Read Bhaibhiri Idzva rechiShona Zvakaratidzwa 5 Bible Online

Zvakaratidzwa 5 - Bhaibhiri Idzva rechiShona bible

Zvakaratidzwa 5

¹Zvino ndakaona murudyi mouya akanga agere pachigaro choumambo, bhuku rokumononora rakanyorwa seri neseri rakanamwa nenamo nomwe.

²Ndakaonawo mutumwa akasimba achidaidzira nezwi guru achiti, “Ndiani anokodzera kuzarura bhuku rokumononora nokukwatanura namo dzaro.”

³Hapana kana mumwechete, kudenga kana pasi pano kana pasi penyika aigona kuzarura bhuku rokumononora iroro kana kutarisa mukati maro.

⁴Ipapo ini ndakachema zvikuru nokuti aikodzera kuzarura bhuku rokumononora iroro kana kutarisa mariri; haana kuwanikwa.

⁵Mumwe wavakuru vakuru vaya akati kwandiri, usacheme zvako, inga shumba yedzinza rokwaJudha, Dzinde raDhavhidhi, akakunda, kuti akwanise kuzarura bhuku rokumononora iroro nenamo dzaro nomwe dziya.

⁶Ipapo ndakaona Hwayana ichitarisika seyakambouraiwa; yakanga yakamira nechapakati pechigaro choumambo yakatenderedzwa nezvisikwa zvipenyu zvina zviya uye navakuru vakuru vaya. Yakanga iine nyanga nomwe namaziso manomwe. Ndiyo mweya minomwe yaMwari yakatumwa pasi pose.

⁷Yakaenda ikatora bhuku rokumononora murudyi rwaiye akanga agere pachigaro choumambo.

⁸Payakatora bhuku rokumononora iroro, zvisikwa zvipenyu zvina zviya navakuru vakuru makumi maviri navana vaya vakati pasi wareware pamberi peHwayana. Mumwe nomumwe aine dimbwa mumaoko nekadhishi kazere rusenzi ndiyo minamato yavatsvene.

⁹Vakaimba rumbo rutsva vachiti, “Munokodzera kutora bhuku rokumunonora nokukwatanura namo dzaro nokuti makauraiwa mukanunurira Mwari vanhu kubva kumarudzi ose nendimi dzose navanhu vose nendudzi dzose.

¹⁰Makavaita umambo navapristi vaMwari wedu uye vachatonga pasi.”

¹¹Ndakazotarisa ndikanzwa kumativi ose kupoteredza chigaro choumambo nezvisikwa zvipenyu zviya navakuru vakuru vaya izwi ravatumwa vazhinji vakawanda zvokuita zviuru nezviuru namazana akazanirana kwazvo;

¹²vachiti nezwi guru, “Hwayana yakauraiwa yakakodzera kugamuchira simba roupfumi noungwaru noukuru norukudzo nembiri nechikomborero.”

¹³Ndakanzwa zvisikwa zvose zviri kudenga napasi napasi penyika nomugungwa nazvose zvirimo zvichiti, “Ngaarumbidzwe, narini narini apiwe rukudzo nembiri noukuru iye agere pachigaro choumambo uyewo kuHwayana.”

¹⁴Zvisikwa zvipenyu zvina zviya zvakati, “Ameni,” vakuru vakuru vaya vakabva vati wareware pasi vachinamata.