Read Bhaibhiri Idzva rechiShona Zvakaratidzwa 6 Bible Online

Zvakaratidzwa 6 - Bhaibhiri Idzva rechiShona bible

Zvakaratidzwa 6

¹Ndipo pandakaona Hwayana ichikwatanura namo yokutanga, imwe yenamo nomwe dziya. Ndakanzwa chimwe chezvisikwa zvipenyu zvina zviya chichitaura nezwi rinenge mabhanan'ana richiti, “Uya.”

²Ndakatarisa, onei bhiza jena, mutasvi waro aine uta. Akagadzwa chiremba choumambo. Akabuda ari mukundi ari kundokunda.

³Paakakwatanura namo yechipiri ndakanzwa chisikwa chipenyu chechipiri chichiti, “Uya.”

⁴Pakabva pabuda rimwe bhiza rakati piriviri kutsvuka. Mutasvi waro akabvumirwa kubvisa rugare panyika. Akapiwa bakatwa guru kuti vanhu vaurayane.

⁵Paakakwatanura namo yechitatu, ndakanzwa chisikwa chipenyu chechitatu chichiti, “Uya.” Ndakatarisa onei bhiza dema mutasvi waro aine chikero muchanza.

⁶Ndakazonzwa chimwe chainge izwi pakati pezvisikwa zvipenyu zviya chichiti, “Rita yekoroni ndiwo muripo uchapiwa munhu pazuva[4] marita matatu ebhari ndiwo muripo uchapiwa munhu pazuva asi mafuta newaini usazvibate — bate.”

⁷Paakakwatanura namo yechina ndakanzwa izwi rechisikwa chipenyu chechina richiti, “Uya.”

⁸Ndakatarisa, onei bhiza rakabhuruvara, zita romutasvi waro rainzi Rufu Nzvimboyorufu ichimutevera mushure. Chikamu chenyika chechina chakaiswa mumaoko avo kuti vauraye vanhu nehondo yebakatwa nenzara nedenda nezvikara zvapasi.

⁹Paakakwatanura namo yechishanu, ndakaona pasi peatari mweya yavanhu vakaurairwa shoko raMwari nouchapupu hwavakaita.

¹⁰Vakadaidzira nezwi guru vachiti, “samasimba changamire mutsvene wechokwadi, kuchazova riniko musati matonga nokutsividza ropa redu kuna vavo vanogara panyika?”

¹¹Mumwe nomumwe wavo akapiwa gemenzi jena, vachiudzwa kuti vambozorora kashoma kusvikira uwandu hwavashandi pamwe navo nehama dzavo vaifanira kuuraiwa saivo hwakwana.

¹²Hwayana iya payakakwatanura namo yechitanhatu ndakaona kundengendeka kukuru. Zuva rakasvipa sesaga, mwedzi wejenaguru wakatsvuka ropa.

¹³Nyenyedzi dzedenga dzakakuhumukira pasi pano sokudonhedza kunoita muonde muchero wawo wapachando kana wavhuvhutwa nedutu remhepo.

¹⁴Denga rakanyangarika sebhuku rokumunonora ramoneredzwa. Makomo ose nezvitsuwa zvakabviswa panzvimbo dzazvo.

¹⁵Ipapo madzimambo apanyika navakuru vakuru vavanhu navakuru vakuru vehondo navapfumi navakasimba navavo vose vanoti nhapwa navasununguki vakavanda mumapako napasi pamabwe mumakomo.

¹⁶Vaidaidzira kumakomo namabwe vachiti “Tiwirei mutivandise tirege kuonekwa nouyo agere pachigaro choumambo mutihwandise kuhasha dzeHwayana.

¹⁷Nokuti zuva guru rehasha dzavo rauya, pakadaro ndiani angapamire.”