Read Bhaibhiri Idzva rechiShona Zvakaratidzwa 9 Bible Online

Zvakaratidzwa 9 - Bhaibhiri Idzva rechiShona bible

Zvakaratidzwa 9

¹Mutumwa wechishanu akaridza bhosvo rake. Ndakabva ndaona nyenyedzi yakawira pasi kubva kudenga yakanga yapiwa kiyi yeziburi regomba risina parinoperera.

²Akazarura ziburi riya regomba risina parinoperera. Muziburi iroro makatogoka utsi hunenge hwevira guru romoto. Zuva nomunga'mu zvakabva zvati ndindo kusvipa noutsi hwomuziburi riya.

³Muhutsi ihwohwo makabuda mhashu panyika dzakapiwa simba rinenge ramarize apanyika.

⁴Dzakaudzwa kuti dzisaparadze uswa hwenyika kana chii zvacho chinyoro kana muti zvawo, asi kuti dziparadze vanhu vasina mucherechedzo waMwari pahuma dzavo.

⁵Dzakabvumirwa kuvaonesa nhamo kwemwedzi mishanu dzisingavaurayi. Kurwadza kwadzo kwaiita sokurwadza kwerize kana raruma munhu.

⁶Pamazuva iwayo vanhu vachatsvaka rufu vasingaruwani vachasuwira kufa, asi rufu ruchatiza.

⁷Mhashu idzodzo dzakanga dzakaita samabhiza aronganirana hondo. Pamisoro yadzo pakanga paine zvairatidzika sendaza dzendarama. Zviso zvadzo ungati vanhu.

⁸Mvere dzadzo ungati ivhudzi ravakadzi, mazino adzo, ungati mazino eshumba chaiwo.

⁹Makwakwambi adzo waitoti zvidemautare zvesimbi zvokuzvidzivirira nazvo muhondo. Irwo ruzha rwamapapiro adzo waiti ingoro dzehondo dzina mabhiza ava kumhanyira muhondo

¹⁰dziine miswe inenge yamarize inoruma uye simba radzo rokukuvadza vanhu kwemwedzi mishanu riri mumiswe yadzo iyoyo.

¹¹Mambo wadzo aiva mutumwa uya wegomba risina parinoperera. Zita rake muchiHebheru rinonzi Abhadhoni muchiGiriki richinzi Aporioni.[6]

¹²Nhamo yokutanga ndipo painoperera apa. Dzimwe nhamo mbiri dziri kuuya.

¹³Mutumwa wechitanhatu akaridza bhosvo rake ndikanzwa izwi robva kune zvinenge nyanga zvina zviya zvapaatari yendarama iri pamberi paMwari

¹⁴richiti kumutumwa wechitanhatu uya ainge ane bhosvo, “Sunungura vatumwa vana vakasungwa parwizi rukuru rwaYufuratesi.”

¹⁵Vatumwa vaya vana vakasunungurwa vakanga vakamisirwa nguva nezuva nemwedzi negore rokuuraya naro chikamu chechitatu chavanhu.

¹⁶Varwi vamabhiza vaiva gumi ramazana rakapetwa kaviri rigopetwazve kanosvika gumi ramazana;[7] ndakanzwa uwandu hwavo.

¹⁷Uku ndiko kuona kwandakaita mabhiza iwayo muchiratidzo changu. Vatasvi ivavo vakanga vakapfeka mademautare okuzvidzivirira nawo muhondo oruvara rwomoto nesafaya nesarufa. Misoro yamabhiza iwayo yainge misoro yeshumba, mumiromo yawo muchitogoka moto noutsi nesarufa.

¹⁸Chikamu chechitatu chavanhu chakauraiwa nepfumvu idzodzi nhatu dzomoto noutsi nesarufa zvichibva mumiromo yawo

¹⁹nokuti simba ramabhiza iwayo raiva mumiromo yawo nomumiswe yawo. Miswe yawo yakanga yakaita senyoka ine misoro inokuvadza.

²⁰Vamwe vanhu vose vakasara vaya, vasina kuuraiwa namatenda iwayo havana kuregera rubatabata rwavo rwuya rwokunamata mweya yakaipa nokunamata zvifananidzo zvendarama nezvesirivha nezvendarira nezvamatombo nezvemiti zvisingakwanisi kuona kana kunzwa kana kufamba.

²¹Havana kuregera humhondi hwavo nouroyi hwavo noupombwe hwavo kana umbavha hwavo.