Read Bhaibhiri Idzva rechiShona 1 Samueri 30 Bible Online

1 Samueri 30 - Bhaibhiri Idzva rechiShona bible

1 Samueri 30

¹Dhavhidhi navanhu vake vakasvika kuZikiragi, rava zuva retatu. Vakasvikowana vaAmareki vapamba zvinhu mudunhu reNegevhu nomuguta reZikiragi. Vakanga varwisa Zikiragi variroromesa nomoto.

²Vakatapa vakadzi navamwe vose vaivamo kubvira kuvaduku kusvikira kuvakuru. Havana wavakauraya asi vakangokukuchana navo ndokuenda.

³Dhavhidhi navanhu vake vakati vachisvika muguta umu wanei raroromeswa nomoto, madzimai avo navana vavo vakomana navasikana wanei vatapwa.

⁴Dhavhidhi navanhu vaaiva navo vakazhamba kusvikira vasisina simba rokuchema.

⁵Vakadzi vaDhavhidhi vaviri, Ahinoamu wokuJezireeri naAbhigairi chirikadzi yaNabhari vokuKaremeri vakanga atapwawo.

⁶Dhavhidhi akasuruvara kwazvo nokuti vamwe vakanga votoda zvokumutaka namabwe pamusana pokuti vanhu vose vakanga vasuruvara kwazvo vofunga zvino vana vavo vakomana navasikana. Asi Dhavhidhi akawana simba rake muna Tenzi, Mwari wake.

⁷Dhavhidhi akati kumupristi Abhiatari mwanakomana waAhimereki, “Uya kuno neefodhi.” Abhiatari akabva auya neefodhi kuna Dhavhidhi.

⁸Dhavhidhi akada kunzwa kuti Tenzi anoti kudii nezvinhu izvi akati, “Ndoronda here chikwata ichi? Ndichavabata here?” Mwari ndokumuti, “Varonde zvako unovabata chete ugovanunura.”

⁹Dhavhidhi akabva asimukawo namazana matanhatu avarwi vaakanga ainawo. Vakasvika kukakova keBhesori vamwe vavo vakasara ipapo.

¹⁰Asi iye Dhavhidhi navamwe vavo mazana mana vakaramba vachironda. Vamwe mazana maviri vakasarapo, vakanga vaneta kwazvo, vakatadza kuyambuka kakova keBhesori.

¹¹Kune vamwe vakawana mumwe muIjipiti musango vakauya naye kuna Dhavhidhi. Vakamupa chingwa akadya, vakamupawo mvura yokunwa.

¹²Vakamupawo chimedu chechambwa chamakuyu nechisumbu chamagirepisi akaomeswa. Paakanga apedza kudya kudaro, simba rake rakabva radzoka pakare nokuti akanga apedza mazuva matatu, siku nesikati asina kana kuisa chinhu mukanwa kana kunwa mvura zvayo.

¹³Dhavhidhi akamubvunza kuti, “Uri wokwaaniko iwe? Unobva kupi?” Iye ndokuti, “Ndiri mukomana wokuIjipiti. Ndiri muranda womumwe muAmareki. Tenzi wangu akangonditiwo njo pano apa ndarwara mazuva matatu apera aya.

¹⁴Takanga tatorwisa dunhu reNegevhu rokuvaKereti, nedunhu reNegevhu rokwaJudha nedunhu reNegevhu rokwaKarebhu, tikapisawo Zikiragi nomoto.”

¹⁵Dhavhidhi akamuti, “Ungakwanise here kundisvitsa kune chikwata ichochi.” Iye akati, “Chimbonditsidziraiwo naMwari kuti hamundiuraye kana kundiisa mumaoko atenzi wangu ndigokusvitsai zvenyu kune chikwata ichocho.”

¹⁶Akadzika naye ikoko wanei vaAmareki vakaita zvavo rurasademo, vakapararira nenzvimbo iyoyo yose vachiti uku runodya, uku runonwa, uku runotamba pamusana pezvose zvavakanga vapamba kunyika yavaFirisitia nokunyika yokwaJudha.

¹⁷Dhavhidhi akavarakatisa kuuraya kubvira parubvunzavaeni kusvikira manheru eramangwana racho. Hakuna akapunyuka kusara kwamajaya mazana mana akatasva ngamera akatiza.

¹⁸Dhavhidhi akadzosa zvose zvakanga zvapambwa navaAmareki, akanunura vakadzi vake vaviri.

¹⁹Hapana chakashayikwa, kana kai zvako kubvira kuvana vakomana navasikana kusvikira kune zvakanga zvapambwa kunyange nezvakanga zvatorwa. Dhavhidhi akadzoka nazvo zvose.

²⁰Dhavhidhi akavatorerawo mombe dzose nezvimwe zvipfuwo izvozvo. Vanhu vakatinha zvipfuwo izvozvo zviri mberi kwake[19] vachiti, “Izvi ndizvo zvakapambwa naDhavhidhi.”

²¹Dhavhidhi akasvika pana varume vaya mazana maviri vakanga vaneta zvokuti vakanga vasisakwanise kuenda naDhavhidhi, vakanga vambosiyiwa vaya pakakova keBhesori. Vakauya kuzochingurana naDhavhidi pamwechete navanhu vaiva naye. Dhavhidhi paakasvika kwavari akavakwazisa.

²²Asi kwaiva navamwe vakaipa mwoyo vomuchokoto pavanhu vakanga vaenda naDhavhidhi vakakonora vachiti, “Pamusana pokuti vanhu ava havana kuenda nesu, hapana chatinovapa pazvinhu zvatakapamba zvatakadzosa izvi asi kuti munhu ngaangotora mukadzi wake navana vake aende.”

²³Asi Dhavhidhi akati, “Kweteka hama dzangu, hamungadaro nezvinhu zvatakangopiwa zvedu naTenzi. Inga Mwari akatichengeta wani akaisa chikwata chavavengi vedu mumaoko edu.

²⁴Ndiani angabangoteerera zvamuri kutaura? Chiripo chaicho ndechokuti chawana aenda kundorwa ndicho chichawanawo anosara pazvinhu, mugove wavo mumwechete.”

²⁵Kubvira musi iwoyo zvichienda mberi Dhavhidhi akabva ati uve murao nomutemo weIsiraeri kusvikira pari nhasi.

²⁶Dhavhidhi paakasvika kuZikiragi akatumira zvimwe zvaakanga apamba kushamwari dzake, vakuru vakuru vokwaJudha achiti, “Hecho chikomborero chezvakapambwa kuvavengi vaTenzi.”

²⁷Vaakatumira ndeava vanoti: vokuBhetieri, novokudunhu reNegevhu rokuRamoti, kwouya vokuJatiri,

²⁸novokuAroeri, novokuSifumoti, novokuEshitemoa,

²⁹kwoti vokuRakari, novokumaguta okuJerahimeeri, novokumaguta okuvaKeni,

³⁰kwouyawo vokuHoruma, novokuBhorashani, novokuAtaki,

³¹kwozoti vokuHebhuroni nokumwe kwose zvako kwaimboshanyirwa naDhavhidhi navarwi vake.