Read Bhaibhiri Idzva rechiShona 1 Samueri 24 Bible Online

1 Samueri 24 - Bhaibhiri Idzva rechiShona bible

1 Samueri 24

¹Sauro akati adzoka mukuronda vaFirisitia shoko rakasvika kwaari raiti, “Dhavhidhi ari kurenje reEnigedhi uku.”

²Sauro akatora zviuru zvitatu zvavarume vano, vakanyatsosarudzwa muIsiraeri yose, ndokuenda kundotsvaka Dhavhidhi navanhu vake kwakatarisana namatombo engururu.

³Sauro akasvika napamatanga ehwai aiva pedyo nenzira paiva nebako. Sauro akapindamo kuti ambozvibatsira zvake. Izvozvo Dhavhidhi navanhu vake vaitova zvavo mukatikati chaimo mebako.

⁴Vanhu vake iye Dhavhidhi vakamuti, “Zuva riya riya razosvika nhasi rakanzi naTenzi, ‘Ndichaisa muvengi wako mumaoko ako ugoita zvako zvaungade kuita naye.’ ” Dhavhidhi akaverevedza akacheka chipenga chehanzu yaSauro.

⁵Hana yaDhavhidhi yakarova nokucheka kwaakanga aita chipenga chehanzu yaSauro.

⁶Akati kuvanhu vake, “Norubatsiro rwaTenzi, chinhu chakadai hachifanire zvacho kana kumbondipinda mumwoyo chokuti ndisimudze ruoko rwangu kuita chinhu chakaipa kuna tenzi wangu, muzodzwa waTenzi. Kwete. Muzodzwaka waTenzi uyu.”

⁷Dhavhidhi akadzora vanhu vake namazwi iwaya akavarambidza kurwisa Sauro. Sauro akasimuka akabuda mubako muya oenda zvake.

⁸Mushure macho Dhavhidhi akabudawo mubako muya akadaidzira kuna Sauro achiti, “Nhai mambo, changamire!” Sauro paakati cheu, Dhavhidhi akabva azvityora achikotamira pasi kumuremekedza.

⁹Dhavhidhi akati kuna Sauro, “Munodirei kunzwa zvavanhu vanoti, ‘Dhavhidhi ari kuvavarira kukukuvadzai.’

¹⁰Nhasi mazvionerawo moga kuti Tenzi anga atokuisai zvake mumaoko angu mubako umu, vamwe vanga vatoti ndikuurayei asi handina kukukuvadzai ndichiti, ‘Handidi kusimudza ruoko rwangu kuita chinhu chisina kunaka kuna tenzi wangu, nokuti muri muzodzwa waTenzi.’

¹¹Chinzwaika baba, tarisai muone chipenga chehanzu yenyu ichi chandakabata mumaoko. Nokucheka kwandaita chipenga chehanzu yenyu ichochi ndichirega zvangu kukuurayai muri kutoonawo zvinonyatsokuratidzai kuti hapana chakaipa kana upanduki mandiri, uye hapana chandakakutadzirai kunyange zvazvo imi muchindihwandira kuda kundiuraya.

¹²Mhosva iri pakati pangu nemi, Tenzi ndiye achatoziva zvake kuitonga kwaachaiita. Tenzi ndiye achatotsividza kunditadzira kwamakaita. Asi ini nouruoko rwangu urwu handidi zvangu kana kumbokubatai.

¹³Inga wani vakuru vane tsumo inoti, ‘Mumunhu akaipa munobuda uipi,’ asi ini noruoko rwangu urwu handidi zvangu kana kumbokubatai.

¹⁴Ko izvozvo nhai mambo weIsiraeri wamavinga chaiye ndiani chaizvo? Ndiani wamuri kurondawo kudai? Iyeniwo zvangu imbwa yakafa, nhata zvayo!

¹⁵Naizvozvo Tenzi ngaave mutongi, aenzanise mhosva yedu, aone zvaangaite andipipirirewo aburitse pachena kuti handina mhosva.”

¹⁶Dhavhidhi achangoti pedzei kutaura izvi, kuna Sauro, Sauro akabva ati, “Ndiwe here mwanangu Dhavhidhi uri kutaura nomuromo wako?” Sauro akabva azhamba kuchema.

¹⁷Akati kuna Dhavhidhi, “Uri munhu akarurama kwazvo paneni nokuti iwe wakandiitira zvakanaka asi ini ndikakuitira zvakaipa.

¹⁸Wanyatsozviratidza izvi nhasi nokundiitira zvakanaka kwawaita, Tenzi paanga atondiisa zvake mumaoko ako, warega kundiuraya.

¹⁹Nokuti munhu akawana muvengi wake angamurege achienda zvake here? Saka Tenzi ngaakupe mubayiro wakapetwa pamusana pezvakanaka zvawandiitira nhasi uno.

²⁰Chinzwaka, ndazoziva zvino kuti chaizvoizvo iwe, ndiwe uchava mambo, uye kuti newe umambo hweIsiraeri huchatonyatsodzika midzi.

²¹Zvino chipika kwandiri nezita raTenzi kuti hauzotsakatisa zvizvarwa zvangu zvichauya, uye kuti hauzorovesa zita rangu mudzinza rokwababa vangu.”

²²Dhavhidhi akapika izvozvo kuna Sauro. Sauro akadzokera kumusha, asi Dhavhidhi navanhu vake vakakwidza kubako.