Read Bhaibhiri Idzva rechiShona Zvakaratidzwa 7 Bible Online

Zvakaratidzwa 7 - Bhaibhiri Idzva rechiShona bible

Zvakaratidzwa 7

¹Mushure mezvo ndakazoona vatumwa vana vakamira pamativi mana enyika vakadzivirira mhepo ina dzapasi kuti pasave nemhepo inovhuvhuta panyika kana pagungwa kana kuvhuvhuta muti zvawo.

²Ndipo pandakazoona mumwe mutumwa achikwira mudenga kumabvazuva aine chidhindo chaMwari mupenyu. Akadaidzira nezwi guru kuvatumwa vana vaya vakanga vapiwa simba rokuondonga nyika negungwa

³achiti, “Musaondonge nyika kana gungwa kana miti, kusvikira taisa mucherechedzo pahuma dzavaranda vaMwari wedu.”

⁴Ndakanzwa uwandu hwavakaiswa mucherechedzo vaiva zviuru zana namakumi mana ane zvina ndivo vakaiswa mucherechedzo mudzinza roga roga ravana vaIsiraeri.

⁵Mudzinza rokwaJudha zviuru gumi nezviviri mudzinza rokwaRubheni zviuru gumi nezviviri mudzinza rokwaGadhi zviuru gumi nezviviri.

⁶Mudzinza rokwaAsheri zviuru gumi nezviviri mudzinza rokwaNafutari zviuru gumi nezviviri mudzinza rokwaManase zviuru gumi nezviviri.

⁷Mudzinza rokwaSimioni zviuru gumi nezviviri mudzinza rokwaRevhi zviuru gumi nezviviri mudzinza rokwaIsakari zviuru gumi nezviviri.

⁸Mudzinza rokwaZebhuroni zviuru gumi nezviviri mudzinza rokwaJosefi zviuru gumi nezviviri mudzinza rokwaBhenjamini zviuru gumi nezviviri.

⁹Mushure mezvi ndakatarisa ndikaona manyoremanyore avanhu vasingaverengeki, vamarudzi ose, namadzinza ose navanhu vose nendimi dzose vamire pamberi pechigaro choumambo napamberi peHwayana vakapfeka magemenzi machena vaine mirara[5] mumaoko vachidaidzira nezwi guru vachiti,

¹⁰“Ruponeso runobva kuna Mwari wedu agere pachigaro choumambo uye runobva kuHwayana.”

¹¹Vatumwa vose vakanga vamire vakatenderedza chigaro choumambo vakatenderedzawo vakuru vakuru vaya vakatenderedzawo zvisikwa zvipenyu zvina zviya. Vatumwa vakati kotakota nouso pamberi pechigaro choumambo vachinamata Mwari

¹²vachiti, “Ameni. Kurumbidzwa nembiri noungwaru nokutendwa norukudzo noukuru nesimba ngazvive kuna Mwari wedu narini narini Ameni.”

¹³Mumwe wavakuru vakuru vaya akanditi, “Ko ava vakapfeka magemenzi machena ndivanani? Uye vabva kupi?”

¹⁴Ndakati kwaari, “Changamire inga ndimi munoziva wani.” Iye akati kwandiri, “Ava ndivo vakabuda mupfumvu huru vakasuka magemenzi avo vakaachenesa muropa reHwayana.

¹⁵Ndokusaka vari pamberi pechigaro choumambo chaMwari vachimushandira siku nesikati muTemberi yake. Iye anogara pachigaro choumambo achavafukidza netendhe rake.

¹⁶Havazonzwi nzara kana kunzwazve nyota zuva harichazovapisizve kana kunzwa kupisa kunobvuraudza

¹⁷nokuti Hwayana iya iri pakati pechigaro choumambo ndiyo ichava mufudzi wavo. Iyo ichavatungamirira kuzvisipiti zvemvura mhenyu. Mwari achapukuta misodzi yose pamaziso avo.”