Read Bhaibhiri Idzva rechiShona 1 Samueri 8 Bible Online

1 Samueri 8 - Bhaibhiri Idzva rechiShona bible

1 Samueri 8

¹Kuzoti Samueri akwegura, akagadza vanakomana vake kuti vave vatongi veIsiraeri.

²Dangwe racho aiva mukomana ainzi Joeri, wechipiri ari Abhiya, vaiva vatongi kuBheerishebha.

³Asi vanakomana vake havana kutevedzera tsika dzababa vako. Asi kutoti vakatsauka mugwara racho vapindwa nomweya wokuda kupfuma nenzira dzisina kunaka. Vakagamuchira pfumbamuromo, vachirega kutonga zviri pamurao.

⁴Ipapo vakuru vakuru vose veIsiraeri vakakokorodzana vakaenda kuna Samueri kuRama

⁵vakasvikoti kwaari, “Chionaika imi makwegura. Uye chimwe nechichi ndechokuti vanakomana venyu havasi kutevedzera tsika dzenyu. Zvino chitisarudzirai mambo wokutitonga sezvakangoitawo mamwe marudzi ose.”

⁶Asi chichemo chavo chokuti, “Tisarudzirei mambo wokutitonga,” hachina kufadza Samueri, ndokubva anamata kuna Tenzi.

⁷Tenzi akati kuna Samueri, “Gamuchira zvako zvose zvavari kukumbira nokuti haasiri iwe wavari kuramba, asi wavari kuramba chaiye kuti ave mambo wavo, ndini.

⁸Sezvavaingoita kubvira pandakavaburitsa muIjipiti kusvikira pari nhasi zvokundiramba vachindonamata vamwe vamwari ndizvozviwo zvavava kuita kwauri.

⁹Zvino gamuchira zvako chichemo chavo. Asi chete, nyatsovayambira chaizvo uvaisire pachena zvichaitwa namambo achavatonga.”

¹⁰Saizvozvo Samueri akarondedzera zvose zvaakanga audzwa naTenzi kuvanhu vaimukumbira mambo.

¹¹Akati, “Zvichaitwa namambo achakutongai ndezvizvi: achatora vana venyu achivaita varwi vengoro dzake dzehondo dzamabhiza navachairi vadzo, vamwe vari vokumhanya vachitungamirira ngoro yake.

¹²Achazvisarudzira vamwe kuti vaite vatungamiriri vake pachake vezvikwata zvina varwi chiuru vamwewo chavarwi makumi mashanu mashanu. Vamwe vachange vari vokurima nokukohwa mumunda make, nokugadzira zvombo zvake zvehondo nemidziyo yose yengoro dzake dzehondo.

¹³Achatora vanasikana venyu achivapa basa rokugadzira mafuta okuzora anonhuhwirira nokubika chingwa nezvimwewo zvokudya.

¹⁴Achatora minda yenyu yakanakisisa pamwechete neminda yemigirepisi neyemiorivhi achiipa zvake machinda ake.

¹⁵Achakubvisisaiwo mutero wechegumi chakewo zvake chembesanwa dzenyu nechewaini achichipa makurukota ake namachinda ake.

¹⁶Achatorawo zvake varanda venyu vechirume nevechikadzi, navana venyu majaya, namadhongi enyu kuti aitise basa rake.

¹⁷Achatorawo mutero wechegumi pahwai nembudzi dzenyu. Iyemi pachenyu muchava varanda vake.

¹⁸Panguva iyoyo muchazochema pamusana pamambo wenyu iyeyo wamunenge mambozvisarudzira iyemi pachenyu.” Asi Tenzi haakupindurei pazuva iroro.

¹⁹Asi vanhu vakaramba kunzwa zvavakaudzwa naSamueri. Vakati, “Kwete! Tiri kuda kutongwa namambo

²⁰kuti tiitewo samamwe marudzi ose aya, titongwewo namambo wedu iyeyo apote achititungamirira nokuzotirwirawo muhondo.”

²¹Samueri akati anzwa zvose zvakataurwa navanhu akandozvitaurirawo kuna Tenzi.

²²Tenzi akati kuna Samueri, “Gamuchira zvako chichemo chavo uvape mambo.” Samueri akaudza vaIsiraeri vose kuti, “Munhu wose ngaadzokere kuguta rokwake.”