaro gumi namaviri. Paugaro ipapo pakanga pakanyorwa mazita gumi namaviri avapositori veHwayana.

¹⁵Uyo aitaura neni akanga aino rutanda rwendarama rwokueresa guta iroro nemisuo mikuru yaro namasvingo arwo.

¹⁶Guta iroro raiva namativi mana akaenzana. Urefu hwaro hwakanga hwakaenzana noupamhi hwaro. Akaera urefu hweguta norutanda rwake hukaita makiromita zviuru zviviri zvina mazana maviri urefu hwaro noupamhi hwaro nokukwira kwaro mudenga zvakanga zvakaenzana.

¹⁷Akaerawo rusvingo rwaro rukaita mamita makumi matanhatu ana mashanu namaerero anoita vanhu asi iye ari mutumwa aiera.

¹⁸Rusvingo irworwo rwakanga rwakavakwa namatombo ejasipa. Iro guta riri rendarama yoga yoga rakachena segirazi.

¹⁹Ugaro hwerusvingo rweguta iroro hwakanga hwakashongedzwa nezvishongo zvemhando nemhando. Chishongo chokutanga chakanga chiri chejasipa chechipiri chiri chesafaya chechitatu chiri cheagati chechina chiri cheemeradhi

²⁰chechishanu chiri cheonikisi chechitanhatu chiri chekaneriani chechinomwe chiri chekirisoriti chechisere chiri cheberi chechipfumbamwe chiri chetopazi chegumi chiri chekirisopurasi chegumi nechimwe chiri chejasindi chegumi nechipiri chiri cheemetisiti.

²¹Misuo mikuru gumi nemiviri iya yakanga iri yamapera gumi namaviri. Suo guru rimwe nerimwe rakaitwa nePera rimwechete. Migwagwa yeguta iroro yakanga iri yendarama yakanakisisa inoonekera segirazi.

²²Asi handina kuona Temberi muguta iroro nokuti Temberi yaro ndiTenzi Mwari, Samasimbaose neHwayana.

²³Guta iroro haridi zuva kana mwedzi zvokurivhenekera nazvo nokuti kupenya kokuvapo kwaMwari ndicho chiedza charo, Hwayana iri iyo rambi rayo.

²⁴Marudzi ose achafamba achivhenekerwa nechiedza charo uye madzimambo apasi achauisa mariri zvinovapa mbiri.

²⁵Misuo yaro mikuru haichazombopfigwa masikati uye hakuzombovi nousiku ikoko.

²⁶Vachaunzamo mariri zvinhu zvinopa marudzi mbiri nomukurumbira.

²⁷Hakuna chakan'ora chichapinda mariri kana ani zvake anoita zvisingadiwi naMwari kana anonyengedza kusiya chete vakanyorwa mubhuku roupenyu reHwayana.