Read Bhaibhiri Idzva rechiShona Rute 3 Bible Online

Rute 3 - Bhaibhiri Idzva rechiShona bible

Rute 3

¹Naomi akataurira muroora wake achiti, “Mwanangu ndafunga zvokukutsvakira kuti uitewo imba yako uwanewo pokunyatsogara.

²Handiti Bhoazi uyu ane varandasikana vawaiva navo; ihama yedu chaiyo. Chiteerera unzwe, usiku hwanhasi achange achiurutsa bhari paburiro riya.

³Naizvozvo zvishambidze, uzore mafuta, uende kuburiro wakapurira hanzu dzako dzakanakisisa. Asi chenjerera kuti iye arege kuziva kuti uripo kusvikira apedza kudya nokunwa.

⁴Kana Bhoazi ondorara, nyatsocherechedza paanenge arara, ugozoendapo womufukura kumakumbo ake, uvatepo iye achakuudza zvokuita.”

⁵Rute akapindura achiti, “Ndichaita zvose zvamandiudza.”

⁶Saizvozvo Rute akaenda kuburiro kuya akaita zvose zvaakaudzwa navamwene vake.

⁷Kuzoti Bhoazi apedza kudya nokunwa akati zvino ofara, akaenda zvake kundorara munyasi memurwi wembesanwa. Rute akauyapo chinyararire, akamufukura kumakumbo ake akavatapo.

⁸Pakati pousiku, Bhoazi akapatika, ndokubva atendeuka onei kune mukadzi arere kumakumbo kwake!

⁹Akati, “Ndiwe ani?” Iye akati, “Ndini Rute muranda wenyu. Regai zvenyu gumbeze renyu rindifukidzewo nokuti ndimi munofanira kundigara nhaka.”

¹⁰Iye akabva amuti, “Tenzi ngaakukomborere mwanangu, waratidza kutendeseka, nomwoyochena wawazoita rwendo runo unotopfuura wawakaita pakutanga nokuti hauna kuchiva kuroorwa neachiri mukomana, mupfumi kana murombo.

¹¹Zvino mwanangu, usatye zvako ndichakuitira zvose zvawakumbira nokuti vamwe vangu vose vomuguta rino vanozviziva kuti iwe uri mudzimai ane chiremera.

¹²Zvino ichokwadi kuti ndiri hama chaiyo yomumba, asi kune mumwe anotova wepedyo kupinda ini.

¹³Chipedza zvako usiku hwanhasi uri pano. Kana akakugarira nhaka, zvakanaka rega aite saizvozvo, asi kana akaramba kugara nhaka, ndinopika naTenzi mupenyu kuti ini ndinokugara nhaka yacho. Chirara zvako kusvikira mangwana.”

¹⁴Saka iye akarara zvake kumakumbo kwake kusvikira mangwanani. Asi akamuka nguva yokuti hawainyatsoziva kuti munhu wauri kuona ndiani nokuti Bhoazi akanga asingade kuti zvizikanwe kuti pane mukadzi akasvika paburiro usiku.

¹⁵Akamuti, “Uya nechari yawakafuka uitambanudze.” Rute akabva aitambanudza, Bhoazi akadira mairi bhari inorema makirogiramu anenge makumi maviri. Akamutsiga, akaenda zvake muguta.

¹⁶Paakasvika kuna vamwene vake, vakamubvunza kuti, “Zvafamba sei mwanangu?” Iye ndokuvataurirawo zvose zvaakanga aitirwa nomurume iyeyo

¹⁷achiti, “Andipa bhari inotokwana makirogiramu anenge makumi maviri achiti, ‘Haungadzokere kuna vamwene vako usina chawakabata mumaoko.’ ”

¹⁸Ivo vakati, “Chimira zvako mwanangu kusvikira waona kuti nyaya iyoyi ichasvika papi nokuti murume iyeyu haasiri kuzogara pasi asi achatoigadzirisa chete iye nhasi uno.”